Números 6 - Biblia Wichi

Häp täja m'ak tä iwoye elh tä Nazareo

¹ Lhawuk tahuyej Moisés wet yok:

² –Fwenho Israel lhayis, Chik hin'o wok atsinha iwoye lhämet tä lhayen t'amajcheta n'oyej, wet lhayen häpeya Nazareo,

³ isit'ak iyäyej hat'es wok m'ak chik häpek hin'o w'oknajej, wok vinagre. Isit'ak iyäyej uvas t'i, häte isit'ak tufw uvas wok uvas tä tamchäy.

⁴ Ifwalas tä ihi tä lhayen häpeya Nazareo, isit'ak tufw m'ak at chik häpek uvas iyej.

⁵ “Häte isit'ak yisetche lew'ole, mat iwahinchä tä pites pajla'tha taj lepes lewhäy tä lhayen häpeya Nazareo, tsi lhayen ot'amajcheta.

^6-7 Lew'ole häpe t'at letetnek tä lham häpe ot'amajchet. Wet häp tä isit'ak lhaitott'ayne n'op'itsek, tej chik lajcha, wok lako, wok lepuhfwa chik y'il, häpkhilek nikok'ayayeje n'op'itsek.

⁸ Nilhok ifwalas tä lewhäy lhayene t'at Nazareo yämthilek häpe ot'amajchet.

⁹ “Chik iche elh tä iwelkatchä tä y'il tä iwhäye, wet lew'ole tä yen t'amajcheta n'oyej nech'e kok'ayeje n'op'itsek tä iwhäye, chik mälhyejtso, is chik yisetche lew'ole chik tajyäme siete ifwalas, tä yen tetneka tä lhailej tä lakokhayaj ihi.

¹⁰ Wet chik nichäte ocho ifwalas, is chik ihäne sacerdote täkwfwas pop, wok täkwfwas hokwinaj leles, wet itihi lepe häp carpa tä owukwe.

¹¹ Wet chik ilänhen lhamel, is chik sacerdote hiw'en n'oho elh tä yen lahaya n'och'isukyaj, wet iwunho elh tä yen otw'ayhata, yämthilek otäyhtej letes tä n'op'itsek tamenej. Wet ifwalatso iwohiyet'ak nachajahok yen t'amajcheta n'oyej häp lew'ole,

¹² wet nech'e yachajo tä häpe ot'amajchet. Wet õyenhit'a tichunhayajayej m'ak tä tajyäme, tsi lakokhayaj ihi lew'ole tä pajche yen t'amajcheta n'oyej. Häte is chik ihän n'oye tson'ataj tä hiw'en nekchäm weihalha tä yen lahaya yämthilek otäyhat letes.

Elh tä Nazareo taj lepes ifwalas tä lewhäy

¹³ “Wet chik taj lepes ifwalas tä lhayen t'amajcheta wet häpe Nazareo, is chik ihoye lepe häp carpa tä owukwe.

¹⁴ Is chik yen otw'ayhata tson'ataj tä asnak tä hiw'en nekchäm weihalha, wet isilataj tä newache m'ak chik iyej, yämthilek õ'län wet õ'wunho. Wet äp is chik hiw'en n'oho elh tson'ataj tä atsinha tä äp hiw'en nekchäm weihalha, wet äp isilataj tä newache m'ak chik iyej, yämthilek õ'länpe n'och'isukyaj tä õyen lahaya. Wet äp is chik ichäj n'oye elh tson'ataj tä asnak wet isilataj tä newache m'ak chik iyej, yämthilek õ'län tä lha'isyen n'oye.

¹⁵ “Häte is chik yen otw'ayhata pan tä häpe harina tä wuj tä is tä äp levadura newayej tä õ'kasoyej aceite, wet ithatho lehifwaj tä õyenejlhi tuskal, lhäy'e tortillafwas tä levadura newayej, ts'ilak aceite tä õ'tsäype, wet hip'ajtej yachuyaj lhay lhäy'e hat'es.

¹⁶ Wet is chik sacerdote itihi tä ottache nilhokej m'ayhayna. Chik ileyej, õ'länla itshäwet tä yen lahaya n'och'isukyaj, lhäy'e elh tä iwunho, wet sacerdote yachajila n'oye.

¹⁷ Häte hiw'enla noho tson'ataj tä asnak tä õ'län yämthilek Nazareo lha'isyen n'oye. Wet hip'ajthiyeja lehifwaj tä õyenejlhi tuskal tä pan tä levadura newayej ihi, lhäy'e yachuyaj lhay, lhäy'e hat'es.

¹⁸ Wet tä Nazareo ihi lepe häp carpa tä owukwe, iwohiyet'ak nistache lew'ole tä pajche yen t'amajcheta n'oyej. Wet is chik ithatho itäj tä ichufwi itshäwet tä õ'län yämthilek lha'isyen n'oye.

¹⁹ Chik ileyej, is chik sacerdote tachuma tson'ataj t'isan tä i'pe lefwapol tä y'o, lhäy'e tefwajni pan tä levadura newayej tä ihi lehifwaj tä õyenejlhi tuskal, lhäy'e tefwajni tortillafwaj tä levadura newayej. Wet tähestso is chik itihi Nazareo takweyey,

²⁰ wet nech'e sacerdote itihla n'oye. Tsi häp tä õhw'enhatej sacerdote, lhäy'e häp itshäwet t'okwe tä õ'ti n'oye, lhäy'e lheche t'isan. Wet tä tajyäme täjtso, nech'e Nazareo is t'at chik iyäyej hat'es.

²¹ “Häp täjtso m'ak tä iwoye elh tä Nazareo, häp hin'o wok atsinha tä lhayen t'amajcheta n'oyej. Wet häp tähestso m'ayhay chik yen t'awayhata n'oyej. Wet chik iche elh m'ak tä t'uhläk hiw'en n'oho, is t'at. Is chik imatitche nilhokej lhämtes tä pajche iwoye.”

Sacerdote lakäpfwayaj

²² Lhawuk tahuyej Moisés wet yok:

²³ –Fwenho Aarón lhäy'e leles, Chik lhamel takäpfwaye Israel lhayis, is chik yok,

²⁴ “Is chik Lhawuk takäpfway amehen wet t'amaj amejen.

²⁵ Is chik Lhawuk ihutunpe ahusey wet iti amejen lep'altsenyaj.

²⁶ Is chik Lhawuk hin'älit amejen lehumnhayaj wet hiw'en amhohen atamsek.”

²⁷ “Is chik mälhyejtso chik lhamel iwo olheya tä t'änej n'oye, yämthilek otiyej okäpfwayaj tä is häp Israel lhayis.”