Números 4 - Biblia Wichi

M'ak tä õyen chumeta häp Leví lhayis tä tälhe letes Coat

¹ Lhawuk tahuyej Moisés lhäy'e Aarón wet yok:

² –Wo t'ufwahtesa Leví lhayis tä tälhe letes Coat, häp iyhäjpej tä lhalepuhfwas.

³ Lesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä owukwe.

⁴ “Wet Coat leles lechumet tä iwoye häpe ot'amajchet, tä häpe täja:

⁵ Chik nichätepej lewhäy tä wichi yikhen, is chik Aarón lhäy'e leles ihochufwi carpa tä owukwe, wet ilanhi sak'al tä tumejlä lech'o tä Lhamya tä N'ot'amajchet, wet ikäfwelej Arca tä Ot'amajchet tä olhämtes ihi.

⁶ Wet is chik hip'oyejpe inätetas t'ähes, wet hich'enpe wesaj tä y'it tä imälhewek, wet itihi hal'äy lew'etes yämthilek õtilhäj.

⁷ “Wet häp mesa tä pan tä ot'amajchet lew'et, is chik lhamel hich'enpe wesaj tä y'it, wet iti'pe n'olhäthis, lhäy'e n'okalnhey tä wustas, lhäy'e lehis tä õ'tsäyho hat'es tä õyen otw'ayhata, häte pan tä wichi yen otw'ayhata nilhokej ifwalas.

⁸ Nilhokej tähestso is chik hich'enpe wesaj tä ichät, wet ikäfwelej inätetas, wet itihi hal'äy lew'etes yämthilek õtilhäj.

⁹ “Wet is chik tachuma wesaj tä y'it wet ikäfwelej n'ochäkwhis, lhäy'e lecha tä õyistejpej n'ochäk lhäk tä y'o, lhäy'e platofwas tä õ'tichechufwi, lhäy'e lehis tä õ'tsäyhomchepej aceite.

¹⁰ Wet is chik hip'ajtitwek nilhokej, wet ikäfwelej inätetas t'ähes, wet iti'pe hal'äy tä lew'et yämthilek õtilhäj.

¹¹ “Häte is chik hich'enpe wesaj tä y'it häp altar tä oro, wet ikäfwelej inätetas t'ähes, wet itihi hal'äy lew'etes yämthilek õtilhäj.

¹² “Wet is chik ihutwek nilhokej m'ayhay tä õ'chumyenwethä tä ihi owukwech'o tä Lhamya tä Ot'amajchet, wet ithatho wesaj tä y'it, wet ikäfwelej inätetas t'ähes, wet iti'pe hal'äy tä lew'et yämthilek õtilhäj.

¹³ “Wet is chik ilej itshäwet pe tä i'pe altar, lhäy'e mok'otaj, wet ikäfwelej wesaj tä ifwak'an,

¹⁴ wet iti'pe nilhokej m'ayhay tä õ'chumyenejwethä altar: häp fwiyhol his, tenedores, pala lhayis, n'olhäthis, nilhokej m'ayhay tä õ'chumyenejwethä altar. Wet is chik hip'ajtitwek, wet ikäfwelej inätetas t'ähes, wet itihi hal'äy lew'etes yämthilek õtilhäj.

¹⁵ “Wet chik wak'alh nilhokej m'ayhay tä ot'amajchetes tä Aarón lhäy'e leles ikäfwnhen, wet wak'alh yämthilek õyikchufwi, is chik nämhen Coat leles yämthilek lhamel talhunej. Mat isit'ak itsok m'ayhay tä ot'amajchetes, häpkhilek n'ilahen. Nilhok m'ayhay tä oyämetso Coat leles t'at tä tilhäjla.

¹⁶ “Wet sacerdote Aarón lhäs Eleazar, häp tä itetshanhila häp aceite tä õ'tsäyhomchepej n'ochäkwis, lhäy'e incienso tä lenij akäjche, lhäy'e yachuyaj lhay tä is chik wichi yenpej otw'ayhata, lhäy'e aceite tä õ'tsäype m'ak chik õyen t'amajcheta. Häte is chik t'uye t'at owukwe lhäy'e nilhokej m'ayhay tä ichufwi tä õyen t'amajchetesa n'oyej.”

¹⁷ Lhawuk äp tahuyej Moisés lhäy'e Aarón wet yok:

¹⁸ –Isit'ak nofwej häp Coat leles

¹⁹ chik lhaitott'ayne m'ayhay tä ot'amajchetes. Tä mälhyejtso, is chik Aarón lhäy'e leles ifwenho elh weihalhapej lhamel häp m'ak tä is chik iwoye, lhäy'e m'ak tä is chik tilhäj.

²⁰ Häpkhilek ihanhiyejt'a chik lhaitott'ayne wet iyahin m'ayhay tä ot'amajchetes, wet tek y'inhihena.

M'ak tä õyen chumeta häp Leví lhayis tä tälhe letes Gersón

²¹ Lhawuk tahuyej Moisés wet yok:

²² –Wo t'ufwahtesa Leví lhayis tä tälhe letes Gersón, häp iyhäjpej tä lhalepuhfwas.

²³ Lesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä owukwe.

²⁴ “Wet Gersón leles lechumet tä iwoye häpe täja:

²⁵ Is chik tilhäj carpa tä owukwe, lhäy'e lep'ot, lhäy'e laka cortinas, lhäy'e lep'ot tä inätetas t'ähes, lhäy'e n'oyik tä lepe p'ot,

²⁶ lhäy'e wesas tä iche laka alho tä ilunejlhi owukwe lhäy'e altar, lhäy'e wesaj tä ihi alho lepe, lhäy'e niyhäy tä õ'chumyenwethä. Is chik Gersón leles yen chumeta nilhokej m'ayhayna,

²⁷ wet is chik Aarón lhäy'e leles lhayen lewuka. Is chik ifwenho lhamel m'ak tä is chik iwoye, lhäy'e m'ak tä is chik tilhäj. Amel t'at tä one'tek letetshan.

²⁸ Häp täjtso m'ak tä is chik Gersón leles iwoye tä ihi owukwe, wet is chik sacerdote Aarón lhäs tä lhey Itamar tä itetshan lhamel.

M'ak tä õyen chumeta häp Leví lhayis tä tälhe letes Merari

²⁹ “Häte wo t'ufwahtesa Leví lhayis tä tälhe letes Merari, häp iyhäjpej tä lhalepuhfwas.

³⁰ Lesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä owukwe.

³¹ Häp lhamel lechumet, is chik tilhäj owukwe laka tablas, lhäy'e lemäynhay, lhäy'e lech'utey, lhäy'e t'äsawetes,

³² lhäy'e letsutes tä ilunejlhi laka alho, lhäy'e t'äsawetes, lhäy'e chinhas tä t'akw'etes, lhäy'e niyhäy, lhäy'e nilhokej m'ayhay tä iyej tä õ'chumyenwethä. Is chik lefwenho elh weihalhapej hin'o m'ak tä is chik tilhäj.

³³ Häp täjtso m'ak tä is chik Merari leles iwoye tä ihi owukwe, wet is chik sacerdote Aarón lhäs tä lhey Itamar tä itetshan lhamel.”

Õ'wo t'ufwahtesa häp Leví lhayis

³⁴ Moisés lhäy'e Aarón lhäy'e wichi kaniyatey, lhamel iwo t'ufwahtesa häp wichi tä tälhe letes Coat, häp iyhäjpej tä lhalepuhfwas.

³⁵ Ilesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä Dios lewukwe.

³⁶ Wet iche dos mil setecientos cincuenta (2.750) lhamel.

³⁷ Häp tähestso Coat leles tä tach'ote Dios lechumet tä ihi carpa tä lewukwe. Moisés lhäy'e Aarón iwo t'ufwahtesa lhamel, mälhyej tä Lhawuk ne'tek iwoye.

³⁸ Wet äp lhamel iwo t'ufwahtesa wichi tä tälhe letes Gersón, häp iyhäjpej tä lhalepuhfwas.

³⁹ Ilesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä Dios lewukwe.

⁴⁰ Wet iche dos mil seiscientos treinta (2.630) lhamel.

⁴¹ Häp tähestso Gersón leles tä tach'ote Dios lechumet tä ihi carpa tä lewukwe. Moisés lhäy'e Aarón iwo t'ufwahtesa lhamel, mälhyej tä Lhawuk ne'tek iwoye.

⁴² Wet äp lhamel iwo t'ufwahtesa wichi tä tälhe letes Merari, häp iyhäjpej tä lhalepuhfwas.

⁴³ Ilesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä Dios lewukwe.

⁴⁴ Wet iche tres mil doscientos (3.200) lhamel.

⁴⁵ Häp tähestso Merari leles tä tach'ote Dios lechumet tä ihi carpa tä lewukwe. Moisés lhäy'e Aarón iwo t'ufwahtesa lhamel, mälhyej tä Lhawuk ne'tek iwoye.

⁴⁶ Tä mälhyejtso, Moisés lhäy'e Aarón, lhäy'e Israel lhayis kaniyatey, lhamel iwo t'ufwahtesa Leví lhayis, häp iyhäjpej tä lhalepuhfwas.

⁴⁷ Ilesayen lheyis hin'ol, lhamel tä hiw'en treinta nekchämis pajtha nichäte iyhäj tä hiw'en cincuenta nekchämis. Wok oyok, häp hin'ol tä takhajayhen wet ihan m'akejen, yämthilek tachumhilhi carpa tä Dios lewukwe.

⁴⁸ Wet tä nilhok, iche ocho mil quinientos ochenta (8.580) lhamel.

⁴⁹ Lhawuk t'at tä ne'tek Moisés iwo t'ufwahtesa wichi. Wet Moisés ifwenho elh weihalhapej m'ak tä is chik iwoye, lhäy'e m'ak tä is chik tilhäj, mälhyej tä Lhawuk ne'tek iwoye.