Números 33 - Biblia Wichi

Israel lhayis lew'ekyaj tä iwoye p'ante tälhe Egipto

¹ Israel lhayis yikch'oye p'ante honhat tä Egipto, iwo lew'ekyaja, wet honhatpej tä nichätho takasthi. Nifwotaj t'at lhamel, wet Moisés lhäy'e Aarón tä yikchufwi.

² Moisés ilesayenpej lhey honhat at chik häpe tä yikpejch'oye, mälhyej tä Lhawuk ne'tek iwoye. Wet honhat at chik häpek takasthipej häp tähesna:

³ Tä iwo tesa nekchäm, häp iwel'a tä ichun, häp ifwala quince, Israel lhayis yikch'oye Ramsés tä ihi Egipto. Häpe t'at ifwala tä tajyäme tä lhamel yenlhi Pascua. Wet lakhajyhayaj ihi tä yikhen, wet Egipto lheley hiw'en t'at.

⁴ Wet ifwalatso Egipto lheley tajänchech'oye leles tä lechunkatshay lep'itseyhay tä Lhawuk ilänhen. Häp täjtso tä Lhawuk iwoye yämthilek lhamel hiw'en tä lajit lahaya lhamel laka dios lhayis tä t'ekhaye.

Israel lhayis tälhe Ramsés pajtha nichäte ts'anis tä Sinaí

⁵ Israel lhayis yikch'oye p'ante Ramsés wet iwo lakasthawetahi Sukot.

⁶ Wet lhamel yikch'oye Sukot wet iwo lakasthawetahi Etam tä ihi ts'anis lhip.

⁷ Wet lhamel yikch'oye Etam wet tatsaye Pi-hahirot tä ihi Tafwojnhi Wuk lhip tä tumej hichä. Wet iwo lakasthawetawhäye Migdol.

⁸ Wet lhamel yikch'oye Pi-hahirot wet yistho Lewomekchät wet nichätho ts'anis. Wet tres ifwalas tä inukwe ts'anis tä Etam, wet iwo lakasthawetahi Mara.

⁹ Wet lhamel yikch'oye Mara wet nichäte Elim, häp honhat tä iche doce ts'ifwik lhayis lhäy'e setenta fwitsuk tä ihi. Wet häp tä iwo lakasthawetahi.

¹⁰ Wet lhamel yikch'oye Elim wet iwo lakasthawetawhäye Lewomekchät.

¹¹ Wet lhamel yikch'oye Lewomekchät wet iwo lakasthawetahi ts'anis tä lhey Sin.

¹² Wet lhamel yikch'oye ts'anis tä Sin wet iwo lakasthawetahi Dofka.

¹³ Wet lhamel yikch'oye Dofka wet iwo lakasthawetahi Alús.

¹⁴ Wet lhamel yikch'oye Alús wet iwo lakasthawetahi Refidim. Wet lhiptso ihichet'a inät yämthilek wichi iyäyej.

¹⁵ Wet lhamel yikch'oye Refidim wet iwo lakasthawetahi ts'anis tä Sinaí.

Israel lhayis tälhe ts'anis tä Sinaí pajtha nichäte Kadés

¹⁶ Wet lhamel yikch'oye p'ante ts'anis tä Sinaí wet iwo lakasthawetahi Kibrot-hataava.

¹⁷ Wet lhamel yikch'oye Kibrot-hataava wet iwo lakasthawetahi lhip tä lhey Alhotas.

¹⁸ Wet lhamel yikch'oye Alhotas wet iwo lakasthawetahi Ritma.

¹⁹ Wet lhamel yikch'oye Ritma wet iwo lakasthawetahi Rimón-peres.

²⁰ Wet lhamel yikch'oye Rimón-peres wet iwo lakasthawetahi Pelaj.

²¹ Wet lhamel yikch'oye Pelaj wet iwo lakasthawetahi Risá.

²² Wet lhamel yikch'oye Risá wet iwo lakasthawetahi Kehelata.

²³ Wet lhamel yikch'oye Kehelata wet iwo lakasthawetahi chenaj tä lhey Sefer.

²⁴ Wet lhamel yikch'oye chenaj tä Sefer wet iwo lakasthawetahi Harada.

²⁵ Wet lhamel yikch'oye Harada wet iwo lakasthawetahi lhip tä lhey Lhaihutwek.

²⁶ Wet lhamel yikch'oye Lhaihutwek wet iwo lakasthawetahi Honhat Pitoj.

²⁷ Wet lhamel yikch'oye Honhat Pitoj wet iwo lakasthawetahi Tara.

²⁸ Wet lhamel yikch'oye Tara wet iwo lakasthawetahi Hak'onek.

²⁹ Wet lhamel yikch'oye Hak'onek wet iwo lakasthawetahi Hasmona.

³⁰ Wet lhamel yikch'oye Hasmona wet iwo lakasthawetahi N'otasnhayajay.

³¹ Wet lhamel yikch'oye N'otasnhayajay wet iwo lakasthawetahi Jaakanlesw'et.

³² Wet lhamel yikch'oye Jaakanlesw'et wet iwo lakasthawetahi chenaj tä lhey Gidgad.

³³ Wet lhamel yikch'oye chenaj tä Gidgad wet iwo lakasthawetahi Jotbata.

³⁴ Wet lhamel yikch'oye Jotbata wet iwo lakasthawetahi Abrona.

³⁵ Wet lhamel yikch'oye Abrona wet iwo lakasthawetahi Esión-geber.

³⁶ Wet lhamel yikch'oye Esión-geber wet iwo lakasthawetahi ts'anis tä lhey Zin. Wok oyok, lhip tä lhey Kadés.

Israel lhayis tälhe Kadés pajtha nichäte Moab

³⁷ Israel lhayis yikch'oye Kadés wet iwo lakasthawetahi honhat tä chenaj tä lhey Hor ihi, häp honhat tä tatayhlä Edom.

³⁸ Wet Lhawuk ne'tek sacerdote Aarón iho'pe chenaj. Tä nichätpe, y'il. Häpe ifwala tä ichun, häp iwel'a cinco tä nech'e cuarenta nekchämis tälhe ifwala tä lhamel Israel lhayis yikch'oye honhat tä Egipto.

³⁹ Tä Aarón y'il tä i'pe chenaj Hor, hiw'en p'ante ciento veintitrés (123) nekchämis.

⁴⁰ Wet häp rey tä Canaán lhayis elh tä lew'et hupuy tä lhey Arad tä ihi honhat tä ts'anis tä lhey Négueb, lham ihanch'oye tä Israel lhayis nämhen.

⁴¹ Wet lhamel yikch'oye chenaj tä lhey Hor wet iwo lakasthawetahi Chalaj.

⁴² Wet lhamel yikch'oye Chalaj wet iwo lakasthawetahi Punón.

⁴³ Wet lhamel yikch'oye Punón wet iwo lakasthawetahi Obot.

⁴⁴ Wet lhamel yikch'oye Obot wet iwo lakasthawetahi Iye-abarim tä ihi lhip häp honhat tä Moab.

⁴⁵ Wet lhamel yikch'oye Iye-abarim wet iwo lakasthawetahi Dibón-gad.

⁴⁶ Wet lhamel yikch'oye Dibón-gad wet iwo lakasthawetahi Almón-diblataim.

⁴⁷ Wet lhamel yikch'oye Almón-diblataim wet iwo lakasthawetahi chenhas tä lhey Abarim, tä tatayhlä Nebo.

⁴⁸ Wet lhamel yikch'oye chenhas tä Abarim wet iwo lakasthawetahi honhat tä Moab lhip tä w'awulhchä tä tumej tewok Jordán lhip tä tatayhlä hupuy tä Jericó.

⁴⁹ Wet lhamel lakasthawet tä iwhäye tewok, wichi lhaipiyenche tälhe Bet-jesimot pajtha nichäte Abel-sitim tä ihi honhat tä Moab.

Lhawuk ifwenho Moisés m'ak tä is chik iwoye chik lham yachajehen honhates häp Israel lhayis

⁵⁰ Lhawuk tahuyej Moisés tä ihi honhat tä Moab lhip tä w'awulhchä tä tumej tewok Jordán lhip tä tatayhlä Jericó. Wet Lhawuk yok:

⁵¹ –Fwenho Israel lhayis olhämetna, oyok, “Chik amel lhistho Jordán wet letiyäjayho honhat tä Canaán,

⁵² okweschephäla nilhokej wichi tä ihi, wet wasthichela nilhokej laka dios lhayis tä takwey lhenhay tä tuntey wok chinaj. Wet häte wasthichela nilhokej n'on'okhayajw'etes tä iche'pe chenhas.

⁵³ Oyok, kalhayhi wet enayla haw'eta honhattso, tsi olham tä ow'en amhohen yämthilek lheyayhi.

⁵⁴ Amel tä letälhehen atetsel tä ihi doce, wola sorteaya chik lew'en amhomche. Wet nech'e iyhäjpej iwohla sorteaya yämthilek hiw'enhomche laka wichi. Iyhäj tä wuj w'awlhatej honhat, wet iyhäj tä niwuja häte w'awlhatej t'at. Nilhokej wichi ikathiyeja m'ak chik suerte tajej.

⁵⁵ “Mat chik amel ka'okwesa wichi tä ihi honhat, lhamel tä imälhehi ailhaklitla chik lefwetajay lhen haw'eta häp honhat. Lhamel tehlat iwoye hal'ä lhip chik ihi atelho, tehlat iwoye ch'uthanil chik ihi asan.

⁵⁶ Wet chik mälhhiyejatso, m'ak tä ot'uhläk owoyeje lhamel amenlak owoyej amehen.”