Números 3 - Biblia Wichi

M'ak tä Leví lhayis lechumtes

¹ Häp täja lheyis wichi tä tälhe lechätilis Aarón lhäy'e Moisés häp ifwalas p'ante Lhawuk tahuyej Moisés tä i'pe chenaj Sinaí.

² Aarón leles häpehen Nadab tä häpe elh tä n'ochunkatsek, wet lech'inhis Abihú, lhäy'e Eleazar, lhäy'e Itamar.

³ Cuatro lhamel tä õyen Lhawuk t'amajchetesa, wet õhw'enho lhamel yämthilek iwoye sacerdotes lechumet.

⁴ Matkat Nadab lhäy'e Abihú y'inhen p'ante tä ihi tä Lhawuk tatache. Tä lhamel ihi p'ante ts'anis tä Sinaí, lhamel iwun m'ak tä lenij akäjche, wet wuj tä iwäkyhayen häp Lhawuk tä kalhämetayej lhamel. Wet lhameltso newache leles. Tä mälhyejtso, Eleazar lhäy'e Itamar iwoye lechumet tä häpehen sacerdotes, wet Aarón lhamel lajcha häp tä itetshan lhamel.

⁵ Wet Lhawuk tahuyej Moisés wet yok:

⁶ –Äne Leví lhayis yämthilek iwoye sacerdote Aarón lhämet wet tach'ote.

⁷ Is chik iwoye lechumet tä ihi carpa tä owukwe, yämthilek tach'ote Aarón lhäy'e wichi.

⁸ Is chik t'uye m'ayhay tä ichufwi owukwe wet tach'ote Israel lhayis.

⁹ W'enhola Leví lhayis häp Aarón, wet lhachaje lechumet tä tach'ote Aarón lhäy'e leles tä lepes lheley.

¹⁰ Wet tihila Aarón takwey häp sacerdote lechumet, lhäy'e leles. Mat elh chik kahäpeya sacerdote, chik yenlhi sacerdote lechumet, letes ihi wet iwohiyet'ak õkniläna.

Leví lhayis Lewuk häp Dios

¹¹ Lhawuk tahuyej Moisés wet yok:

¹² –Olham ottshupiyehen Leví lhayis tä lhayej Israel lhayis tä oyen lahaya Israel lhayis leles hin'ol tä lechunkatshay. Olewuk t'at Leví lhayis,

¹³ tsi nilhokej nä'tshas tä n'ochunkatshay Olewuk t'at. Tä olänhente Egipto lheley leles tä lechunkatshay, oyen at t'amajcheta Israel leles tä lechunkatshay lhäy'e leläy tä lechunkatshay. Olewuk t'at. Ohäpe Dios tä matche.

Õ'wo t'ufwahtesa Leví lhayis

¹⁴ Lhawuk tahuyej Moisés tä ihi ts'anis tä Sinaí, wet yok:

¹⁵ –Wo t'ufwahtesa Leví lhayis. Lesayen lheyis lajchalis lhäy'e leles, häp iyhäjpej tä lhalepuhfwas. Lesayen lheyis häp nilhokej hin'ol, tälhe elh tä hiw'en iwel'a weihalha lhäy'e iyhäj tä thänhäy.

¹⁶ Wet Moisés iwoye, iwo t'ufwahtesa wet ilesayen lheyis, mälhyej tä Lhawuk ne'tek iwoye.

¹⁷ Häp tähesna Leví leles lheyis: Gersón, Coat, lhäy'e Merari.

¹⁸ Wet Gersón leles häpehen Libni lhäy'e Simey, wet wujpey wichi tä tälhe.

¹⁹ Wet Coat leles häpehen Amram, Ishar, Hebrón, lhäy'e Uziel, wet wujpey wichi tä tälhe.

²⁰ Wet Merari leles häpehen Mahli lhäy'e Musi, wet wujpey wichi tä tälhe. Häp tähestso Leví leles, häp iyhäjpej tä lhalepuhfwas.

²¹ Gersón leles häpehen Libni lhäy'e Simey, wet wujpey wichi tä tälhe.

²² Wet tä nilhok hin'ol, tälhe tä hiw'en iwel'a weihalha lhäy'e iyhäj tä thänhäy, iche siete mil quinientos (7.500).

²³ Wet wichitso iti w'echehi lakasthawet häp carpa tä Lhawuk lewukwe lhip tä tumej tä ifwala y'uy.

²⁴ Lhamel laka niyat häpe Eliasaf, Lael lhäs.

²⁵ Wet õy'uhyene lhamel häp carpa tä Dios lewukwe, lhäy'e lep'ot, lhäy'e n'oyik tä lepe p'ot,

²⁶ lhäy'e wesas tä iche laka alho tä ilunejlhi häp Dios lewukwe lhäy'e altar, lhäy'e wesaj tä ihi alho lepe, lhäy'e niyhäy tä õ'chumyenwethä.

²⁷ Wet Coat leles häpehen Amram, Ishar, Hebrón, lhäy'e Uziel, wet wujpey wichi tä tälhe.

²⁸ Wet tä nilhok hin'ol, tälhe tä hiw'en iwel'a weihalha lhäy'e iyhäj tä thänhäy, iche ocho mil trescientos (8.300). Wet õy'uhyene lhamel häp Dios lew'et lhip tä T'amajchet,

²⁹ wet itihi lakasthawet häp carpa tä Dios lewukwe lhip tä tapinhiye.

³⁰ Lhamel laka niyat häpe Elisafán, Uziel lhäs.

³¹ Wet õy'uhyene lhamel häp Arca tä N'ot'amajchet tä Dios lhämtes ihi, lhäy'e mesa, lhäy'e n'ochäkwhis, lhäy'e altares, lhäy'e m'ayhay tä n'ot'amajchetes tä õhch'otyeneje Dios lechumet, lhäy'e sak'al tä tumejlä Dios lewukwech'o tä N'ot'amajchet tä Lhamya, lhäy'e nilhokej m'ayhay tä õ'chumyenwethä.

³² Häp sacerdote Aarón lhäs tä lhey Eleazar, häp tä Leví lhayis kaniyat, wet itetshan lhamel tä t'uye Dios lew'et.

³³ Wet Merari leles häpehen Mahli lhäy'e Musi, wet wujpey wichi tä tälhe.

³⁴ Wet tä nilhok hin'ol, tälhe tä hiw'en iwel'a weihalha lhäy'e iyhäj tä thänhäy, iche seis mil doscientos (6.200).

³⁵ Lhamel laka niyat häpe Suriel, Abihail lhäs, wet lhamel itihi lakasthawet häp carpa tä Dios lewukwe lhip tä tafwojnhiye.

³⁶ Wet õy'uhyene lhamel Dios lewukwe laka tablas, lhäy'e lemäynhay, lhäy'e lech'utey lhäy'e t'äsawetes, lhäy'e nilhokej m'ayhay tä iyej tä õ'chumyenwethä,

³⁷ lhäy'e letsutes tä ilunejlhi laka alho, lhäy'e t'äsawetes, lhäy'e chinhas tä t'akw'etes, lhäy'e niyhäy.

³⁸ Wet lhip tä tumej hichä tä ifwala tälhche tä tatayhlä carpa tä Dios lewukwe, häp tä Moisés lhäy'e Aarón, lhäy'e Aarón leles, lhamel itihi lakasthawet. Wet lhamel itetshan Dios lechumet tä ihi lewukwe yämthilek Israel lhayis isej. Wet elh chik kahäpeya sacerdote, chik yenlhi sacerdote lechumet, letes ihi wet iwohiyet'ak õkniläna.

³⁹ Tä mälhyejtso, Moisés lhäy'e Aarón iwo t'ufwahtesa häp Leví lhayis, häp iyhäjpej tä lhalepuhfwas, mälhyej tä Lhawuk ne'tek lhamel iwoye. Wet tä nilhok hin'ol, tälhe tä hiw'en iwel'a weihalha lhäy'e iyhäj tä thänhäy, iche veintidós mil (22.000).

Õyen lahaya Leví lhayis häp Israel leles tä lechunkatshay

⁴⁰ Lhawuk tahuyej Moisés wet yok: –Wo t'ufwahtesa Israel lhayis leles tä lechunkatshay tä hin'ol, tälhe tä hiw'en iwel'a weihalha, wet lesayen lheyis.

⁴¹ Wet en lahaya Leví lhayis wet en amajcheta n'oyej yämthilek Olewuk t'at. Ohäpe Dios tä matche. Häte lhamel leläy tä lechunkatshay, en lahaya Leví lhayis leläy wet en amajcheta n'oyej yämthilek Olewuk t'at.

⁴² Wet Moisés iwo t'ufwahtesa Israel lhayis leles tä lechunkatshay, mälhyej tä Lhawuk ne'tek iwoye.

⁴³ Wet tä nilhokej häp hin'ol tä n'ochunkatshay tä õ'lesayen lheyis, tälhe han'äfwaj tä hiw'en iwel'a weihalha, iche veintidós mil doscientos setenta y tres (22.273).

⁴⁴ Wet Lhawuk tahuyej Moisés wet yok:

⁴⁵ –Chuma Leví lhayis tä Israel lhayis leles tä lechunkatshay laha, lhäy'e Leví lhayis leläy tä Israel lhayis leläy laha. Leví lhayis Olewuk t'at. Ohäpe Dios tä matche.

⁴⁶ Mat häp Israel lhayis leles tä lechunkatshay wujpey, inu'pe Leví lhayis. Wet imälhehi doscientos setenta y tres (273), wet Leví lhayis w'awulhiyejt'a tä õtiskanejpe elh weihalhapej.

⁴⁷ Tä mälhyejtso, alhe elh weihalhapej häp hin'ol tä imälhehi, is chik iwom letape cinco chinaj t'äj. Chumyenlhi chinaj t'äj tä sacerdotes ichumyenlhi.

⁴⁸ Wet chinaj t'äjtso w'enhola Aarón lhäy'e leles, häp Israel leles tä imälhehi laha.

^49-50 Tä mälhyejtso, Moisés ihutwek chinaj t'äj tä laha Israel lhayis leles tä lechunkatshay tä imälhehi. Tä lhamel tiskan letapehen, ichumyenlhi chinaj t'äj tä sacerdotes ichumyenlhi. Wet iche mil trescientos sesenta y cinco (1.365) chinaj t'äj tä õ'hutwek.

⁵¹ Wet Moisés hiw'enho häp Aarón lhäy'e leles, mälhyej tä Lhawuk ne'tek iwoye.