Números 27 - Biblia Wichi

Õhw'enho honhat häp Zelofehad leles tsinhay

¹ Iche cinco atsinhay tä lhalepuhfwas tä iyej wichi tä tälhehen letes Manasés. Lhamel lheyis Mahla, Noa, Hogla, Milca, lhäy'e Tirsa. Atsinhayna häpehen hin'o tä lhey Zelofehad leles tsinhay tä tälhe t'at letetsel Hefer, Galaad, Maquir, Manasés, lhäy'e José.

² Wet iche ifwala tä atsinhayna ihoye carpa tä Lhawuk lew'et wet iwhäye lepe. Tsi lhamel t'uhläk tahuyej Moisés, lhäy'e sacerdote Eleazar, lhäy'e wichi kaniyatey, tä ihi tä nilhokej wichi tä Israel lhayis tatache. Tä lhamel nichäte, wet yok:

³ –Olhamel ojcha y'ilte tä ihi honhat tä ts'anis. Tek lhay'ajehte häp wichi tä lhaip'ajtej Coré tä tatayhlä Lhawuk. Mat lham t'at tä tamen lhamej tä y'il, tet iwoye iyhäj Israel lhayis tä y'inhen. Wet ihichet'a leles tä hin'ol.

⁴ Mat t'uhawethiyejt'a chik tatäy lhey ojcha tä iyej iyhäj, tej tä newache lhäs tä hin'o. W'en n'ohohen lhip honhat tä olhamel tä oatsinhay tä oiyej ojcha lepuhfwas.

⁵ Wet Moisés ifwenho Lhawuk häp atsinhay letichunhayaj.

⁶ Wet Lhawuk nichulho wet yok:

⁷ –Matche t'at Zelofehad leles tsinhay lhämet. Is chik lew'enho lhamel häp lajcha laka honhat yämthilek lewuhuy t'at, mälhyej tä lajcha lepuhfwas laka honhates ihiche.

⁸ Häte fwenho Israel lhayis, Chik elh y'il wet newache lhäs tä hin'o, laka honhat lewuk t'at lhäse chik iche.

⁹ Wet chik äp newache lhäse, honhat tä lewuk is chik õhw'enho lech'inhis chik iche.

¹⁰ Wet chik äp newache lech'inhis, laka honhat lewukla lewithohoy.

¹¹ Wet chik newache lewithohoy, laka honhat lewukla elh tä lhamel elh t'at. Häp täja olhämet tä kalelhäj tä one'tek Israel lhayis iwoye, mälhyej tä ofwel amho.

Dios tatshupiye Josué yämlek icheyäjo Moisés lew'et

¹² Lhawuk tahuyej Moisés wet yok: –Ho'pe chenajni tä ihi Abarim, wet yahne honhat tä ow'enho Israel lhayis.

¹³ Wet chik leleyej tä leyahne, let'inla yämthilek lehoye achätilis, mälhyej tä achila Aarón y'il naji wet ihoye lechätilis.

¹⁴ Tsi tä Israel lhayis ihinaj Meriba, häp Kadés lhip tä ihi ts'anis tä lhey Zin, lhamel t'alhe inät wet iwoyej n'oye lhämtes tä tatay n'ohlä. Wet häp tä am lhäy'e achila Aarón lewohiyet'a m'ak tä one'tek lewoyaye. Wet Israel lhayis hiw'en tä lhenayn'o w'et m'ayeka, tek lhenayn'o häpeya N'ot'amajchet.

¹⁵ Wet Moisés tahuyej Lhawuk wet yok:

¹⁶ –Iwuk Dios, am tä lewo lew'atshancheyaja nilhokej wichi. Tshupyene elh chik häpe wet en niyata, yämthilek itetshan häp aka wichina

¹⁷ wet yikchufwi lhamel, häpkhilek niteya iwoye tson'ataspej laj lewoya.

¹⁸ Lhawuk nichulho wet yok: –Josué, Nun lhäs, häpe hin'o tä lehusek ihi. Chuma wet ti'pe akweyey häp lhetek,

¹⁹ wet hänela sacerdote Eleazar lhäy'e nilhokej wichi, yämthilek lhamel hiw'en tä lhachaje lechumet.

²⁰ Wet w'enhola lhip han'ohyaj yämthilek nilhokej Israel lhayis iwoye lhämet.

²¹ Mat chik t'upejläk ihanej m'ak tä olham onech'ethayaj, is chik ihoyepej sacerdote Eleazar, wet lham tay'ätshanhila n'oye häp tä isej n'okalelhthayajchal tä lhey Urim. Häpkhilek Josué ifwenhopej Israel lhayis häp m'ak tä is chik lhamel iwoye.

²² Wet Moisés iwoye m'ak tä Lhawuk ne'tek iwoye. Tachuma Josué wet ihäne sacerdote Eleazar, wet itihi tä nilhokej wichi tatache.

²³ Wet iti'pe takweyey häp lhetek, wet yachaje lechumet, mälhyej tä Lhawuk ifwenho Moisés tä ne'tek iwoye.