Números 26 - Biblia Wichi

Yachajo tä õ'wo t'ufwahtesa Israel lhayis

¹ Tä tajyäme m'ak tä ilänhen wichi, Lhawuk tahuyej Moisés lhäy'e sacerdote Eleazar, Aarón lhäs, wet yok:

² –Wo t'ufwahtesa Israel lhayis. Lesayen nilhokej lheyis iyhäjpej tä lhalepuhfwas, tälhe lhamel tä hiw'en veinte nekchämis, lhäy'e iyhäj tä laka nekchämis inu'pe veinte, häp lhamel tä takhajayhen yämthilek iwo laka'tshayaja.

^3-4 Wet Israel lhayis ihi honhat tä Moab lhip tä w'awulhchä tä tumej tewok Jordán lhip tä tatayhlä hupuy tä Jericó. Wet Moisés lhäy'e Eleazar ne'tek õ'lesayen lheyis nilhokej hin'ol tä hiw'en veinte nekchämis, lhäy'e iyhäj tä laka nekchämis inu'pe veinte, mälhyej tä Lhawuk ne'tek Moisés iwoye. Häp tähesna häp Israel lhayis p'ante tälho honhat tä Egipto:

^5-6 Iche wichi tä tälhehen letetsel p'ante lheyis Enoc, Falú, Hesrón, lhäy'e Carmi, tä häpehen Rubén leles. Rubén häpe Jacob lhäs tä lechunkatsek p'ante.

⁷ Wet tä nilhok Rubén kawichi, iche cuarenta y tres mil setecientos treinta (43.730) hin'ol.

⁸ Falú iwo lhäsa wet lhey Eliab,

⁹ wet Eliab leles lhey Nemuel, Datán, lhäy'e Abiram. Wet Datán lhäy'e Abiram häpe p'ante consejeros tä tatayhlä Moisés lhäy'e Aarón, wet lhaip'ajtej Coré wet tatayhlä Lhawuk.

¹⁰ Mat honhat tatoy wet lhameltso tiyäjche chowej, lhäy'e Coré, lhäy'e lhamel laka wichi, wet tatäy. Häte doscientos cincuenta (250) hin'ol tä itäj hip'ohen. Lhawuk ipäyne täjtso Israel lhayis yämthilek lhamel nowaye.

¹¹ Mat häp Coré leles y'inhihent'a p'ante.

^12-13 Wet iche wichi tä tälhehen letetsel p'ante lheyis Nemuel, Jamín, Jaquín, Zera, lhäy'e Saúl, tä häpehen Simeón leles.

¹⁴ Tä nilhok, iche veintidós mil doscientos (22.200) hin'ol.

^15-17 Wet iche wichi tä tälhehen letetsel p'ante lheyis Sefón, Hagui, Suni, Ozni, Eri, Arod, lhäy'e Areli, tä häpehen Gad leles.

¹⁸ Tä nilhok, iche cuarenta mil quinientos (40.500) hin'ol.

^19-20 Wet iche wichi tä tälhehen letetsel p'ante lheyis Sela, Fares, lhäy'e Zera, tä häpehen Judá leles. Häp Judá leles iyhäj tä lheyis Er lhäy'e Onán lhamel y'inhen p'ante tä ihi honhat tä Canaán.

²¹ Wet Fares kawichi letetsel häpehen Hesrón lhäy'e Hamul.

²² Wet tä nilhok Judá kawichi, iche setenta y seis mil quinientos (76.500) hin'ol.

^23-24 Wet iche wichi tä tälhehen letetsel p'ante lheyis Tola, Puvá, Jasub, lhäy'e Simrón, tä häpehen Isacar leles.

²⁵ Tä nilhok, iche sesenta y cuatro mil trescientos (64.300) hin'ol.

²⁶ Wet iche wichi tä tälhehen letetsel p'ante lheyis Sered, Elón, lhäy'e Jahleel, tä häpehen Zabulón leles.

²⁷ Tä nilhok, iche sesenta mil quinientos (60.500) hin'ol.

²⁸ Wet iche wichi tä tälhehen letetsel p'ante lheyis Manasés lhäy'e Efraín tä häpehen José leles.

²⁹ Manasés lhäs häpe Maquir, wet Maquir lhäs Galaad,

^30-32 Wet iche wichi tä tälhe hin'otso Galaad tä lhamel letetsel lheyis Jezer, Helec, Asriel, Sikem, Semida, lhäy'e Hefer.

³³ Wet hin'o tä lhey Zelofehad tä Hefer lhäs, leles ihichet'a, tajlhama leles tsinhay. Wet lheyis Mahla, Noa, Hogla, Milca, lhäy'e Tirsa.

³⁴ Tä nilhok Manasés kawichi, iche cincuenta y dos mil setecientos (52.700) hin'ol.

³⁵ Wet iche wichi tä tälhehen letetsel p'ante lheyis Sutela, Bequer, lhäy'e Tahán, tä häpehen Efraín leles.

³⁶ Wet Sutela kawichi letes häpe Erán.

³⁷ Tä nilhok Efraín kawichi, iche treinta y dos mil quinientos (32.500) hin'ol. Häp tähestso José kawichi tä tälhehen letetsel.

^38-39 Wet iche wichi tä tälhehen letetsel p'ante lheyis Bela, Asbel, Ahiram, Sufam, lhäy'e Hufam, tä häpehen Benjamín leles.

⁴⁰ Wet Bela kawichi letetsel häpehen Ard lhäy'e Naamán, häp tä lhamel lajcha Bela.

⁴¹ Tä nilhok Benjamín kawichi, iche cuarenta y cinco mil seiscientos (45.600) hin'ol.

⁴² Wet iche wichi tä tälhe letes p'ante lhey Suham tä häpe Dan lhäs.

⁴³ Tä nilhok Suham kawichi, iche sesenta y cuatro mil cuatrocientos (64.400) hin'ol.

⁴⁴ Wet iche wichi tä tälhehen letetsel p'ante lheyis Imna, Isuy, lhäy'e Bería, tä häpehen Aser leles.

⁴⁵ Wet Bería kawichi letetsel Heber lhäy'e Malquiel.

⁴⁶ Wet Aser lhäse iche tä lhey Sera.

⁴⁷ Tä nilhok Aser kawichi, iche cincuenta y tres mil cuatrocientos (53.400) hin'ol.

^48-49 Wet iche wichi tä tälhehen letetsel p'ante lheyis Jahseel, Guni, Jezer, lhäy'e Silem, tä häpehen Neftalí leles.

⁵⁰ Tä nilhok, iche cuarenta y cinco mil cuatrocientos (45.400) hin'ol.

⁵¹ Wet tä nilhok Israel lhayis tä õ'lesayen lheyis, iche seiscientos un mil setecientos treinta (601.730) hin'ol.

Häp täja lakeyis honhat tä Israel lhayis hiw'en lhamhomche

⁵² Lhawuk tahuyej Moisés wet yok:

⁵³ –Is chik lew'enhomche honhat häp wichina. W'awlhateja wichipej tä wujpe wok niwuja'pe, mälhyej tä ihi lehi tä õ'lesayen.

⁵⁴ Wichi tä wujpe is chik lhäm wuj honhat tä lew'enho. Wet iyhäj chik niwuja'pe is chik wujit'a honhat chik lew'enho.

⁵⁵ Mat wola sorteaya chik lew'enhomche honhat, yämthilek iyhäjpej ikathiyeja honhat tä lewuhuy.

⁵⁶ Wola sorteaya chik lew'enhomche honhat häp wichi, häp iyhäj tä wujpe lhäy'e iyhäj tä niwuja'pe.

Õ'wo t'ufwahtesa Leví lhayis

⁵⁷ Wet Leví lhayis tä õ'lesayen lheyis, letetsel häpehen Gersón, Coat, lhäy'e Merari.

⁵⁸ Wet lhamel tä tälhe letetsel Libni, Hebrón, Mahli, Musi, lhäy'e Coré, nilhokej häpehen t'at Leví lhayis. Coat lhäs Amram,

⁵⁹ wet Amram yen ch'efwaya p'ante Leví lhäse tä lhey Jocabed. Lham nichätchä p'ante tä Leví ihi Egipto. Amram lhäy'e Jocabed häp tä leles Aarón, Moisés lhäy'e Miriam.

⁶⁰ Wet Aarón leles häpehen Nadab, Abihú, Eleazar, lhäy'e Itamar.

⁶¹ Nadab lhäy'e Abihú y'inhen p'ante tä iwunhen m'ak tä lenij akäjche tä Lhawuk kalhämetayej.

⁶² Tä nilhok hin'ol tä Leví lhayis, tälhe elh tä hiw'en iwel'a tefwajni pajtha nichäte iyhäj tä thänhäy, iche veintitrés mil (23.000). Lhamelna lheyis ihiyejt'a iyhäj Israel lhayis lheyis tä õ'lesayen, tsi tek õhw'enhomche honhat tä lewuhuy.

⁶³ Häp täjtso tä nilhok Israel lhayis tä Moisés lhäy'e sacerdote Eleazar iwo t'ufwahtesa, tä lhamel ihi p'ante honhat tä Moab lhip tä w'awulhchä tä tumej tewok Jordán lhip tä tatayhlä hupuy tä Jericó.

⁶⁴ Mat häp iyhäj p'ante Moisés lhäy'e Aarón ilesayen tä ihi ts'anis tä Sinaí, niwohit elh lhamel chik imälhehi.

⁶⁵ Tsi pajche y'inhen t'at tä ihi ts'anis, mälhyej tä Lhawuk yäme tä yok, “Y'inhihena.” Tajlhama Caleb, Jefone lhäs, lhäy'e Josué, Nun lhäs, häp lhamelna tä n'ilahen p'ante.