Números 22 - Biblia Wichi

Balac iwo chenekaye Balaam yämthilek ihoye

¹ Israel lhayis tujlhache len'äyij, wet iwo lakasthawetahi honhat tä Moab lhip tä w'awulhchä tä tumej tewok Jordán lhip tä tatayhlä hupuy tä Jericó.

² Wet Moab lheley laka rey tä lhey Balac, tä lajcha lhey Sipor, lham ihanej m'ak tä Israel lhayis iwoyeje Amorreo lhayis.

³ Wet wichi tä ihi Moab wuj tä lenowayhyaj ihi, tsi wujpey Israel lhayis.

^4-5 Wet lhamel tahuyej hin'ol tä thänhäy tä ihi Madián wet yok: –Wichitso ihämthila lhaka honhat, tehlat iwoye w'asetas chik tufw hup, noj t'at. Tä mälhyejtso, rey Balac iwo chenekaye hin'o tä lhey Balaam, Beor lhäs, t'uhläk ihoye. Balaam ihi lhip tä lhey Petor tä iwhäye tewokitaj Éufrates tä ihi honhat tä lhey Amaw. Wet Balac ne'tek lakachenhay ifwenho Balaam wet yok: –Iche wichi tä tälhe Egipto wet inukwe imälhewek honhat, wet athana tott'aye olhamel oka honhat.

⁶ Is chik Balaam iho n'oye'thahya yämthilek takäpfwayeje m'ak tä ni'isa häp wichitso. Tsi wuj tä takhajayhen, inu'pe olhamel. Wet chik takäpfwayeje m'ak tä ni'isa lhamel, okalhihila wet oyokwesila tä ihi oka honhat. Tsi ohanej tä lakäpfwayajay tä isen lhäy'e tä ni'isahen n'älpej.

Dios n'äyejo Balaam chik ihoye Balac

⁷ Wet hin'ol tä thänhäy tä ihi Moab, lhäy'e tä ihi Madián, lhamel yikhen wet ichäj chinaj t'äj tä t'uhläk tiskanejpe n'okäpfwayajay tä ni'isa. Wet tä lhamel nichäte Balaam, ifwenho Balac lhämet.

⁸ Wet Balaam tahuyej lhamel wet yok: –Eyay kana honatsina, wet ofwenla amhohen m'ak chik Owuk Dios ne'tek owoye. Wet hin'oltso iyej t'at honatsitso.

⁹ Mat Dios lhain'ältej Balaam wet tay'ätshane tä yok: –¿Atsi tä häpehen hin'ol tä i'amej?

^10-11 Balaam nichulho wet yok: –Balac, Sipor lhäs tä häpe rey tä ihi Moab, häp tä ichen n'oye hin'olna yämthilek ifwel n'oho tä ichepa wichi tä tälhe Egipto wet inukwe mälhewek honhat. Häp tä Balac ne'tek ohoye'thahya yämthilek otkäpfwayeje m'ak tä ni'isa häp wichitso. Elat lham ikalhi wet yokwes tä ihi lham laka honhat.

¹² Wet Dios ifwenho Balaam wet yok: –Yej lhekche hin'olna. Wet yej takäpfwayeje m'ak chik ni'isa häp wichitso, tsi olham tä otkäpfwayeje m'ak tä is häp lhamel.

¹³ Wet tä nech'e fwala Balaam nephä, wet ifwenho niyatey tä Balac kachenhay wet yok: –Mähen t'at, äple aka honhat. Owuk Dios ihumnhichet'a chik oyik amchehen.

¹⁴ Wet niyatey tä tälhe Moab yikhen tä yäple Balac. Tä lhamel nichäte, ifwenho wet yok: –Balaam nekhit'a.

Dios tach'anlhaye Balaam

¹⁵ Balac inityen wet ichen wujpe iyhäj niyatey tä lhäy'e lhip tä len'ohyajay ihi.

¹⁶ Lhamel ihoye Balaam, tä nichäte wet yok: –Sipor lhäs Balac tä häpe rey ichen ame lhämet tä ne'tek ofwel amho tä yok, “Woye tä owoye, yej fwun n'oye, ho n'oye.”

¹⁷ Balac hiw'enla amho han'ohyaj tä wuj wet iwohiyela m'ak at chik häpek let'alheje. Mat is chik lehoye wet käpfwayeje m'ak tä ni'isa häp wichitso.

¹⁸ Mat Balaam nichulho Balac kachenhay wet yok: –Tej chik Balac hiw'en n'oho nilhok oro lhäy'e plata tä tapoyejej lewukwe, okalhihit'ak owoye m'ak chik tatayhlä Owuk Dios, wuj wok niwuja. Ts'ilak owoyet m'ak tä lham ne'tek owoye.

¹⁹ Honatsina yej lhekhen. Otetshanhila m'ak chik Owuk Dios ne'tek owoye.

²⁰ Tä honatsi Dios lhain'ältej Balaam wet tahuyej tä yok: –Tä hin'olna nek ame, is chik lhekche t'at lhamel. Mat ts'ilak m'ak chik olham ofwenla amho chik lewohiyela.

Balaam lew'ute asno tahuy

²¹ Tä nech'e fwala Balaam nephä, wet yenlhi lew'ute asno wet yikche Moab lhayis kaniyatey.

²² Balaam i'pe asno wet lakawos yikche. Mat Dios lewäk ihi tä lham yik, wet laka ángel inuhlä len'äyij wet tek iwahintshi.

²³ Wet tä lew'ute asno hiw'en Lhawuk laka ángel tä takasthi n'äyij tä ichäjlhi lefwajnhat, yikch'oye n'äyij wet tiyäjche n'äyij lhip. Mat Balaam itasin asno tä t'uhläk yäpnho n'äyij.

²⁴ Wet Lhawuk laka ángel yachajo tä ichunlä lhamel, wet takasthi n'äyij tä nitsajache tä inukwe lechowej n'olafwey tä tuntey.

²⁵ Wet tä asno hiw'en Lhawuk laka ángel, lhaithatej n'olafwek wet hip'ajtit Balaam lheche. Wet Balaam yachajo tä y'aj asno.

²⁶ Wet Lhawuk laka ángel yachajo tä ichunlä lhamel, wet takasthi n'äyij tä nitsajache, wet len'äyij ihihit'a chik fwetaj tatsayej kanhi.

²⁷ Tä asno hiw'en Lhawuk laka ángel, lhaithat katsi. Wet Balaam wuj tä fwitsaj wet ipäjlhi asno.

²⁸ Wet nech'e Lhawuk yämyenlhi asno, wet tahuyej Balaam wet yok: –¿Atsi m'ak tä ni'isa tä owoyej ame? Athana tres veces tä let'ajn'o.

²⁹ Balaam nichulho wet yok: –Häp tä leläkwlhin'o. Chik tsonhat ihihi otkwey, oailän t'at athana.

³⁰ Mat asno yok: –Pajchey tä haw'uten'o, wet am lehanej tä ihichet'a ifwalak owoyej ame m'ak tä mälhyejna. Balaam nichulho wet yok: –Matche.

³¹ Wet Lhawuk ifwoyenpe Balaam tatey, wet hiw'en ángel tä ihi n'äyij tä lefwajnhat ihi takwey. Wet Balaam t'upeyhchä pajtha letacho taji honhat.

³² Mat Lhawuk laka ángel tahuyej wet yok: –¿Chipte tä let'aj tres veces haw'ute? Olham tä n'am wo han'äyija, tsi isit'a haw'ekyaj tä lewoyena.

³³ Asno hiw'enn'o wet tres veces tä tatsay. Wet chik nittsayhiya, pajche oailän t'at, mat tek olänhin'e asno.

³⁴ Balaam nichulho Lhawuk laka ángel wet yok: –Och'isukyaj ihi. Ohanhiyejt'a tä am t'at tä lhehi on'äyij wet kawoya on'äyija. Chik ni'isa tä oyik, oyäpnhen t'at.

³⁵ Mat Lhawuk laka ángel yok: –Mäkwe t'at hin'oltsi, mat ts'ilak m'ak chik olham ofwel amho chik lewohiyela. Balaam yikche t'at häp niyatey tä Balac kachenhay.

Balac yistejlä Balaam

³⁶ Wet tä Balac ihanej tä Balaam ihoye, lham yistejlä tä ihi hupuy tä ihi Moab tä iwhäye tewok tä lhey Arnón tä häpe laka honhat lepes.

³⁷ Wet tahuyej tä yok: –Owonaj cheneka ame. ¿Chipte tä kat'uyahläk leho n'oye? ¿Hä lefwetaj n'am hanej owoyneje yämthilek ow'en amho han'ohyaj tä wuj?

³⁸ Balaam nichulho wet yok: –Is t'at, onäm. Mat tek oyämhiyela m'ak tä olham ohuminche. M'ak chik Dios ifwenla n'oho, häpkhilek oyäme.

³⁹ Wet nech'e Balaam yikche Balac tä ihoye hupuy tä lhey Husot.

⁴⁰ Wet Balac ne'tek õ'länhen w'asetas lhäy'e tson'atas, wet hiw'enho t'isan lhipey häp Balaam lhäy'e niyatey tä nekche.

Balaam takäpfwayeje m'ak tä is häp Israel lhayis

⁴¹ Wet tä ifwala elh tä nech'e fwala, Balac yikchufwi Balaam wet ihänpe lhip tä lhey N'owuk Kachenhas, häp lhip tä n'äle t'at häp Israel lhayis.