Números 19 - Biblia Wichi

W'asetaj tä lew'ole ichät

¹ Lhawuk tahuyej Moisés lhäy'e Aarón wet yok:

² –Olham tä Awukn'o ow'en amhohen olhämetna. Fwenho Israel lhayis, Is chik ichäj ame w'asetaj tä lew'ole ichät tä wuj tä is, wet newache m'ak chik iyej, wet kan'ochumyeneka.

³ Is chik amel lew'enho sacerdote Eleazar yämthilek ihän alhoye tä ihi wichi lew'et wet ne'tek õ'län tä ihi tä lham tatache.

⁴ Wet is chik sacerdote Eleazar y'uytho lefwuj häp lew'oyis, wet itsäyejlhi siete veces häp carpa tä owukwe lhip tä tatache.

⁵ “Wet chik ileyej, nech'e is chik õ'wunho w'asetaj tä ihi tä lham tatache, lhäy'e t'äj, lhäy'e t'isan, lhäy'e lew'oyis, lhäy'e lhäk tä tälho lets'e.

⁶ Wet is chik sacerdote tachuma pänhichetek lhip, lhäy'e hal'ä tä lhey hisopo lhachafwaj tä lew'ole ihi, wet yäytej sak'al lhip tä ichät, wet ithatho itäj tä w'asetaj i'pe.

⁷ Wet chik ileyej, is chik ilej lew'uy, wet ilejej lhamche inät, wet yäpnho wichi lew'et. Mat kamaj lakokhayaj iyej t'at pajtha honaj.

⁸ Wet elh tä iwunho w'asetaj, häte is chik ilej lew'uy wet ilejej lhamche inät. Mat lakokhayaj iyej t'at pajtha honaj.

⁹ Wet elh tä lakokhayaj newahi, is chik ihutwek w'asetaj lemok'otaj wet itihi lew'et tä is tä lakokhayaj newahi tä atofwehlä wichi lew'et. Häpkhilek Israel lhayis tachumapej wet itsäyho inät tä yenlhi yämthilek ilejej lhamchehen wet õ'soyej lech'isukyajay.

¹⁰ Wet elh tä ihutwek w'asetaj lemok'otaj, häte iwohiyet'ak nileja lew'uy. Mat lakokhayaj ihi t'at pajtha honaj. Kalelhäj olhämetna, wet y'aje amel tä Israel lhayis lhäy'e wichi tä kahäpeya tä i'amejen, pajla'tha nichäte ales tä lepes lheley.

Lakeyis tä is chik elh iwoye tä lhailej yämthilek noj tä kok'ayeje m'ak tä ni'isa

¹¹ “Elh chik itsok elh chik häpe lep'itsek, kok'ayeje t'at pajtha siete ifwalas.

¹² Mat tres ifwalas tä tajyäme tä itsok n'op'itsek, is chik ilejej lhamche inät tä oyämene. Wet chik taj siete ifwalas, yachajo tä ilej lhamche, häpkhilek noj t'at lakokhayaj. Mat chik nileja lhamche ifwalastso, lakokhayaj nofwit'a.

¹³ Elh chik itsok n'op'itsek wet lhaknilejayejche inät tä lecha, hin'otso tamenej tä kok'aye carpa tä owukwe. Tä mälhyejtso, õ'sohiyeja tä iyej Israel lhayis. Tsi tä õknitsäya'pe inät tä lecha, wet lakokhayaj iyej t'at.

¹⁴ “Chik iche elh tä y'il tä ichufwi lewukwe tä tsänt'äj, elh chik häpe chik iyej lakokhayaj ihi, lhäy'e elh chik tiyäjchufwi, pajtha siete ifwalas.

¹⁵ Wet häp lehis tä laj lep'otesa, wok lep'otes tafwochechufwi, häte lakokhayaj ihi t'at.

¹⁶ “Wet elh chik itsok n'op'itsek, wok n'olänek, wok y'il t'at tä iche tayhi, wok n'olhile, wok n'op'itsekw'et, kok'ahiyejela siete ifwalas.

¹⁷ “Wet häp n'okokhayajtso, is chik õtchuma w'asetaj tä õ'wunho tä õ'länpe n'och'isukyaj lemok'otaj lhip, wet õ'thatho lehi, wet õ'tsäype inät tä tälho ts'ifwik.

¹⁸ Wet nech'e is chik hin'o tä lakokhayaj newahi tachuma hisopo lhachafwaj tä lew'ole ihi, wet y'uytho inät wet itsäype n'owukwe tä tsänt'äj tä elh ichufwi tä y'il, lhäy'e m'ayhay tä ichufwi, lhäy'e wichi tä ichufwi. Häte is chik itsäype elh tä itsok n'olhile, wok n'op'itsek, wok n'olänek, wok n'op'itsekw'et.

¹⁹ Wet chik tajyäme tres ifwalas, lhäy'e tä nichäte ifwala siete, elh tä lakokhayaj newahi is chik itsäype inät häp elh tä lakokhayaj ihi, häpkhilek noj lakokhayaj. Wet hin'o tä lakokhayaj ihi, is chik ilej lew'uyis wet ilejej lhamche inät, wet chik honaj noj t'at lakokhayaj.

²⁰ “Wet chik elh tä lakokhayaj ihi nilejayej lhamche inät tä lecha, õ'sohiyeja tä iyej Israel lhayis. Tsi tamenej tä lakokhayaj ihi ow'et tä ot'amajchet. Tsi tä õknitsäya'pe inät, hin'otso lakokhayaj iyej t'at.

²¹ Kalelhäj t'at olhämettso wet häpe m'ak tä nittäya. Wet elh chik itsäype inät elh tä ilejejche, häte lham is chik ilej lew'uy. Wet elh chik tachumhi inät tä õ'lejej lhamche, häte lakokhayaj ihi pajtha honaj.

²² Nilhokej m'ak at chik häpek elh tä kok'aye itsok, kok'ayeje t'at. Wet hin'o chik itsok elh tä lakokhayaj ihi, häte lham lakokhayaj ihi t'at pajtha honaj.”