Números 17 - Biblia Wichi

Aarón letsut iwo letälhesa

¹ Lhawuk tahuyej Moisés wet yok:

² –Fwenho Israel lhayis, Häp hin'ol tä iyhäj kaniyatey elh weihalhapej is chik ichäj alhoho letsut. Wok oyok, doce n'otsutes tä lewuk Israel lhayis tä tälhehen doce letetsel. Wet elhpej tä letsut lesayen lhey wet tiyej letsut.

³ Wet lesayen Aarón lhey wet tiyej n'otsut tä lewuk wichi tä tälhe letes Leví. Tsi mälhyej tä oyäme, elh weihalhapej hin'o tä iyhäj kaniyat letsut iyej t'at iyhäj.

⁴ Wet tilachufwi carpa tä owukwe, tihila tä Arca tä Ot'amajchet tä olhämtes ihi, häp lhip tä oipej amejen.

⁵ Wet hin'o tä ottshupiye, letsut iwohla letälhesa, häpkhilek Israel lhayis ileyej tä itipej amejen lhämtes tä ni'isachehen.

⁶ Wet Moisés ifwenho Israel lhayis häp Lhawuk lhämettso. Wet häp hin'ol tä iyhäj kaniyatey elh weihalhapej hiw'enho letsut Moisés, pajtha w'awulho doce n'otsutes. Häte Aarón letsut iyej t'at.

⁷ Wet Moisés itihi lhamel tä Lhawuk tatache tä ichufwi carpa tä Lhawuk lewukwe.

⁸ Wet tä nech'e fwala tä Moisés ihoye Lhawuk lewukwe, hiw'en n'otsut tä lewuk Aarón tä Leví lhayis elh tä iwo letälhesa, wet iwo lhawoya, wet äp lhay ihi tä y'ohen t'at.

⁹ Wet Moisés itonphä n'otsutes tä iwhäye Lhawuk, wet ipäyne Israel lhayis. Tä lhamel ileyej tä iyahin, tachumahen letsutes.

¹⁰ Wet Lhawuk tahuyej Moisés wet yok: –Achajo tä letihi häp Aarón letsut tä Arca tä Ot'amajchet tatache. Wet amajej tä ihi häpkhilek wichi tä akachuhantses hiw'enpej, wet ileyej lhämtes tä ni'isachehen tä lhamel itipej n'oyej, wet n'ilahen.

¹¹ Wet Moisés iwoye Lhawuk lhämet tä ne'tek iwoye.

¹² Matkat Israel lhayis tahuyej wet yok: –¡Nofwej olhamel! ¡Nilhokej olhamel oy'inhihena!

¹³ ¡Tsi elh chik häpe chik lhaitott'ayne Lhawuk lewukwe tä t'amajchet y'il t'at! ¿Tä mälhyej'attso p'iya pajla'tha onofwej olhamel tä oy'inhen?