Números 16 - Biblia Wichi

Coré tatayhlä Moisés lhäy'e Aarón

¹ Iche p'ante hin'o tä Leví lhayis elh tä lhey Coré. Lajcha lhey Ishar wet tälhe letes p'ante lhey Coat. Wet lham Coré, lhäy'e tres hin'ol tä tälhe letes Rubén, elh lhey Datán, elh lhey Abiram tä Eliab leles, wet elh lhey On tä Pelet lhäs,

² lhamelna tatayhlä Moisés. Wet doscientos cincuenta (250) Israel lhayis kaniyatey lhaip'ajtej lhamel. Hin'oltso häpehen consejeros, wet wichi yäme tä isen t'at.

³ Wet nilhokej lhameltso lhaihutwek wet ihoye Moisés lhäy'e Aarón. Wet yämhoplhi lhamel wet yok: –¡Naya tä alets'ilkatej m'ak tä õne'tek lewoye! ¡Tajlhamhiyet'a amel, mat nilhokej wichi tä Lhawuk yen t'amajcheta, wet iyej t'at lhamel! ¿Chipte tä alhenay niyatayej häp Lhawuk kawichi?

⁴ Tä Moisés iläte, t'upeyhchä pajtha letacho taji honhat.

⁵ Wet tahuyej Coré lhäy'e wichi tä lhaip'ajtej, wet yok: –Chik ifwalak nech'e fwala Lhawuk ipäynhila amehen elh tä häpe, häp elh tä lham t'amajchet yämthilek yachaje lham häp m'ayhay tä wichi yen t'awayhata. Mat häpkhila elh tä lham t'at tä tatshupiye.

⁶ Woyela täja amel: Chäja alhoho häp incienso lehis,

⁷ wet chik fwala thathomchela fwiyhol wet tsäyhomchela incienso, wet tihila tä Lhawuk tatache. Wet elh chik Lhawuk tatshupihiyela häpkhila t'at t'amajchet. ¡Naya, leyej m'ak tä lhen atichunhayaja!

⁸ Wet Moisés äp tahuyej Coré wet yok: –Amel tä ahäpehen Leví lhayis, ch'ahuyay n'oye.

⁹ ¿Hä let'ayhtejen tä Israel Lewuk Dios tatshupi amehen tä lhewej Israel lhayis yämthilek lhewhäye lham, wet letachumhiwethä lham lew'et, wet letach'ote wichi?

¹⁰ Lhawuk t'uhläk am, Coré, lhäy'e iyhäj Leví lhayis itwhäye lham. Mat athana lekänaye yämthilek ahäpehen sacerdotes.

¹¹ T'uhawethiyejt'a tä letiyayej ämtes tä ni'isachehen häp Aarón. Häpe t'at Lhawuk tä am letatayhlä, lhäy'e iyhäj tä lhaip'ajtit amej.

¹² Wet Moisés äp yok: –Äne Datán lhäy'e Abiram, Eliab leles. Mat tä iyhäj fwetaj t'äne, lhamel yok: –Ohohit'a ame.

¹³ ¿Hä let'ayhtejen tä leso n'oyejen honhat tä t'os lhäy'e akäyek hätet iwoye inät, iläfwelchehen tä ihi, wet lelänhen olhamel tä oihi ts'anisna? ¿Wet äp let'uhläk alhen häpeya olhamel oka niyat tä lhamya?

¹⁴ ¡Lehänhit'a n'oyehen honhat tä t'os lhäy'e akäyek hätet iwoye inät, iläfwelchehen tä ihi, wet ihichet'a olhamel okäsw'etes! ¡Wet let'uhläk nilhokej olhamel otch'anlhaye t'at m'ak tä lewoyej n'oyehen, mälhyet asnamis! ¡Kha, ohohit'a ame!

Lhawuk itäyhthen häp wichi tä tatayhlä

¹⁵ Tä Moisés iläte lhamel lhämtes, wuj tä lewäk ihi. Wet tahuyej Lhawuk wet yok: –¡Yej tachumahlä m'ayhay tä lhamel yen awayhtesa! Olham osohiyejt'a m'ak at chik häpe häp lhamel, tej chik asno, wet niwohit m'ak chik ni'isa chik owoyeje lhamel.

¹⁶ Wet Moisés äp tahuyej Coré wet yok: –Chik nech'e fwala am lhäy'e iyhäj tä lhaip'ajtit amej hoyela Lhawuk. Häte Aarón ihiyeja.

¹⁷ Is chik elh weihalhapej amel ichäj incienso lehi wet itsäyho incienso. Wet am, Aarón, häte chäja incienso lehi wet tilawhäye iyhäj tä doscientos cincuenta (250) tä ihi tä Lhawuk tatache.

¹⁸ Wet tä nech'e fwala elh weihalhapej tachuma incienso lehi, wet itsäyho incienso wet ithatho fwiyhol. Wet takasitwhäye Moisés lhäy'e Aarón tä ihi tä tatache häp carpa tä Lhawuk lew'et.

¹⁹ Wet Coré ihutwek nilhokej wichi wet yämhoplhi yämthilek tatayhlä Moisés lhäy'e Aarón. Wet tä lhamel ihi tä tatache Lhawuk lew'et, häp isi tä Lhawuk lewujyaj lhain'ältej nilhokej wichi.

²⁰ Wet Lhawuk tahuyej Moisés lhäy'e Aarón wet yok:

²¹ –¡Atontehlä wichina! ¡Otäyhthila athana!

²² Matkat Moisés lhäy'e Aarón t'upechehchä pajtha letachol tajiche honhat, wet yok: –Dios, am tä lewo lew'atshancheyaja nilhokej wichi. ¿Chipte tä lemenyenej hin'o tefwajni lech'isukyaj nilhok wichi?

²³ Lhawuk nichulho Moisés wet yok:

²⁴ –Fwenho nilhokej Israel lhayis, olak, “Mäyaych'oye lhip tä Coré, Datán, lhäy'e Abiram lewukwey ihi.”

²⁵ Wet Moisés yik, lhäy'e hin'ol tä thänhäy, wet ihoye Datán lhäy'e Abiram.

²⁶ Wet tahuyej wichi wet yok: –Mäyaych'oye lewukwey häp hin'ol tä akachuhantsesna, wet yej tachuma m'ak at chik häpek lewuk lhamel. Chik kawoyaye olhämet, lech'isukyaj tamenla amejen wet häte let'inhihena.

²⁷ Wet wichi yikch'oye lhip tä Coré ihi, lhäy'e lhip tä Datán lhäy'e Abiram ihi. Wet Datán lhäy'e Abiram inukwephä tä tälhchufwi lewukwey wet ihi t'at lepelis, lhäy'e lew'et lheley, lech'efwas lhäy'e leles.

²⁸ Wet Moisés yok: –Amel lew'enayhla tä Lhawuk t'at tä ne'tek owoye nilhokej m'ayhay, olhamhit'ak onech'ethayaj tä owoye.

²⁹ Chik hin'olna y'inhen mälhyej lakey tä y'il hin'o tä t'inhayaj t'at tä ilän, wet chik mälhyejtso, letäfwenhiyeja tä Lhawuk lhämethit'a n'oyej.

³⁰ Matlak Lhawuk iwoye m'ak tä y'atseltejen, wet tatoy honhat wet hin'olna tiyäjche chowej, lhäy'e lakäywet tä iyej, letäfwenhiyeja tä hin'olna yen w'et m'ayeka häp Lhawuk.

³¹ Wet tä Moisés ileyej tä yämlhi, tatoy honhat tä lhamel takasthi.

³² Wet lhamel lhäy'e lew'et lheley, lech'efwas lhäy'e leles, lhäy'e Coré laka hin'ol, lhäy'e nilhokej lhamel lakäywetes,

³³ tiyäjche honhat tä tatoy. Wet honhat yäpilwek wet hip'o'pe lhamel wet tatäy, mat lhamel y'inhihent'a tä nichätho n'op'itseyhay lew'et, kamaj iläyhen. Mälhyejtso tä Lhawuk itäyhat lhamel tä iyej Israel lhayis.

³⁴ Wet Israel lhayis tä iwhäye iläte lhafwyhayajay, wet nilhokej lhamel inukwe alhoho wet yok: –¡Mäh, y'atn'isiyeja!

³⁵ Wet Lhawuk ichen itäj wet ilänhen doscientos cincuenta (250) hin'ol tä iwunhen incienso ifwalatso.

M'ak tä õ'woyeje incienso lehis

³⁶ Wet Lhawuk tahuyej Moisés wet yok:

³⁷ –Fwenho sacerdote Aarón lhäs Eleazar, Is chik tachuma incienso lehis tä ihi itäj tä y'om, wet itontehlä wichi lew'et tä itsäyhen fwiyhol tä ihiche.

³⁸ Häp lehistso õyen ot'amajchetesa, tsi hin'oltso tä iwoye m'ak tä ni'isa itsäyhomche mathi incienso tä iwunhen tä ihi tä ottache. Tä mälhyejtso, is chik lekäjiche wet p'oyeja'pe altar, häpkhilek Israel lhayis yenpej tichunhayaja iyhäj wit'äyhyajtso wet nowaye.

³⁹ Wet sacerdote Eleazar ihutwek incienso lehis tä bronce tä lewuhuy häp hin'ol tä y'inhen tä itäj ilänhen. Wet ne'tek õ'käjiche wet õhp'oyejpe altar,

⁴⁰ mälhyej tä Lhawuk ifwenho Moisés tä ne'tek Eleazar iwoye. Wet Israel lhayis yenpej tichunhayaja täjtso, yämthilek newache elh tä kahäpeya Aarón leles elh chik fwetaj lhaitott'ayne wet iwun incienso tä ihi tä Lhawuk tatache. Tsi chik fwetaj iwoye täjtso, lewit'äyhyaj hätehlat iwoye Coré lewit'äyhyaj, lhäy'e iyhäj tä yen lhama.

Aarón ifwayhthen wichi

⁴¹ Tä ifwala elh nilhokej Israel lhayis itiyej lhämtes tä ni'isachehen häp Moisés lhäy'e Aarón, wet yok: –¡Amel lelänhen Lhawuk kawichi!

⁴² Wet wichi lhaihutwek yämthilek tatayhlä Moisés lhäy'e Aarón. Matkat lhamel iyahne carpa tä Lhawuk lewukwe, hiw'en tä pule hip'o'pe, wet n'äl isi tä Lhawuk lewujyaj.

⁴³ Wet Moisés ihoye tä Lhawuk lewukwe tatache, lhäy'e Aarón,

⁴⁴ wet Lhawuk tahuyej Moisés wet yok:

⁴⁵ –¡Atontehlä wichina! ¡Otäyhthila athana! Mat Moisés lhäy'e Aarón t'upechehchä pajtha letachol tajiche honhat.

⁴⁶ Wet Moisés tahuyej Aarón wet yok: –Chäj alhoho aka incienso lehi, wet thatho fwiyhol tä tälho altar, wet tsäyho incienso. Wet keltshi, hoye wichi wet enlhi m'ak tä lewoye yämthilek Lhawuk itäyhat wichi letes. Tsi inuphä lewäk wet iwo tesa n'otäyhyaj.

⁴⁷ Wet Aarón iwoye Moisés lhämet wet inu alhoho tä ihoye wichi. Wet n'otäyhyaj tä tälhe Lhawuk iwo tesa tä ilänhen lhamel. Wet Aarón itsäyho incienso häp lehi tä ichäjlhi, wet yenlhi m'ak tä iwoye yämthilek Lhawuk itäyhat wichi letes wet noj lewäk.

⁴⁸ Wet tä takasit, wichi tä pajche y'inhen tumej lhip elh, wet iyhäj tä kamaj n'ot'ilek nichätaye lhamel tumej lhip elh, wet takasit n'ot'ilek.

⁴⁹ Mat pajche y'inhen catorce mil setecientos (14.700) wichi, w'enha lhamej wichi tä pajche y'inhen tä Coré tamenej tä lham tatayhlä Lhawuk.

⁵⁰ Tä tajyäme t'inhayaj tä ilän wichi, Aarón yäple Moisés tä ihi lepe häp carpa tä Lhawuk lewukwe.