Números 10 - Biblia Wichi

N'ofwolis trompetas tä plata

¹ Lhawuk tahuyej Moisés wet yok:

² –Enlhi täkwfwas afwolis trompetas tä plata, häne n'okäjnhat tä lhenwethä, häpkhilek õyafwutche chik õt'äne wichi wok õne'tek yikhen.

³ Wet chik õyafwutche n'ofwolis, häp tä is chik nilhokej wichi lhaihut ame tä ihi tä tatache häp carpa tä owukwe.

⁴ Mat chik tefwajni tä õyafwutche, häp tä is chik ts'ilak hin'ol tä wichi kaniyatey tä lhaihut ame.

⁵ Wet chik õyafwutchehen täkwfwas n'ofwolis, lhäy'e n'ot'änyaj tä äytaji, häp tä is chik wichi yikhen. Ichun wichi tä tumej hichä,

⁶ wet chik äp õyachajo tä õyafwutchehen, nech'e häp wichi tä tumej tapinhiye tä is chik yikhen. Tä mälhyejtso, chik õyafwutchehen n'ofwolis lhäy'e n'ot'änyaj tä äytaji, häp tä yikhen wichi.

⁷ Wet chik ts'ilak n'ofwolis tä õyafwutchehen, häp tä is chik wichi lhaihutwekhen.

⁸ Wet iyhäj tä yafwutchehen n'ofwolis häpe t'at sacerdotes, tä häpehen Aarón leles. Yej leleyayej tä lhenay akeya tähestso, pajla'tha nichäte ales tä lepes lheley.

⁹ “Wet chik lhehi honhat tä alewukla, wet wichi inu amehen, wet lhistejlä lhamel, afwutchehena afwolis wet fwitseneja tä let'änhen. Häpkhilek olham tä ohäpe Awuk Dios ontichunhila hach'oyehen, wet ofwayhthila amejen atayhfwas.

¹⁰ Häte häp ifwalas tä lewo akäjyaja, wok häp tä iwel'a nech'ayek, chik lelänhen itshätäy tä lewunhomche tä lhen han'okhayaja n'oyej, lhäy'e tä lelänhen itshätäy iyhäj yämthilek ale'isyen n'oye, afwutchehena afwolis. Chik lewoye täjtso, ontichunhila hach'oyehen. Ohäpe Awuk Dios.”

Israel lhayis yikch'oye Sinaí

¹¹ Iwel'a dos, häp ifwala veinte, tä häpe nekchäm weihalha tälhe ifwala p'ante Israel lhayis yikch'oye Egipto, wet häp pule tä i'pe carpa tä Lhawuk lhämet ichufwi, yik.

¹² Wet Israel lhayis iwo tesa lew'ekyaj tä yikch'oye ts'anis tä Sinaí. Wet pule tä ichunlä lhamel takasit tä ihi ts'anis tä lhey Parán.

¹³ Wet tä lhamel yikhen, mälhyej tä Lhawuk ifwenho Moisés yämthilek wichi iwoye,

¹⁴ ichun nifwotaj tä yikhen tä häpe wichi tä tälhe letes Judá, wet lhamel laka niyat Aminadab lhäs tä lhey Nahasón.

¹⁵ Wet elh tä lhayen lhetekayej nifwotaj tä häpe wichi tä tälhe letes Isacar, häpe Suar lhäs tä lhey Natanael.

¹⁶ Wet elh tä lhayen lhetekayej nifwotaj tä häpe wichi tä tälhe letes Zabulón, häpe Helón lhäs tä lhey Eliab.

¹⁷ Wet õ'nachu Lhawuk lewukwe, wet Leví lhayis tä tälhe letetsel tä lheyis Gersón lhäy'e Merari, häp tä lhamel tilhäj wet yikhen.

¹⁸ Wet nifwotaj tä häpe wichi tä tälhe letes Rubén, lhamel imälheche wichitso len'äyij, wet lhamel laka niyat Sedeúr lhäs tä lhey Elisur.

¹⁹ Wet elh tä lhayen lhetekayej nifwotaj tä häpe wichi tä tälhe letes Simeón, häpe Surisaday lhäs tä lhey Selumiel.

²⁰ Wet elh tä lhayen lhetekayej nifwotaj tä häpe wichi tä tälhe letes Gad, häpe Reuel lhäs tä lhey Eliasaf.

²¹ Wet nech'e yikhen Leví lhayis tä tälhe letes Coat, lhamel tilhäj m'ayhay tä n'ot'amajchetes. Tä lhamel nichäthopej lhip tä takasthi, pajche wak'alh häp carpa tä Lhawuk lewukwe.

²² Wet nech'e äp yikhen nifwotaj tä häpe wichi tä tälhe letes Efraín, wet elh tä lhayen lhetekayej häpe Amihud lhäs tä lhey Elisama.

²³ Wet elh tä lhayen lhetekayej nifwotaj tä häpe wichi tä tälhe letes Manasés, häpe Pedasur lhäs tä lhey Gamaliel.

²⁴ Wet elh tä lhayen lhetekayej nifwotaj tä häpe wichi tä tälhe letes Benjamín, häpe Gedeoni lhäs tä lhey Abidán.

²⁵ Wet iyhäj tä imälheche nifwotas len'äyij tä yikhen, häpe wichi tä tälhe letes Dan, wet elh tä lhayen lhetekayej häpe Amisaday lhäs tä lhey Ahiezer.

²⁶ Wet elh tä lhayen lhetekayej nifwotaj tä häpe wichi tä tälhe letes Aser, häpe Ocrán lhäs tä lhey Pagiel.

²⁷ Wet elh tä lhayen lhetekayej nifwotaj tä häpe wichi tä tälhe letes Neftalí, häpe Enán lhäs tä lhey Ahira.

²⁸ Häp täjtso m'ak tä iwoye Israel lhayis lhäy'e laka nifwotas wet yikhen.

Moisés t'äne lech'efwa lechila yämthilek iwo t'unfwaya

²⁹ Moisés tahuyej lhachifwa Hobab tä lajcha Moisés kachäti Reuel tä lew'et Madián. Wet yok: –Olhamel oyikhen tä ohoye honhat tä olhamel Owuk Dios ifwel n'ohohen tä yok, “Ow'enla amhohen.” Athana ot'uhläk lenekche olhamel, ot'amajila amej, tsi Owuk ifwel tä t'amajiyeja Israel lhayis.

³⁰ Mat Hobab nichulho wet yok: –Kha, oyikhit'a amchehen. Oyäpnhiyelat oka honhat, wet oyäple opuhfwas.

³¹ Mat Moisés lhaip'altsene wet yok: –Yej lhekch'oye olhamel. Am wuj tä letäfwelej lhipey tä is tä ihi ts'anisna yämthilek olhamel owo kasthawetahi. Olhamel oisila amej chik lepäyen n'oyehen n'äyij, atehlat iwoyek olhamel ottelho.

³² Chik lenek n'okwehen, ow'enla amho lhip m'ayhay tä isen chik Lhawuk hiw'en n'ohohen.

³³ Wet Israel lhayis yikch'oye Lhawuk laka chenaj Sinaí, wet tres ifwalas tä lhamel iwo lew'ekyaja. Wet Arca tä N'ot'amajchet tä Lhawuk lhämtes ihi, häp tä ichunlä lhamel tä t'ukwe lhip tä is yämthilek iwo lakasthawetahi.

³⁴ Wet Lhawuk kapule i'pe lhamel ifwalapej, tälhepej tä lhamel yikch'oye lakasthawet.

³⁵ Wet chik yikhenpej iyhäj tä tilhäj Arca, Moisés yopejkwe: “¡Nephä, Iwuk! ¡Is chik ifwtsathi atayhfwas! ¡Wet iyhäj tä n'äyi amho, is chik inukwe alhoho tä nowayhen tä aiw'en!”

³⁶ Wet chik takasthenpej lhamel tä tilhäj Arca, wet Moisés yopejkwe: “¡Lhuu Iwuk, ehi lechowej Israel lhayis tä wujpeyna!”