Números 1 - Biblia Wichi

Õ'wo t'ufwahtesa Israel lhayis tä ihi Sinaí

¹ Häp nekchäm dos tälhe ifwala p'ante Israel lhayis yikch'oye Egipto, wet iwel'a dos, häp ifwala tä ichun, Lhawuk tahuyej Moisés tä ihi ts'anis tä ichufwi carpa tä Lhawuk lewukwe. Wet yok:

^2-3 –Wo t'ufwahtesa Israel lhayis. Lesayen nilhokej lheyis iyhäjpej tä laka niyat iyej, lhäy'e iyhäj tä lhalepuhfwas, häpkhilek kalelhäj número tä ihi häp hin'ol tä takhajayhen yämthilek iwo laka'tshayaja, häp lhamel tä hiw'en veinte nekchämis lhäy'e iyhäj tä inu'pe. Lesayen lheyis, mälhyej lakey nifwotaj tä õ'woyeje hin'ol. Wet Aarón tach'otla ame.

⁴ Häte ihla amejen weihalhapej hin'ol tä tälhehen wichi tä tälhehen doce letetsel, häp elhpej tä lepuhfwas yen laka niyata.

⁵ Häp täja lheyis hin'ol tä ihohla amehen: “Elisur, Sedeúr lhäs, tä tälhe wichi tä tälhe letes Rubén.

⁶ “Selumiel, Surisaday lhäs, tä tälhe wichi tä tälhe letes Simeón.

⁷ “Nahasón, Aminadab lhäs, tä tälhe wichi tä tälhe letes Judá.

⁸ “Natanael, Suar lhäs, tä tälhe wichi tä tälhe letes Isacar.

⁹ “Eliab, Helón lhäs, tä tälhe wichi tä tälhe letes Zabulón.

¹⁰ “Elisama, Amihud lhäs, tä tälhe wichi tä tälhe letes Efraín. “Gamaliel, Pedasur lhäs, tä tälhe wichi tä tälhe letes Manasés. “(Häp Efraín lhäy'e Manasés häpehen José leles p'ante.)

¹¹ “Abidán, Gedeoni lhäs, tä tälhe wichi tä tälhe letes Benjamín.

¹² “Ahiezer, Amisaday lhäs, tä tälhe wichi tä tälhe letes Dan.

¹³ “Pagiel, Ocrán lhäs, tä tälhe wichi tä tälhe letes Aser.

¹⁴ “Eliasaf, Reuel lhäs, tä tälhe wichi tä tälhe letes Gad.

¹⁵ “Wet Ahira, Enán lhäs, tä tälhe wichi tä tälhe letes Neftalí.”

¹⁶ Häp tähestso niyatey tä õt'ähiche tä tälhehen Israel lhayis tä tälhehen doce letetsel, yämthilek ilesayen laka wichi lheyis.

^17-18 Wet iwel'a dos, häp ifwala tä ichun, Moisés lhäy'e Aarón t'änehen hin'oltso tä Lhawuk tatshupiye, wet ihutwek nilhokej iyhäj Israel lhayis, wet ilesayen lheyis tä nilhokej laka wichi, häp iyhäjpej tä lhalepuhfwas, nilhokej hin'ol tä hiw'en veinte nekchämis lhäy'e iyhäj tä inu'pe,

¹⁹ mälhyej tä Lhawuk ne'tek Moisés iwoye. Wet lhamel yenlhi p'ante täjtso tä ihi ts'anis tä Sinaí.

^20-21 Tä mälhyejtso, õ'kalelhätchä Israel lhayis tä tälhehen doce letetsel. Õ'lesayen t'at lheyis häp iyhäjpej tä lhalepuhfwas, wok oyok, nilhokej hin'ol tä takhajayhen yämthilek iwo laka'tshayaja, häp lhamel tä hiw'en veinte nekchämis lhäy'e iyhäj tä inu'pe. Wet häp lhamel tä tälhe wichi tä tälhe letes Rubén, iche cuarenta y seis mil quinientos (46.500).

^22-23 Wet häp lhamel tä tälhe wichi tä tälhe letes Simeón, iche cincuenta y nueve mil trescientos (59.300).

^24-25 Wet häp lhamel tä tälhe wichi tä tälhe letes Gad, iche cuarenta y cinco mil seiscientos cincuenta (45.650).

^26-27 Wet häp lhamel tä tälhe wichi tä tälhe letes Judá, iche setenta y cuatro mil seiscientos (74.600).

^28-29 Wet häp lhamel tä tälhe wichi tä tälhe letes Isacar, iche cincuenta y cuatro mil cuatrocientos (54.400).

^30-31 Wet häp lhamel tä tälhe wichi tä tälhe letes Zabulón, iche cincuenta y siete mil cuatrocientos (57.400).

^32-35 Wet häp lhamel tä tälhe wichi tä tälhe letes Efraín, iche cuarenta mil quinientos (40.500). Wet häp lhamel tä tälhe wichi tä tälhe letes Manasés, iche treinta y dos mil doscientos (32.200). (Häp Efraín lhäy'e Manasés häpehen José leles p'ante.)

^36-37 Wet häp lhamel tä tälhe wichi tä tälhe letes Benjamín, iche treinta y cinco mil cuatrocientos (35.400).

^38-39 Wet häp lhamel tä tälhe wichi tä tälhe letes Dan, iche sesenta y dos mil setecientos (62.700).

^40-41 Wet häp lhamel tä tälhe wichi tä tälhe letes Aser, iche cuarenta y un mil quinientos (41.500).

^42-43 Wet häp lhamel tä tälhe wichi tä tälhe letes Neftalí, iche cincuenta y tres mil cuatrocientos (53.400).

⁴⁴ Häp täjtso wichi tä kalelhäj tä Moisés lhäy'e Aarón, lhäy'e doce Israel lhayis kaniyatey, ilesayen lheyis.

⁴⁵ Häp Israel lhayis tä takhajayhen yämthilek iwo laka'tshayaja, häp hin'ol tä hiw'en veinte nekchämis lhäy'e iyhäj tä inu'pe,

⁴⁶ iche seiscientos tres mil quinientos cincuenta (603.550) tä nilhokej.

M'ak tä Leví lhayis lechumet

⁴⁷ Mat wichi tä tälhe letes Leví tek õhp'ajtej p'ante häp iyhäj Israel lhayis tä õ'wo t'ufwahtesa.

⁴⁸ Tsi Lhawuk ifwenho p'ante Moisés wet yok:

⁴⁹ –Chik lewo t'ufwahtesa Israel lhayis, yej p'ajtej lhamel tä tälhe letes Leví.

⁵⁰ Mat is chik lhen lechumeta tä tach'ote ow'et tä ot'amajchet tä olhämet ichufwi, yämthilek t'uye nilhokej m'ayhay tä ihi. Is chik lhamel tä tilhäj, lhäy'e m'ayhay tä ihi. Wet chik Israel lhayis iwopej lakasthaweta, is chik owukwe ihi lechowej häp Leví lhayis lew'etes, wet is chik lhamel t'uye.

⁵¹ Wet chik õyikpejchufwi, lhamel t'at tä is chik inachu, tsi häp tä lechumet. Wet äp yenlhi chik nichäthopej lhip chik wichi yen lakasthaweta. Mat elh chik kahäpeya Leví chik lhaitott'ayne owukwe, letes ihi wet iwohiyet'ak õkniläna.

⁵² Wet chik Israel lhayis iwo lakasthaweta, is chik elhpej iyej t'at laka wichi, hätet iwoye nifwotaj. Wet is chik iti lhamejen m'ak tä yen tetneka lhamejen wichi tä häpe.

⁵³ Wet owukwe tä olhämet ichufwi, is chik ihi t'at lechowej Leví lhayis, yämthilek lhamel t'uye wet olham n'am tiyej owäk häp Israel lhayis.

⁵⁴ Häp täjtso Lhawuk lhämet tä ifwenho Moisés. Wet Israel lhayis iwoye nilhokej m'ak tä ne'tek lhamel iwoye.