Mateo 8 - Biblia Wichi

Jesús ichesat amostas länek

¹ Tä Jesús näm tä tälhpe chenaj, wujpey wichi tä yikche.

² Wet näm hin'o tä amostas länek, wet takhoschufwi wet yok: –Iwuk, che lewoye, lehanej lewoyneje che letäyhat n'oyej ot'inhayaj.

³ Tä Jesús iläte, wet tachumpe wet yok: –Owoye. Otäyhat amej. Häpet tä mälhyejtso, tatäy amostas wet hin'o iches.

⁴ Wet Jesús ifwenho tä yok: –Lhek yahinya, yej fwenhola elh che häpe. Mat apäynela häp sacerdote wet chäje m'ak che lhen t'awayhata Dios, häp achesyaj tä tamenej, mälhyej tä Moisés p'ante ne'tek õ'woye, häpkhilek nilhokej wichi ihanej tä noj anhayaj.

Jesús ichesat sip'äl kaniyat lakawo

⁵ Wet Jesús nichätho hupuy tä Capernaum, wet iche hin'o tä häpe Romano lhayis kasip'äl kaniyat tä ihoye wet lhaip'altsene tä yok:

⁶ –Iwuk, okawo imä katsi, k'efwitas tä ilän, wet lhäy'e lhip tä äytaj t'isan.

⁷ Tä Jesús iläte, wet yok: –Ohohiyela wet ochesthila.

⁸ Mat sip'äl kaniyat yok: –Iwuk, ot'uhawethiyejt'a che lehochufwi owukwe. Mat woye ämet wet okawo ichesla t'at.

⁹ Tsi olham häte oka niyatey ihi wet oyen at owuka lhamel, wet oka sip'äl in'oyej wet lhamel yen'atn'o lewuka. Che ofwenho elh lhamel tä oyok, “Mäh”, yik t'at, wok oyok, “Lhuu”, nek t'at, wok otahuyej okawo tä oyok, “Enlhi täja”, yenlhi t'at.

¹⁰ Tä Jesús iläte, wuj tä iseltej. Wet tahuyej wichi tä yikche wet yok: –Matche tä ofwen amhohen, Tej tä Israel lhayis, mat ow'enhit'a elh che häte iwoye hin'otso tä wuj t'ekhahyaj.

¹¹ Wet oyok, wujla'pe wichi tä ihi tä fwala tälhche lhäy'e tä fwala y'uy, nekhila wet tachufwihiyeja Abraham lhäy'e Isaac lhäy'e Jacob tä t'ekhen tä ihi Dios Niyatyaj.

¹² Mat häp wichi tä ichun p'ante tä Dios t'uhläk itihi Leniyatyaj, lham ithathiyela honataj tä alhoye, häpkhilek ihi lhafwyhayaj wet wuj tä äytaj.

¹³ Wet nech'e Jesús ifwenho sip'äl kaniyat wet yok: –Mäh äpil haw'ete. Tä let'ekha n'oye mälhyej tä lhämetso, iches t'at akawo. Häpet tä iwoyetso, wet sip'äl kaniyat lakawo iches t'at.

Jesús ichesat Pedro lech'efwa ko

¹⁴ Wet Jesús ihoye Pedro lew'et, wet hiw'en Pedro lech'efwa ko tä imä katsi, t'äj chayo.

¹⁵ Wet tachumpe takwey wet tatäy tä chayo t'äj. Wet atsinha nephä wet yenlhi Jesús lhäk.

Jesús ichesthen wujpe t'inhayaj länhay

¹⁶ Tä honaj wichi ihäne Jesús wujpe iyhäj tä ahät länhay, wet lham tahuyehen ahät lhayis wet lhamel inukwephä. Wet ichesthen nilhokej t'inhayaj länhay.

¹⁷ Wet mälhyejtso tä lhayäm matche profeta Isaías lhämet p'ante yok: “Lham tä tilhäj n'amel lhateläythayajay, wet lhaitumtejlä m'ak tä äytaj tä n'ailänhen.”

Lhamel tä t'uhläk yikche Jesús

¹⁸ Tä Jesús hiw'en tä wujpey wichi tä lhaihutej, ifwenho lechufwenkay wet yok: –Mäh n'aho lewomek lhip elhe.

¹⁹ Wet elh hin'ol tä lhayen lewosayej Ley p'ante tälhe Moisés, ihoye wet yok: –Maestro, oyikhila amche, honhat at che häpe che lehoye.

²⁰ Jesús nichulho wet yok: –M'awo lhayis lhokwe ihi, wet afwenchey lhupis ihi t'at. Mat häp Hin'o Lhäs lew'et ihihit'a yämlek lhay'up'at che imä.

²¹ Wet elh hin'o, tä häpe lechufwenek, tahuyej wet yok: –Iwuk, ch'anlha aj n'oye tä ochunkat tä oyäpil wet otjänch'oye ojcha lep'itsek.

²² Mat Jesús nichulho wet yok: –Tejtsi, nek n'okwe. Ch'anlhaye tä lhamel tä häpe lep'itseyhay tajänch'oye iyhäj tä y'inhen.

Jesús ikasthayen ihwok lhäy'e inät tä iwo lhetheya

²³ Wet Jesús tiyäjo chalana wet lechufwenkay yikche.

²⁴ Tä inukwe lewomekitaj, näm ihwokwetaj tä äytaji wet iwo lhetheya inät yäk tatäy lhimphaj wet y'uyhchä lehi. Mat Jesús imä t'at.

²⁵ Wet lechufwenkay ihoye tä hin'omhatlhi wet yok: –¡Iwuk, fwayhat n'amejen tä y'ach'ahen!

²⁶ Mat lham nichulho wet yok: –¿Chipte tä lenowayay? Ahäpehen hin'ol tä lhimphaj lechayaj. Wet nephä wet ifwone ihwok lhäy'e inät, wet wuj tä iwo letamseka.

²⁷ Tä lhamel hiw'en, wuj tä iseltejen wet yok: –¿Atsi hin'o tä häpe täja? ¡Tsi y'aje ihwokwetas lhäy'e lewomek tä iwoye lhämet!

Jesús ichesthen welantas länhay tä ihi Gadara

²⁸ Tä Jesús nichät lewomek lhip elhe, häp honhat tä lhey Gadara, wet iche täkwfwas hin'ol tä welantas länhay tä ihoye tä tälhe n'op'itseyhayw'etes. Lhäy'e lhip tä fwitses lhamel wet nehit katsik ihanej che inukwe n'äyijtso.

²⁹ Tä lhamel nichäte Jesús, wet t'änhen tä yok: –Dios Lhäs, ¿chipte tä katach'anlhaya n'oyehen? ¿Hä lenäm kana yämlek lewit'äyen n'ohen tä kamaj nichätaye lewhäy?

³⁰ Iche wujpe kutsi lhayis tä tott'aho p'ante tä t'ekwethä.

³¹ Wet ahät lhayis lhaip'altsene Jesús tä yok: –Che lenuhatphä olhamel, chen n'oyehen kutsi lhayis l'ini yämlek otiyäjo.

³² Wet lham yok: –¡Mähen! Wet ahät lhayis inukwephä, tiyäjomche kutsi lhayis, wet nilhokej lhamelna inukwe alhoho tä tälhpe tä nistakchä, yäk nichätho lewomek wet hich'ahen.

³³ Wet häp hin'ol tä t'uyehen kutsi lhayis, tä lhamel hiw'en tä mälhyejtso, nowayhen wet inukwe alhoho. Tä nichäte hupuy, ifwenhomche wichi nilhokej m'ayhayna lhäy'e m'ak tä iyej welantas länhay.

³⁴ Wet nilhokej wichi yikhen tä ihoye Jesús. Tä hiw'en, wet yok: –Olhaip'altsen ame, ¡mäch'oye oka honhatna!