Mateo 4 - Biblia Wichi

Ahättaj yelhte Jesús

¹ Tä tajyäme täjtso, Dios laka Espíritu ihänho Jesús häp ts'anis yämthilek ahättaj yelhte.

² Wet fwalas tä ihi cuarenta lhäy'e honatsis tä ihi cuarenta niwohit m'ak che tufw, wet tä lepese nichuyu.

³ Wet ahättaj näme wet yelhte tä yok: –Che ahäpe Dios Lhäs, lhek ahuye tuntey l'itsi häpkhilek lhaiwelanhat pana.

⁴ Mat Jesús nichulho wet yok: –Iche Dios lhämet ihi tä ihi Lehi tä yok, “Tek ts'ilak pan tä iläyit hin'o, mat häte nilhokej Dios lhämet häp tä iläyit hin'o.”

⁵ Wet nech'e ahättaj ihäne Jerusalén, häp hupuy tä Dios T'amajchet, wet ihänpe Dios Lew'et lhip tä atojphä,

⁶ wet tahuyej wet yok: –Che ahäpe Dios Lhäs, lhek athat honhate. Tsi Dios lhämet ihi Lehi tä yok, “Dios ne'tehlak laka ángeles t'u ame. Lhehla'pe takweyey häpkhilek kachäta'pe tunte che häpe wet naj awit'äyhyaja.”

⁷ Mat Jesús nichulho wet yok: –Häte iche Dios lhämet tä ihi Lehi tä ifwenho wichi tä yok, “Yej lhelhte Awuk Dios.”

⁸ Tä tajyäme täjtso, ahättaj ihänpe chenaj tä wuj tä atojphä wet ipäyne nilhokej n'oniyatyajay tä ihonhatena, lhäy'e lewujyajay.

⁹ Wet tahuyej tä yok: –Olham ow'enla amho nilhokej tähesna, che letakhos ochufwi wet len'okwi n'oyej.

¹⁰ Mat Jesús nichulho wet yok: –¡Mä och'oye, Satanás! Tsi Dios lhämet ihi Lehi tä ifwenho wichi tä yok, “N'okwiyej Awuk Dios, wet ts'ilkat lham tä lewujyen.”

¹¹ Wet ahättaj yikch'oye Jesús, wet nämhen ángeles wet tach'ote.

Tä Jesús ihi p'ante Galilea, häp tä nech'e iwo tesa lechumet

¹² Tä Jesús ihanch'oye tä õhp'ohi Juan, ihoye Galilea.

¹³ Mat tek takasthi Nazaret, mat yik wet yen lew'eta Capernaum tä iwhäye lewomek tä Galilea, häp hupuy tä ihi honhates tä lewuhuy wichi tä tälhe letetsel Zabulón lhäy'e Neftalí.

¹⁴ Wet täjtso, lhayäm matche profeta Isaías lhämet p'ante yok:

¹⁵ “Häp honhat tä Zabulón lhayis kahonhat lhäy'e tä Neftalí lhayis kahonhat, tä ihi Jordán lhip elh wet tumejlä lewomek, häp Galilea, wichi tä w'enha lhamej tä lew'et.

¹⁶ Häp wichi tä ihi honatsi nech'e hiw'en isi tä wuj. Lhamel tä ihi n'ot'ilek lehupel, isi ihutunche'pe lhamel.”

¹⁷ Tälhe fwalastso Jesús iwo tesa tä yen silätyaja tä yok: –¡Woyay ahusey iyhäja, tsi tott'a alhoho Dios Niyatyaj!

Jesús t'äne cuatro w'ahatwos

¹⁸ Wet Jesús inukwe lhip häp lewomek tä Galilea, wet hiw'ene hin'ol tä lhalepuhfwas. Elh häpe Simón tä äp õyen lheya Pedro, wet lechila lhey Andrés. Lhamel ithat inäte lewot, tsi häpehen w'ahatwos.

¹⁹ Jesús tahuye wet yok: –Nekay n'okwe, wet nemla let'ukwe w'ahat, mat let'uhikwela wichi.

²⁰ Wet yofwajkwet lhamel ileyej lewotey wet yikche.

²¹ Tä Jesús yäm kanhi, hiw'ene iyhäj hin'ol tä lhalepuhfwas, lhamel lheyes Santiago lhäy'e lech'inij Juan, häp hin'o tä lhey Zebedeo leles. Lhamel ihi chalana, lhäy'e lajcha Zebedeo, wet yenwethä lewotey. Jesús t'änehen lhamel,

²² wet yofwajkwet yikch'oye chalana, iwom lajcha wet yikche Jesús.

Jesús ichufwen wujpe wichi wet ichesthen t'inhayaj länhay

²³ Jesús ilunche nilhokej Galilea lhipey tä ichufwenhen wichi tä ihiche laka n'ohusew'etes. Yen silätyaja Dios Silätyaj tä Is tä häpe Leniyatyaj, wet ichestejen wichi nilhokej t'inhayajay lhäy'e m'ak at chik häpek lewit'äyhyaj.

²⁴ Wet letoyaj y'ajpe nilhok honhat tä Siria, wet õ'häne nilhokej wichi tä leteläythayaj iyeji t'inhayajay tä w'enhahiche, lhäy'e ahät länhay, lhäy'e welaktas länhay, lhäy'e k'efwitas länhay. Wet ichesthen.

²⁵ Wet wujpey wichi tä yikche tä tälhe Galilea, lhäy'e tä tälhe honhat tä lhey Diez Ciudades, lhäy'e Jerusalén, Judea, lhäy'e Jordán lhip elh.