Mateo 28 - Biblia Wichi

Jesús inuphä tä tälho n'op'itseyhay

¹ Tajyäme ifwala tä n'ot'elakw'et, tä nech'e fwamlafwaj häp ifwala tä ichunpe semana, María Magdalena lhäy'e elh María lhamel yikhen tä iyahne n'op'itsekw'et.

² Wet iseltej honhat w'ahu tä äytaji, tsi Lhawuk laka ángel inuhchä tä tälh puleye wet ihoye n'op'itsekw'et, wet ihut kanhi tunte tä õhp'oyeji lepe wet tatayphä'pe.

³ Wet lhäy'e lhip tä isi, hätet iwoye lep, wet lew'uyes wuj tä ipelajen.

⁴ Tä sip'äl hiw'en, ichettiyejchehen lenowayhyaj wet nichätche katsi, mälhyej chik y'inhen.

⁵ Mat ángel tahuyej atsinhay wet yok: –Amel yej nowayhen. Ohanej tä let'uyaykwe Jesúsnaj õhp'ajtej cruz.

⁶ Ihit'a kana, inuphä tä tälho n'op'itseyhay, mälhyej lhämetnaj iwoye. Lhuyay, lhek yahnho täjnaj õ'tihi.

⁷ Mäyay kelchetshi, fwenho lechufwenkay, olak, “Lhawuk inuphä, wet lew'enayhla kanhi Galileaye tsi pajichela ihi.” Häp täjtso m'ak tä ofwel amhohen.

⁸ Wet atsinhay lhaiteläfwithen tä yikch'oye n'op'itsekw'et, lenowayhyaj ihi mat häte wuj tä akäswethä, wet inukwe alhoho tä iwo silätaye Jesús lechufwenkay.

⁹ Wet tä yikhen, yofwajkwet Jesús lhaichutyenej, wet n'okwiyej wet yok: –Atamsekis ihi. Tä lhamel hiw'en, ihowhäye wet tatsufwelej takäläy wet iwunit.

¹⁰ Wet Jesús tahuyej lhamel wet yok: –Yej nowayay. Mäyay fwenho opuhfwas, is chik ihoye Galilea wet hiw'enlan'o kanhi.

Sip'äl ifwenho sacerdotes m'ak tä hiw'enej

¹¹ Tä atsinhay yikhen, wet sip'äl tä t'uye n'op'itsekw'et, elhpej lhamel tiyäjo hupuy wet ifwenho sacerdotes tä len'ohyajay ihiche häp m'ak tä hiw'enej.

¹² Tä sacerdotes iläte, lhamel lhäy'e hin'ol tä thänhäy lhaihutwek, yäm kalelhäj m'ak tä iwoye. Tä mälhyejtso, wuj chinaj t'äj tä hiw'enho sip'äl

¹³ wet yok: –Amel is chik lhoyaykwe, “Tä olhamel omähen tä honatsi, lechufwenkay neke lep'itsek Jesús wet ichäj.”

¹⁴ Wet chik gobernador ihanej, olhamel oyämhilhila atapehen yämthilek laj awit'äya.

¹⁵ Sip'äl tachuma chinaj t'äj wet iwoye m'ak tä õne'tek iwoye. Wet lhamel lhämet tä kamatachetso iyej t'at Judío lhayis yäk häp ifwalasna.

Jesús ne'tek õ'häne lhämtes häp wichi tä i'pe honhat

¹⁶ Jesús lechufwenkay tä ihi once ihoye Galilea. Tä nichäte, iho'pe chenaj tä lham pajche y'ithatho lhamel.

¹⁷ Tä hiw'en Jesús, iwunit, mat iche iyhäj tä tej tä hiw'en, mat kamaj nikalelhäja letichunhayaj chik matche m'ak tä hiw'en.

¹⁸ Wet nech'e Jesús ihowhäye lhamel wet tahuyej tä yok: –Dios yenn'o Niyatayej nilhokej m'ak tä ipuleye lhäy'e tä ihonhate.

¹⁹ Tä mälhyejtso, mäyay, hoyaye wichi tä ihiche nilhokej honhates, chufwenhen yämthilek lhayen ochufwenkaya. Bautisaynej Lhajcha lhey, lhäy'e Lhäs lhey, lhäy'e Espíritu tä T'amajchet lhey,

²⁰ wet chufwenejen nilhokej m'ak tä one'tek lewoyaye yämthilek häte lhamel iwoye. Wet lhek yahinya, olham oihla amejen nilhokej ifwalas yäk honhat noj.