Mateo 26 - Biblia Wichi

Judío lhayis iwo lehuseya'pe yämlek itsoklhi Jesús

¹ Tä Jesús ileyej nilhokej lhämtestso, tahuyej lechufwenkay wet yok:

² –Amel lehanej tä tatäy ifwalas täkwfwas wet häpkhila n'okäjyaj tä Pascua. Lewhäytso õyachajila Hin'o Lhäs yämlek õhp'ajtej cruz.

³ Wet ifwalastso sacerdotes tä len'ohyajay ihiche lhäy'e hin'ol tä thänhäy, lhamel lhaihutwek tä ihi Sacerdote tä Lhamya tä lhey Caifás lew'et,

⁴ wet iwaklhat t'akanyaj chik iwohiyejela Jesús yämlek itsoklhi wet õ'län.

⁵ Mat lhamel yok: –Isit'ak y'atihi n'okäjyaj häp m'ak tä y'awoye, häpkhilek letamsek ihi t'at wichi.

Atsinha itsäype Jesús lhetek hal'ä t'i tä lenij akäjche

⁶ Wet Jesús ihoye Betania wet iyej Simón lew'et, häp hin'o tä õyen lheya Amosteyis.

⁷ Wet näm atsinha tä ichäj hal'ä t'i tä lenij akäjche tä wuj laha, ihi lehi tä tuntemok. Wet tä Jesús t'ek, atsinhatso ihoye wet itsäype lhetek.

⁸ Mat tä lechufwenkay hiw'enej, lewäk ihi wet yok: –¿Chipte tä w'et iwom m'ak tä wuj laha?

⁹ Isin'ek õ'wom, wet laha chinaj t'äj tä wuj õhch'otyeneje wichi tä p'elitses.

¹⁰ Mat Jesús nitäfwelej letichunhayaj, wet tahuyej wet yok: –Tejtsi atsinha, ch'anlhayeje m'ak tä iwoyej n'oye tsi wuj tä is.

¹¹ Häp wichi tä p'elitses ipej amejen, mat olham pitajit'a tä oi'amejen.

¹² M'ak tä iwoyej n'oye tä itsäy o'pe hal'ä t'i, iwaklhat n'oyej chik õtjänlahlä op'itsek.

¹³ Matche tä ofwen amhohen, Häp honhat at chik häpe chik õyen lhämetahi Dios Silätyaj tä Is, häte õyämhiyela m'ak tä atsinhana iwoyene, häpkhilek õyen tichunhayaja lham.

Judas wak'alh letichunhayaj chik yachaj Jesús

¹⁴ Wet nech'e Jesús lechufwenkay tä ihi doce elh tä lhey Judas Iscariote, yik tä ihoye sacerdotes tä len'ohyajay ihiche,

¹⁵ wet yok: –¿Atsi m'ak chik lew'enla n'oho chik oyachaj amehen Jesús? Lhamel yok: –Treinta chinaj t'äj. Wet hiw'enho,

¹⁶ wet tälhe täjtso Judas t'ukwe m'ak chik iwoye yämlek yachaje Jesús häp lhamel.

Nech'e nichäte lewhäy Pascua wet Jesús lhäy'e lechufwenkay tufw lhäk

¹⁷ Nichäte Judío lhayis lakäjyaj tä lhamel tufw pan tä levadura newahi. Wet ifwala tä ichun, Jesús lechufwenkay ihoye lham wet tay'ätshane tä yok: –Tä häpe Pascua, ¿atsi lew'et tä lehumin yämlek olhamel owaklhat amho äk?

¹⁸ Wet lham yok: –Mäyay hoyaye hin'o tä ihi hupuy wet fwenhola, olak, “Maestro yok, Tott'a n'oye owhäy. Oyenhilhila Pascua tä oihi haw'et, lhäy'e ochufwenkay.”

¹⁹ Wet lhamel yikhen wet iwoye m'ak tä Jesús ne'tek iwoye, wet iwaklhat lhäk. Tä wak'alh, wet yäple Jesús.

²⁰ Tä nech'e honatsi, lham ihoye huptso, lhäy'e lechufwenkay tä ihi doce.

²¹ Wet tä t'ekhen, ifwenho lhamel wet yok: –Matche tä ofwen amhohen, Elh amel yachajilan'o.

²² Tä lhamel iläte, wuj tä yen lefwitajayaja, wet nech'e elhpej tay'ätshaneje wet yok: –Iwuk, ¿elat olham p'iya?

²³ Jesús nichulho lhamel wet yok: –Häp elh tä lhaiw'afwlhat n'oyej tä oy'uytho pan häp lhalhäk, häp tä yachajilan'o.

²⁴ Hin'o Lhäs nichäthihola leteläythayaj lhäy'e t'ilek, mälhyej tä Dios Lhämtes tä ihi Lehi yämeje. Mat ¡p'elitsaj t'at hin'o tä yachajila, lewit'äy ihihila! ¡Isi p'ante chik newache!

²⁵ Wet nech'e Judas, häp hin'o tä yachajila Jesús, tahuyej wet yok: –Maestro, ¿elat olham p'iya? Jesús nichulho wet yok: –Am t'at tä lewoyetso.

M'ak tä Jesús iwoye tä yenlhi Santa Cena

²⁶ Tä lhamel t'ekhen, Jesús tachuma pan, wet iwo graciasayej Dios, wet hich'esajen wet hiw'enho lechufwenkay wet yok: –Chumaye, tufway, häp täja ot'isan.

²⁷ Wet äp tachuma n'olhäthi tä vino ihi, wet iwo graciasayej Dios, wet hiw'enho lhamel wet yok: –Yäyej täja, nilhokej amel.

²⁸ Häp täja ow'oyis tä nitsäyhchä häpkhilek wujpe wichi tä isej wet tatäy t'at lesukyajay. Tsi häp ow'oyisna yäm kalelhäj Dios lhämet tä hit'unteji m'ak tä iwoye.

²⁹ Ofwen amhohen tä nemla oyäyej vino pajla'tha oi'amejen tä y'ehi Ojcha Leniyatyaj, nech'ehilak olhamel oyäyej vino tä nech'ayek.

Jesús yäme tä Pedro lhaifwonlahlä

³⁰ Wet lhamel ichoywethä tä iten salmos. Tä ileyej, yikhen tä ihoye häp chenaj tä Oliwachat.

³¹ Wet Jesús ifwenho lhamel wet yok: –Lhek yahinya, honajchena lelhokej amel lewomayhlan'o. Mälhyejtso Dios lhämet p'ante ihi Lehi tä yok, “Olänla tson'ataswo wet leläy itsatla'pe honhat.”

³² Mat chik õ'nuhthiphälan'o chik otälho n'op'itseyhay, lew'enayhlan'o kanhi Galileaye tsi pajichela oihi.

³³ Pedro yok: –Tejlak nilhokej iyhäj aiwom, mat olham oaiwomhit'ala.

³⁴ Mat Jesús tahuyej wet yok: –Matche tä ofwel amho, Honajchena chik kamaj n'ipa ho'o, ihihila tres chik lhäme tä katäfwela n'oyej.

³⁵ Mat Pedro nichulho wet yok: –Tejlak otn'is amej chik y'at'inhen, mat oyohit'alak, “Tek ontäfwelej.” Wet nilhokej lechufwenkay tä lhämet mälhyejtso.

Jesús iwo t'alhyaja tä ihi Getsemaní

³⁶ Wet Jesús lhäy'e lechufwenkay ihoye lhip tä lhey Getsemaní. Tä nichäte, Jesús ifwenhomche lhamel wet yok: –Tachephä ayej kana. Olham oho kanhi tä owo ot'alhyaja.

³⁷ Wet ichäj lhamche Pedro lhäy'e Zebedeo leles täkwfwas. Wet nech'e ilät lhame tä äytaj lelhakli lhäy'e lefwitajayaj.

³⁸ Wet tahuyej lhamel wet yok: –Olät lhame tä ofwitajayaj wuj tä ilänn'o. Lew'enay tä omähit'a, mälhe ayej kana amel, häte yej lemähen.

³⁹ Wet yik tä lhaitontehlä lhimphaj häp lhamel, wet takhos katsi wet lhaip'altsene Dios tä yok: –Ijcha, chik iche elh on'äyij, fwayhat n'oyej olhät tä tapayna tä häpe oteläythayaj. Mat oyok, woye m'ak tä am anech'ethayaj, isit'a chik häpe olham onech'ethayaj.

⁴⁰ Tä ileyej, wet tapile lechufwenkay wet hiw'en tä imähen. Wet tahuyej Pedro wet yok: –¿Hä amel tek lekalhayhi chik kamäyahen lhimphaj, mälhyej tä n'am mä?

⁴¹ Yej lemähen mat woyay alhyaja häpkhilek nikalha amhihen n'olhelhtshayaj. Tsi ohanej tä let'uhläk lewoyaye olhämet, takhajayhen t'at ahusey, mat asanis takhajayhihent'a.

⁴² Wet yachajo tä äp yik wet iwo t'alhyaja wet yok: –Ijcha, chik newache elh on'äyij yämthilek otfwayej oteläythayajna, is t'at, is chik häpe am anech'ethayaj.

⁴³ Tä ileyej, wet tapil wet hiw'en tä lechufwenkay yachajo tä imähen, tsi nahati ihiche t'at tatey.

⁴⁴ Wet yachajo tä äp yikch'oye lhamel, wet iwo t'alhyaja, yachajo lhämtesn'e pajche iwoye.

⁴⁵ Tä ileyej, wet tapile lechufwenkay wet yok: –¡Kamaj lemäfwasen t'at wet lewo elakw'etesa! Lhek yahinya, nech'e nichäte lewhäy tä õyachaje Hin'o Lhäs häp wichi tä ni'isahen takweyey.

⁴⁶ Neyachephä, n'ekhen. Lhek yahinya, näm alhoho häp elh tä yachajn'o.

Õ'tsoklhi Jesús

⁴⁷ Tä kamaj yämlhi Jesús, näm häp Judas tä häpe lechufwenkay tä ihi doce elh, lhäy'e wujpey wichi tä tälhe sacerdotes tä len'ohyajay ihiche, lhäy'e tä tälhe hin'ol tä thänhäy. Wet lhamel ichäjwethä lefwajnhates lhäy'e hal'äy.

⁴⁸ Wet Judas pajche iwo letetnekayej tä ifwenho wichitso wet yok: –Häp elh chik ots'u lech'alo, häpe lham. Tsokaylhila.

⁴⁹ Wet tatshupiye t'at Jesús wet yok: –¡Eh Maestro, honatsi n'amejen! Tä iwoyetso, hits'u lech'alo.

⁵⁰ Wet Jesús nichulho wet yok: –Yaelh, kelit m'ak tä lewoyej n'oye. Wet nech'e iyhäj lhayämte Jesús wet tachuma wet itsoklhi.

⁵¹ Mat häp Jesús let'unfwas elh itonhi lefwajnhat, ifwajej Sacerdote tä Lhamya lakawo wet ilanhi lech'ote.

⁵² Mat Jesús tahuyej elhtso wet yok: –¡Achajo lehi afwajnhat! Elh chik häpek yen khajyhayaja n'ofwajnhat, n'ofwajnhatlak ilän.

⁵³ ¿Hä lefwetaj n'am kalhi chik ot'alhe Ojcha yämthilek ichen n'oye wujpey laka nifwotas ángeles?

⁵⁴ Mat chik mälhyejtso, ¿chip iwoyek lhayäm matche Dios Lhämtes tä ihi Lehi tä yäme tä häpe t'at täja owit'äyhyaj?

⁵⁵ Wet nech'e tahuyej wichi wet yok: –¿Chipte tä lewoyay afwajnhatesa wet lechäjaywethä hal'äy tä lenekhen yämthilek letsokaylhin'o, letech'ayenay n'oyej hin'o tä n'olhikoy? Nilhokej ifwalas naji tä ottayphä tä oihi Dios Lew'et tä owo ochufwenyaja, wet tek letsokaylhin'o.

⁵⁶ Mat häp owit'äyna, lhayäm matche profetas lhämtes p'ante ihi Lehi. Wet nilhokej lechufwenkay nech'e iwom wet inukwe alhoho tä yikhen.

Jesús ihi tä Judío lhayis laka Concilio tä Lhamya itayche

⁵⁷ Häp lhamel tä itsoklhi Jesús, ihäne häp Sacerdote tä Lhamya tä lhey Caifás lew'et tä hin'ol tä thänhäy pajche ihi tä lhaihutwek, lhäy'e iyhäj tä lhayen lewosayej Ley p'ante tälhe Moisés.

⁵⁸ Wet Pedro ihän t'at mat tek lhaitott'ayne, wet nichätho Sacerdote tä Lhamya laka alhotaj. Wet tä t'uhläk hiw'enej m'ak tä lepese, tatayphä tä iyej sip'äl tä t'uye Dios Lew'et.

⁵⁹ Wet häp sacerdotes tä len'ohyajay ihiche, lhäy'e nilhokej Concilio, lhamel t'ukwe m'ak chik isitäynej Jesús yämthilek yen tesayej wet ne'tek õ'län.

⁶⁰ Mat nilhokhiyet'a, tej tä wujpe wichi tä fwetaj y'ithatejlhi letes tä kamatache. Tä lepese iche iyhäj täkwfwas

⁶¹ tä yok: –Hin'otsi yonajkwe, “Ohanej owoyneje tä owasthi Dios Lewukwe, wet chik fwalas tres oneyhthiphäla.”

⁶² Tä Sacerdote tä Lhamya iläte täja, nephä wet tay'ätshane Jesús tä yok: –¿Hä ihichet'a ämet? ¿Chiwoye m'ak tä õy'ithatlhi amejna?

⁶³ Mat Jesús yok tam. Wet Sacerdote äp yok: –¡Tä y'ehi tä Dios tä n'ilataj itayche, one'tek lefwel n'ohohen m'ak tä matche! ¿Hä ahäpe N'ofwayhthi tä Dios Chenek? ¿Hä ahäpe Dios Lhäs?

⁶⁴ Jesús nichulho wet yok: –Am t'at tä lewoyetso. Mat lhek tetshan olhämet, oyok, Tälhe fwalasna lew'enayhla Hin'o Lhäs tä itayhiphä lhip tä lefwomkat häp Dios tä Khajay, wet tä nek i'pe pules.

⁶⁵ Tä Sacerdote tä Lhamya iläte, hich'esajche lham lew'uyes tä ihi tä Jesús itayche, tä yen tetnekayej tä wuj tä lewäk ihi. Wet tahuyej iyhäj tä yok: –¡Iläkwlhi Dios! ¡Naya t'at, tek y'awatlä iyhäj chik yäme letes! ¡Amel lelätaye t'at lhämtes tä ni'isachehenna!

⁶⁶ ¿Atsi m'ak tä lewoyaye? Lhamel yok: –Letes ihi. T'uhawetej chik õ'län.

⁶⁷ Wet nech'e lhamel ifwats'unpe tate'pe wet inhäpäjlhi. Wet iyhäj y'ajejlhi takwech'ol

⁶⁸ wet yok: –¡Tä ahäpe N'ofwayhthi tä Dios Chenek, lhek n'älte atsi tä ay'aj!

Pedro fwetaj nitäfwelayejpa Jesús

⁶⁹ Pedro i'alhoye, tatayphä t'at. Wet nech'e atsinha tä n'okawo ihoye wet yok: –Häte am lhewej naji Jesús, häp Galilea lhele.

⁷⁰ Mat Pedro lhaifwon tä ihi tä nilhokej tatache wet yok: –Ohanhiyejt'a m'ak tä lhäme.

⁷¹ Wet ihoye lepe. Tä nichäte, wet elh n'okawo'tsinha hiw'en wet ifwenho iyhäj wet yok: –Hin'otsi iyej naji Jesús tä Nazaret lhele.

⁷² Mat Pedro yachajo tä lhaifwon wet hit'unhatche lhämet tä yok: –¡Ontäfwenhiyejt'a hin'otso!

⁷³ Tä pajfwaj wet häte wichi tä iyej ihoye wet yok: –Matche tä ahäpe t'at lhamel elh. Tsi tä lhämlhi, n'äl tä ahäpe Galilea lhele.

⁷⁴ Wet nech'e Pedro yäm äytajche lhämet tä iyetlhi wet yok: –¡Is chik Dios yen tesa n'oyej chik kamatache olhämet tä oyok, Ontäfwenhiyejt'a hin'otso! Häpet tä mälhyejtso, wet ho'o y'ip.

⁷⁵ Wet Pedro nech'e lehusekch'oye Jesús lhämet mathi tä yok, “Chik kamaj n'ipa ho'o, ihihila tres chik lhäme tä katäfwela n'oyej.” Wet Pedro yikch'oye tä ihi wet wuj tä tafwlhi.