Mateo 22 - Biblia Wichi

Jesús lhämet tä itech'aynej wichi tä niyat t'äne tä lhäs tawhayey

¹ Jesús yachajo tä tahuyej lhamel wet itech'aynej lhämet täja wet yok:

² –Häp Dios Niyatyaj hätet iwoye täja: Iche niyat tä iwo käjyaja'pe lhäs tä tawhayey.

³ Wet ichen lakawos, ne'tek ihoyehen wichi tä lham t'äneje lakäjyaj, mat wichitso ihohiyet'a.

⁴ Wet yachajo tä ichen lakawos iyhäj wet yok, “Fwenhola olhämetna häp lhamel tä ot'äne, olak, Wak'alh n'olhäk, pajche õ'länhen w'asetas tä yätajen, wet nilhokej wak'alh t'at. Lhuyay, hoyay n'oye tä owo okäjyaja'pe olhäs tä tawhayey.”

⁵ “Mat häp lhamel tä niyat t'änetso ihohiyet'a. Elh ihoye lelafwek, wet elh ihoye lechumet,

⁶ wet iyhäj itsokwethä häp niyat lakawos wet ipäjwethä yäk y'inhen.

⁷ Tä niyat iläte, wuj tä lewäk ihi wet ichen laka sip'äl, ne'tek ilänhen anikoyistso wet iwunho häp hupuy tä lew'et.

⁸ Wet nech'e tahuyej lakawos iyhäj wet yok, Nilhokej wak'alh t'at yämthilek owo okäjyaja'pe olhäs tä tawhayey, mat häp lhamel tä pajche ot'äneje t'uhawethiyejt'a.

⁹ Tä mälhyejtso, amel hoyaye hupuy kawayhil tä wichi letajwet, wet elh at che häpe che lew'en äneje okäjyaj.

¹⁰ “Wet lakawos yikhen tä ihoye hup kawayhil, wet ihutwek nilhokej wichi tä nichutej, häp iyhäj tä isen lhäy'e iyhäj tä ni'isahen. Wet nech'e wichi tapoyej häp hup tä n'okäjyaj ihi.

¹¹ “Tä paj niyat ihochufwi huptso, t'uhläk itetshan lhamel. Wet hiw'en hin'o tä nitw'uyahi lew'uy tä isilataj,

¹² wet tay'ätshane tä yok, Yaelh, ¿chipte tä leho kana wet kaw'uyahi haw'uy tä t'uhawetej tä lhehi okäjyajna? “Mat hin'otso yok tam.

¹³ Wet niyat tahuyej lakawos wet yok, Äythen takweyey lhäy'e takäläy wet thate honataj tä alhoye, häpkhilek ihi lhafwyhayaj wet wuj tä äytaj.”

¹⁴ Wet Jesús y'isej lhämet tä yok: –Matche, wujpe wichi tä Dios t'äneje Leniyatyaj, mat wujit'a'pe lhamel tä nichätho.

“Achaje niyat m'ak tä lewuk, mat achaje Dios m'ak tä Lewuk lham Dios”

¹⁵ Tä tajyäme täjtso, Fariseo lhayis yikhen wet y'ajwek lehusey tä tay'ätshane Jesús, yämthilek iche lhämet che lhamel yen tesayej.

¹⁶ Tä mälhyejtso, ichene Jesús elhpej lhamel lechufwenkay, lhäy'e iyhäj tä ihän Herodes lhayis. Tä lhamel nichäte, tahuyej tä yok: –Maestro, olhamel ohanej tä ahäpe hin'o tä matche m'ak tä lhäme, wet nehit katsik lenowaye, wet tek letetshan hin'ol tä fwetaj häpehen iyhäj tä isen, mat lechufwenej t'at wichi m'ak tä Dios ne'tek lhamel iwoye.

¹⁷ Tä mälhyejtso, fwel n'ohohen atichunhayaj. ¿Hä is t'at tä otis häp niyat Romano tä t'alhpe impuestos, wok kha?

¹⁸ Mat Jesús nitäfwelej tä lhamel fwetaj ikanej, wet yok: –¡A'akantses! ¿Chipte tä lhelhtay n'oye?

¹⁹ Lhek päyen n'oye chinaj t'äj tä õtiskanejpe impuesto. Wet lhamel ichäje,

²⁰ wet lham tay'ätshane tä yok: –¿Atsi tä lepeyak lhäy'e lhey tä i'pe?

²¹ Lhamel nichulho wet yok: –Häpe t'at niyat Romano. Wet Jesús yok: –Tä mälhyejtso, achaje niyat Romano häp m'ak tä lewuk, mat achaje Dios häp m'ak tä Lewuk lham Dios.

²² Tä lhamel iläte lhämettso, wuj tä iseltejen. Wet ileyej wet yikhen.

Jesús yäme tä n'op'itseyhay inukwephä t'at

²³ Iche p'ante Judío lhayis iyhäj tä lhey Saduceo lhayis, fwetaj n'op'itseyhay ninuyakwephä. Wet ifwalatso elhpej lhamel ihoye Jesús wet yok:

²⁴ –Maestro, häp Moisés lhämet yop'antekwe, “Che hin'o ileyej honhat mat leles ihihit'a, t'uhawetej che lech'inij icheyäjo lew'et wet yen ch'efwaya häp tesa, yämthilek iche leles tä tälhe elh tä pajche y'il.”

²⁵ Tä mälhyejtso, iche p'ante siete hin'ol tä lhalepuhfwas tä in'oyejen. Wet elh tä ichun iwo lech'efwaya, mat tä ileyej honhat wet leles ihihit'a. Wet lech'inij tä ichunche äp iyej laka tesa,

²⁶ mat häte tä ileyej honhat wet leles ihihit'a. Wet äp lech'inij elh äp iyej, mat äp hätet iwoye lechilalis. Wet mälhyej p'antetso pajtha nofwej häp lhamel tä ihi siete, mat niwohit elh che leles ihi.

²⁷ Tä lepese atsinha häte ileyej honhat.

²⁸ Tä mälhyej'attso, tä wichi yäme tä inuhikwephäla häp n'op'itseyhay yämthilek äp yachajo che iläyhen, ¿atsihila elh lhamel tä siete tä atsinhana lech'efwa? Tsi pajche nilhokej lhamel tä iyej.

²⁹ Jesús nichulho lhamel wet yok: –Lewetahen amel, tsi letäfwenhiyejt'a Dios lhämtes tä ihi Lehi lhäy'e häp Dios lakhajyhayaj.

³⁰ Tsi che inukwephä n'op'itseyhay, hin'ol lhäy'e atsinhay nemla tawhayeyhen, häp tä mälhhiyeja iwoye häp ángeles tä ipuleye.

³¹ Wet tä õyäme tä n'op'itseyhay inukwephä, ¿hä tek leyahyenay m'ak tä Dios ifwel amhohen tä yok,

³² “Ohäpe Abraham laka Dios, Isaac laka Dios, wet Jacob laka Dios”? Wet häp tä mälhyejtso, Dios häpe t'at wichi tä iläyhen laka Dios, tej tä pajche lhamel ileyej honhat.

³³ Tä wichi iläte täja, wet lhäy'e lhip tä iseltejen Jesús lechufwenyaj.

Dios lhämtes tä iyhäj lefwetes

³⁴ Tä Fariseo lhayis ihanch'oye tä Saduceo lhayis ihanhiyejt'a lhämet che nichulhejlä häp Jesús, wet häp tä lhaihutwek lhamel.

³⁵ Wet elh lhamel tä häpe lewo Ley p'ante tälhe Moisés, ihoye Jesús wet fwetaj yelhteje tä tay'ätshane tä yok:

³⁶ –Maestro, ¿atsi Dios lhämet tä lhäy'e lhip tä laha ihi tä iyej lhämtes iyhäj?

³⁷ Jesús nichulho wet yok: –“Humin Awuk Dios, mälhewek ahusek, lhäy'e mälhewek atichunhayaj.”

³⁸ Häp täja Dios lhämet tä lhamya tä inu'pe iyhäj.

³⁹ Wet elh häte iwoye, yok, “Humin aelh, tech'ayen amej tä alehumin.”

⁴⁰ Häp Dios lhämtesna, häp tä nilhokej Ley p'ante tälhe Moisés lhäy'e profetas chufwenyajay lefwetes.

N'ofwayhthi tä Dios Chenek

⁴¹ Tä Fariseo lhayis kamaj lhaihutwek, Jesús tay'ätshane tä yok:

⁴² –¿Cho atichunhayaj häpet N'ofwayhthi tä Dios Chenek? ¿Atsi tä lhenayek tälhe? Lhamel yok: –Tälhe David.

⁴³ Wet Jesús yok: –Che mälhyejtso, ¿chip iwoye tä Dios laka Espíritu lhaithatho p'ante David wet yämyenlhi tä yok, “Owuk”? Tsi lhämet yok,

⁴⁴ “Lhawuk ifwenho Owuk wet yok, Tayhiphä olhip tä ofwomkat wet otihlachufwi apach'ol häp atayhfwas.”

⁴⁵ Tä mälhyejtso, ¿chip iwoyek N'ofwayhthitso tälhe David, tä lham David yen at Lewuka?

⁴⁶ Wet nehit katsik ihanej lhämet che nichulhejlä häp Jesús, wet tälhe ifwalatso ihichet'a elh che tektshaneje yämthilek tay'ätshaneje m'ak at che häpe.