Mateo 19 - Biblia Wichi

Jesús yäme häpet hin'o chik iwom lech'efwa

¹ Tä Jesús ileyej lhämtestso, yikch'oye Galilea wet ihoye honhat tä Judea lhip tä tumej w'echehi tewok tä Jordán.

² Wujpe wichi tä ihän, wet tä nichäte lhiptso, ichesthen iyhäj tä t'inhayaj länhay.

³ Wet iche Fariseo lhayis iyhäj tä ihoye tä t'uhläk ikanej, wet tay'ätshane tä yok: –¿Hä õ'wahnej hin'o chik iwom lech'efwa chik iche m'ak chik tamenej?

⁴ Jesús nichulho wet yok: –¿Hä tek leyahyenay Dios lhämet tä ihi Lehi tä yäme m'ak tä lham iwoye p'ante tä yenlhi wichi? Tsi yenlhi hin'o wet yenlhi atsinha,

⁵ “wet häp tä tamenej tä hin'o yikch'oye lajcha lhäy'e lako wet lhaip'ajtej lech'efwa, wet lhamel täkwfwasna mälhyej chik weihalha”, yop'antekwe Dios.

⁶ Tä mälhyejtso, nemhit häpe chik täkwfwas mat nech'e weihalha, wet häp tä isit'ak hin'ol isowek häp m'ak tä Dios hip'ajtitwek.

⁷ Fariseo lhayis yok: –¿Chipte tä Moisés lhämet p'ante yok, “Häp hin'o chik häpe chik iwom lech'efwa, is tä hiw'enho papel tä yäme tä iwom atsinha”?

⁸ Jesús nichulho wet yok: –Häp tä at'unhen, häp tä tamenej tä Moisés iwahin amejen chik lewom hach'efwas. Mat tä tälhe tä nech'enyaya, tek mälhyej p'antetso.

⁹ Wet häp tä ofwel amhohen tä oyok, Tajlhama chik hin'o lech'efwa häpe atsinha tä matche tä elh t'at tä neya katsik häpe, häp tä is tä ileyej. Mat chik kahäpeya täjtso chik tamenej tä iwom lech'efwa, wet iyej elh, oyok, iwo lakain'oyaja.

¹⁰ Tä lechufwenkay iläte täja, wet yok: –Chik mälhyejtso, tajlhamat chik hin'o niwoya lech'efwaya.

¹¹ Jesús nichulho lhamel wet yok: –Nilhokhiyejt'a wichi tä ikalhi täjtso, ts'ilak lhamel tä Dios hiw'enhomche yämlek ikalhi.

¹² Tsi iche hin'ol tä nikalhahi chik iwo lech'efwaya. Elhpej nikalhahi tsi tälhejot lako kachowej tä t'isan niwatahlä atsinha, wet iyhäj nikalhahi tsi hin'ol ilehtej tä iwatlä. Wet iche iyhäj tä matche tä tach'ote Dios Niyatyaj, häp tä tamenej tä niwoya lech'efwaya. Elh chik häpe chik ikalhi täjtso, is chik iwoye t'at.

Jesús itiyej lakäpfwayaj tä is häp nä'tshas

¹³ Wet wichi ihäne nä'tshas häp Jesús yämlek itiche'pe takweyey wet iwo t'alhyaja'pe. Mat lechufwenkay ifwonlä wichitso.

¹⁴ Mat Jesús yok: –Ch'anlhaye nä'tshas, yej n'äyejo tä iho n'oye. Tsi wichi tä ihi Dios Niyatyaj häpe lhamel tä hätet iwoye nä'tshasna.

¹⁵ Wet itiche'pe takweyey, tä ileyej wet yik.

Hin'o tä hiw'en m'ayek tay'ätshane Jesús

¹⁶ Wet iche häp hin'o mamse tä ihoye Jesús wet tay'ätshane tä yok: –Maestro, ¿atsi m'ak tä is chik owoye häpkhilek in'oyej ow'atshancheyaj tä t'un?

¹⁷ Jesús nichulho wet yok: –¿Chipte tä letay'ätshanej n'oye m'ak tä is? Weihalha tä is, häpe Dios. Chik let'uhläk lhehi haw'atshancheyaj tä t'un, woye Dios lhämtes tä ihi Lehi.

¹⁸ Wet mamse yok: –¿Atsi lhämtes iyhäj tä häpe? Jesús yok: –“Yej lelän aelh, yej lewo akain'oyaja, yej let'etan, yej lesufwkane aelh,

¹⁹ humin ajcha lhäy'e ako, wet humin aelh, tech'ayen amej tä alehumin.”

²⁰ Wet mamse yok: –Nilhokej lhämtestso owoye t'at. ¿Atsi m'ak tä kamaj tatäy n'oyej?

²¹ Jesús nichulho wet yok: –Chik let'uhläk awak'alh yämlek i'amej haw'atshancheyaj tä t'un, mäh wom nilhokej m'ak tä lew'en, w'enhomche p'elitses, wet akäywet ihla puleye. Wet ache n'okwe.

²² Tä mamse iläte täja, yik, lefwitajayaj ihi, tsi häpe elh tä wuj m'ak tä hiw'en.

²³ Tä mälhyejtso, Jesús tahuyej lechufwenkay wet yok: –Matche tä ofwel amhohen tä wuj tä athaho hin'o tä hiw'en m'ayek yämthilek nichätho Dios Niyatyaj.

²⁴ Lhek tichunache camello, ¡athahit'a chik tiyäjche kanotte! ¡Mat häp hin'o tä hiw'en m'ayek häp tä athaho yämlek nichätho Dios Niyatyaj! Yachajo tä oyok, ¡matche tä atha!

²⁵ Tä lechufwenkay iläte lhämettso, wet nem koyhyaj leselthayaj wet yok: –¿Atsihilak tafway chik mälhyejtso?

²⁶ Jesús iyahin lhamel wet yok: –Häp hin'ol ikalhihit'a täjtso, mat Dios ihanej iwoyneje nilhokej m'ayhay.

²⁷ Wet Pedro yok: –Häp olhamel owomte katsi nilhokej m'ak tä in'oyejen wet onekte amche. ¿Atsihila m'ak chik oisej tä mälhyejtso?

²⁸ Jesús nichulho wet yok: –Matche tä ofwel amhohen, Dios inech'aynhihila nilhokej m'ayhay wet Hin'o Lhäs tatayhiphäla'pe leniyatyaj tä isilataj. Chik nichäte lewhäytso, doce amel tä pajche lenekay n'okwe häte letatayhiphäla'pe aniyatyajay, yämlek wichi tä Israel lhayis tä tälhehen letetsel tä ihi doce ihlachufwi han'ohyaj.

²⁹ Wet elh at chik häpe tä nek n'okwe wet iwom katsi lewukwey, wok lepuhfwas, wok lajcha, wok lako, wok leles, wok laka honhates, ofwel amhohen tä lhäy'ehila lhip m'ak chik ikatej, lhäy'e häp lew'atshancheyaj tä t'un.

³⁰ Mat oyok, wujla'pe lhamel tä ichun, imälhnhenla, wet wujla'pe lhamel tä imälhnhen, häpkhilek ichun.