Marcos 5 - Biblia Wichi

Jesús ichesat welantas länek tä ihi Gerasa

¹ Tä paj wet lhamel nichät lewomek lhip elhe, häp honhat tä lhey Gerasa.

² Tä Jesús inuhchä tä tälho chalana, iche hin'o tä welantas länek tä ihoye, tälhe n'op'itseyhayw'etes,

³ tsi häp tä yen lew'eta. Wet ihit'a katsik ihanej chik itsoklhi,

⁴ tej tä õyäytejpej chinhas häp takäläy lhäy'e takweyey, mat yisthenpej, iwasthiche, wet newache elh tä lakhajyhayaj ihi chik ifwihat.

⁵ Wet ifwalapej honatsipej ilunche t'at häp chenhas lhäy'e n'op'itseyhayw'etes, wet t'änlhi t'at wet lhayistejlhipej tunte lhipey.

⁶ Tä hiw'enlä Jesús tä kamaj atofwehlä, inu alhoho tä yistejlä. Tä nichäte, takhoschufwi

⁷ wet ifwitsenej tä t'än tä yok: –¿Chipte tä katach'anlhaya n'oye, Jesús, Dios tä N'owujtaj Lhäs? Häp tä isej Dios, olhaip'altsen ame, ¡yej wit'äyenn'o!

⁸ M'ak tä tamenej tä iwoynejetso lhämet, häp tä Jesús tahuye ahät tä ihi tä yok: –¡Ahät, mäch'oye hin'otsi!

⁹ Jesús tay'ätshane hin'o tä yok: –¿Chiwoye ey? Lham nichulho wet yok: –Olhey Wujpey, tsi owujpey olhamel.

¹⁰ Wet wuj tä lhaip'altsene Jesús wet yok: –¡Yej chen olhamel tä ahät lhayis tä oihi lhipna!

¹¹ Iche p'ante wujpe kutsi lhayis tä t'ekwethä tä iwhäye chenaj.

¹² Wet ahät lhayis lhahip'altsene Jesús tä yok: –¡Chen n'oyehen kutsi lhayis l'ini, ch'anlha n'oyehen yämthilek otiyäjomche lhamel!

¹³ Jesús iwahnej t'at, wet ahät lhayis inukwephä, tiyäjomche kutsi lhayis, wet lhamelna tä dos mil inukwe alhoho tä tälhpe tä nistakchä, yäk nichätho lewomek wet hich'ahen.

¹⁴ Wet häp hin'ol tä t'uyehen kutsi lhayis, tä lhamel hiw'en tä mälhyejtso, nowayhen wet inukwe alhoho. Tä nichäte hupuy, ifwenho wichi, lhäy'e iyhäj tä ilhipe hupuy, wet wichi yikhen tä iyahne m'ak wit'äyna.

¹⁵ Tä lhamel nichäte Jesús, hiw'en welantas länek tä tatayphä t'at, nech'e lew'uy ihi, is t'at, nemhit häpe hin'o tä welan. Wet wichi wuj tä nowayhen.

¹⁶ Wet lhamel tä hiw'enej m'ak tä iyej welantas länek lhäy'e kutsi lhayis, ifwenhomche iyhäj.

¹⁷ Wet yäme Jesús wet yok: –Olhaip'altsen ame, ¡mäch'oye oka honhatna!

¹⁸ Tä Jesús tiyäjo chalana, wet hin'o tä pajche welantas länek lhahip'altsene tä yok: –Che letach'anlha n'oye, ot'uhläk oyik amche.

¹⁹ Mat Jesús nichulho wet yok: –Kha. Mat mäh äple haw'et lhäy'e apuhfwas, wet fwenhola nilhokej m'ak tä Lhawuk iwoyejne ame lhäy'e tä ahip'altsen.

²⁰ Tä mälhyejtso, yik häp hin'o wet ifwenhomche wichi tä ihi honhattso tä lhey Diez Ciudades häp m'ak tä Jesús iwoyeje. Wet nilhokej lhamel wuj tä iseltejen.

Jairo lhäse. Lhäy'e atsinha tä itsok Jesús lew'uy

²¹ Wet Jesús ihi chalana tä yäple ufw tä pajche tälhe. Tä nichäte, wujpe wichi tä lhaihute tä i'pe inät lhip.

²² Wet näm hin'o elh tä itetshan n'ohusew'et lechumet, lhey Jairo, lham hiw'en Jesús wet takhoschufwi,

²³ wet wuj tä lhahip'altsene tä yok: –Olhäsefwaj tatäy lhimphaj chik y'il. Lhuu, nek ayej n'okwe, tila'pe akweyey yämlek iches wet iläy.

²⁴ Tä Jesús iläte, yikche, wet wuj wichi tä ihän, lhamel lhäy'e lhip tä hip'ajtit tä yik.

²⁵ Wet iche atsinha tä t'inhayaj ihi, w'oytaj tä ilänpej, wet ichespej, mat yachajopej, pajtha doce nekchämes tä mälhyejpejtso.

²⁶ Wet wujpe kachawos tä lham pajche ihoye, wet lhäy'e lhip tä leteläythayaj iyeji m'ak tä lhamel iwoyejepej. Iwom nilhokej m'ak tä iyej mat lechesyaj ihihit'a, nem koyhyaj t'inhayaj tä ilän.

²⁷ Wet tä pajche iläte tä õyämejlhi Jesús, häp tä tamenej tä lhailhahtej wichi, wet iho w'echehi Jesús wet itsok lew'uy lhip.

²⁸ Tsi letichunhayaj yok, “Tejlak lew'uy lhip che okatej, ochesla.”

²⁹ Häpet tä mälhyejtso, lew'oyis takasit wet ilät lhame tä noj t'inhayaj.

³⁰ Wet Jesús nech'e ilät lhame tä inuphä lhip lakhajyhayaj, wet nitilhaklä wichi wet tay'ätshane tä yok: –¿Atsin'e tä häpe tä itsok ow'uy lhip?

³¹ Mat lechufwenkay yok: –¿Chipte tä lhok, “¿Atsin'e tä itsokn'o?” Lew'en tä wichi ahip'ajtit.

³² Mat lham tujlhache tä iyahinch'oye elh tä häpe tä itsokn'e.

³³ Wet atsinha tachettiyejche lenowayhyaj tsi lham ihanej t'at häp m'ak tä iwoyene. Wet nech'e ihoye wet takhoschufwi, wet ifwenho nilhokej m'ak tä lewit'äyhyaj lhäy'e tä nech'e iches.

³⁴ Tä ileyej, wet Jesús yok: –Yäse, ekhahyaj tä aichesat. Mäh, atamsek ihi, noj anhayaj.

³⁵ Tä kamaj Jesús yämhoplhi atsinha, nämhen iyhäj tä tälhe Jairo lew'et, lhamel ifwenho Jairo tä yok: –Äse pajchene ileyej honhat. Yej lhaklitejlhi häp Maestro.

³⁶ Mat Jesús tach'ahuhiyet'a lhämtes, wet tahuyej Jairo wet yok: –Yej nuhat amho, mat ekhaye.

³⁷ Wet yikhen, tajlhama Pedro lhäy'e Santiago lhäy'e lech'inij Juan tä ichäj lhamche.

³⁸ Tä nichäte Jairo lew'et, hiw'en wichi tä iwo huyaja, lhamel wuj tä tafwchehchä wet t'änwethä.

³⁹ Wet Jesús tiyäjchufwi hup wet tahuyej lhamel tä yok: –¿Chipte tä lewoyay huyaja wet letafwchehchä? Lhutsha y'inhit'a, imäfwaj t'at.

⁴⁰ Tä wichi iläte, t'ischeyejen. Mat lham ichen alhoye nilhokej, wet ichäj lhamche häp lhutsha lajcha lhäy'e lako, lhäy'e lham let'unfwas, wet tiyäjo hupch'o tä lhutsha ihi.

⁴¹ Wet tachuma takwey wet tahuyej tä yok: –Talita, kum. (Häp lhämtesna yok, Lhutsha, am tä oyäm ame, oyok, Nephä.)

⁴² Wet lhutsha tä hiw'en doce nekchämes, nephä wet w'eleklhi. Wet wichi wuj tä t'iseltejen.

⁴³ Mat Jesús yäm äytajejche lhämet tä ifwenhomche tä yok: –Yej fwenhola elh at che häpe. Mat athana w'enho lhutsha m'ak che tuj.