Marcos 4 - Biblia Wichi

Jesús lhämet tä itech'aynej hin'o tä tutchey

¹ Wet Jesús yachajo tä iwo lechufwenyaja tä iwhäye lewomek. Wet tä wujpe wichi tä lhaihute, lham tiyäjo chalana tä i'pe inät wet tatayhiphä, wet wichi i'pe lewomek lhip.

² Wet nech'e ichufwenejen wujpe m'ayhay, mat itech'aynej tähesna wet yok:

³ –Lhek ch'ahuyaye täja: Iche p'ante hin'o tä n'utchenaj, yik tä tutchey.

⁴ Wet tä itsäype honhat yachuyaj lhoy, iche iyhäj tä nichätho n'äyij, wet nämhen afwenchey wet tuj.

⁵ Iyhäj nichätho honhat lhip tä wuj tuntey wet niwuja honhat tä i'pe. Wet yofwajkwet tälh häp lhoy, mat tä honhat niwuja tä i'pe tuntey,

⁶ wet tä wuj tä chayokwe, y'ohen letälhes, wet tä lefwettsil ni'tofwahchä, tamchäy t'at.

⁷ Iyhäj nichätho ch'uthanil, wet tä ch'uthanil lhaichihelit, hip'o'pe wet niwohit lhaya.

⁸ Mat iche iyhäj tä nichätho honhat tä is, wet tälh wet lhaichihelit wet wuj tä iwo lhaya. Iche yachuyaj lhofwaj tä ihi treinta lhay tä iwoye, wet iyhäj sesenta, wet iyhäj cien.

⁹ “¡Elh chik lech'otey ihi, ch'ahuye täjtso!”

M'ak tä tamenej tä Jesús itech'aynej m'ayhay häp lhämtes

¹⁰ Tä yikhen wichi, Jesús lechufwenkay tä ihi doce lhäy'e iyhäj tä iyej, tay'ätshane tä yok: –¿Atsi m'ak tä häpe ämtes tä letech'aynej m'ayhay?

¹¹ Lham nichulho tä yok: –Häp amel õ'täfwnhat amejen m'ak tä nin'äla tä häpe Dios Niyatyaj. Mat wichi iyhäj nilhokej m'ak tä ofwenho otech'aynej m'ak chik häpe.

¹² Wet häp tä “Tej chik iyahin, mat hiw'enhit'a, wet tej chik iläte, mat ihanhiyejt'a, häpkhilek niwohit lehusey iyhäja wet Dios nitäyhata letes.”

Jesús ikalelhät lhämet tä itech'aynej hin'o tä tutchey

¹³ Wet Jesús tahuyej lechufwenkay tä yok: –¿Hä tek lehanayej olhämet tä otech'aynej n'utchenaj? Che mälhyej'attso, ¿chip iwoyek lehanhiyeja iyhäj olhämtes tä otech'aynej m'ayhay?

¹⁴ Okalelhät amho: Häp hin'o tä tutchey, hätet iwoye elh tä yen lhämeta Dios lhämet.

¹⁵ Wet iche wichi tä hätet iwoye yachuyaj lhoy tä nichätho n'äyij. Lhamel iläte Dios lhämet, mat näm Satanás wet isoyej tä ihi lehusek.

¹⁶ Wet iyhäj hätet iwoye lhoy tä nichätho honhat tä tuntey ihi. Lhamel iläte Dios lhämet wet wuj tä ihumin wet iti lhamejen.

¹⁷ Mat tä tet iwoyek lefwettsil ni'tofwahchä, wujit'a tä t'unhiche lhamel, wet che näm ifwalas tä atha len'äyij wok õ'tiyej n'oka'tshayaj lhamel, Dios lhämet tä tamenej, yofwajkwet ileyej.

¹⁸ Wet iche iyhäj tä hätet iwoye lhoy tä nichätho ch'uthanil. Lhamel tach'ahuye Dios lhämet,

¹⁹ mat wuj tä nilhak'alch'oye m'ayhay tä ihonhatena, wet ikan lhamejen tä inech'etpejlä wuj chinaj t'äj lhäy'e m'ayhay iyhäj. Häp tähesna tiyäjo lhamel wet hip'o'pe Dios lhämet, wet ihanhiyejt'a che iwo lhaya.

²⁰ Mat iche iyhäj tä hätet iwoye lhoy tä nichätho honhat tä is. Lhamel tach'ahuye Dios lhämet wet iti lhamejen, wet iwo lhaya. Iche iyhäj tä treinta lhay tä iwoye, wet iyhäj sesenta, wet iyhäj cien.

Jesús lhämet tä itech'aynej n'ochäkw

²¹ Wet äp yok: –Che hin'o tachuma lechäkw, ¿hä hip'o'pe? ¡Kha! ¿Wok hä itichufwi lemäwet? ¡Kha! Mat m'ak tä iwoye, itonitphä häpkhilek ihutunpe honhat.

²² Wet häp tä mälhyej'attso, m'ak at che häpe che õ'iskat, õhn'älthila, wet m'ak at che häpe che õ'thahyen, kalelhäjila.

²³ ¡Elh che lech'otey ihi, ch'ahuye täjtso!

²⁴ Wet äp yok: –Tetshanay m'ak tä lelätaye. Che wuj tä letach'ahuye, Dios hiw'awlhatlahlä ahanyaj che hiw'en amho, wet äp y'isiyeja lhip.

²⁵ Tsi elh che tach'ahuye m'ak tä oyäme, Dios y'isiyeja lhip lehanyaj. Mat elh che nitch'ahuyaye m'ak tä oyäme, Dios isohiyeja lehanyaj lhimphaj tä iyej.

Jesús lhämet tä itech'aynej yachuyaj lhoy tä lhaichihelit

²⁶ Wet Jesús äp yok: –Häp Dios Niyatyaj hätet iwoye täja: Hin'o tutchey tä itsäype honhat yachuyaj lhoy.

²⁷ Wet tä honatsipej hin'otso imä, wet tä ifwalapej nephä, mat yachuyaj lhoy tälh t'at wet lhaichihelit, lhamhit'ak yenlhi, wet ihanhiyejt'a m'ak tä lhaiwoyneje tä lhaichihelit.

²⁸ Tsi tä tälho honhat, lhayenlhi t'at. Chunkat inuphä letälhes, tä paj nech'e iwo lech'anfwasa, tä paj iwo lhaya.

²⁹ Wet tä wak'alh, hin'o ilanhi tsi taj lewhäy.

Jesús lhämet tä itech'aynej mostaza lhofwaj

³⁰ Wet häte Jesús äp yok: –¿Atsi m'ak tä häte iwoye Dios Niyatyaj? Wok ¿atsi m'ak che y'atech'aynej?

³¹ Oyok, hätet iwoye häp mostaza lhofwaj tä õ'thatho honhat. Häpe t'at m'ak tä hich'atej tä lhämsaj, inu'pe yachuyaj lhoy iyhäj tä niwusa tä ihonhate.

³² Mat tä paj inuphä wet lhaichihelit yäk inu'pe nilhokej yachuyaj iyhäj, wet iwo lhachala tä wus wet afwenchey iwo lhupisahi.

Häpet Jesús lhämtes tä itech'aynej m'ayhay

³³ Häp täja tä iwoye Jesús tä yenpej lechufwenyaja häp Dios lhämet. Wujpe lhämtes tä iwoye tä itech'aynej m'ayhay, mälhyej tähestso, mat tek inuhatpe wichi letäfwnhayaj.

³⁴ Matche, ihichet'a lhämet che iwoye che nitech'aynayej m'ak che häpe. Mat tä ts'ilak lechufwenkay tä iyej, y'ithatho nilhokej.

Jesús ikasthayen ihwok lhäy'e inät tä iwo lhetheya

³⁵ Häp ifwalatso tä nech'e ichalajchä, Jesús tahuyej lechufwenkay wet yok: –N'ekhen, n'aho lewomek lhip elhe.

³⁶ Tä mälhyejtso, lhamel yikch'oye wichi wet tiyäjo chalana tä Jesús ihi wet yikhen. Wet iche chalanas iyhäj tä yikche.

³⁷ Wet näm ihwok tä äytaji yäk iwo lhetheya inät wet nitsäylhaho lehi.

³⁸ Mat Jesús imä t'at tä ilechäse, lhetek i'pe n'ot'alaj tä ihi. Wet lhamel nech'e hin'omhatlhi wet tahuyej tä yok: –¡Maestro! ¿Hä tek lelhak'alhi n'amejen tä y'ach'ahen?

³⁹ Jesús nephä wet ifwone ihwok, wet tahuye lewomek wet yok: –¡Wo atamseka! Wet tatäy ihwok wet wuj tä iwo letamseka.

⁴⁰ Wet Jesús tahuyej lechufwenkay wet yok: –¿Chipte tä lenowayay? ¿Hä kamaj achayaj ihihit'a amel?

⁴¹ Mat lhamel lenowayhyaj tapokwe wet yok: –¿Atsi tä häpe hin'ona? ¡Tsi y'aje ihwok lhäy'e lewomek tä iwoye lhämet!