Marcos 3 - Biblia Wichi

Jesús ichesat hin'o tä takwech'o tamchäy

¹ Wet Jesús äp tiyäjchufwi n'ohusew'et häp ifwala tä n'ot'elakw'et, wet iche hin'o tä takwech'o tamchäy.

² Wet Fariseo lhayis iyahin Jesús, lhamel t'uhläk hiw'en che ichesat hin'otso häp ifwala tä n'ot'elakw'et, yämthilek iche m'ak che yen tesayej.

³ Wet Jesús tahuyej hin'o wet yok: –Nephä, ho alhoho.

⁴ Wet nech'e tay'ätshane lhamel wet yok: –¿Atsi m'ak tä õ'wahnej che elh yenlhi häp ifwala tä n'ot'elakw'et? ¿Hä häpe m'ak tä is, wok iwit'äyen? ¿Hä is che ifwayhtejen lewit'äyhyaj elh, wok itäyhat elh? Mat newache lhamel lhämet.

⁵ Wet Jesús lewäk ihi tä iyahin lhamel, wet wuj lefwitajayaj tsi lehusey t'unhen. Wet tahuyej hin'o wet yok: –Piyen akwey. Wet hin'o ipiyen takwey wet iches.

⁶ Mat Fariseo lhayis inukwephä, wet lhamel lhäy'e wichi tä ihän niyat Herodes nech'e iwo lehuseya'pe m'ak che fwetaj iwoyeje Jesús yämthilek ilän.

Wujpe wichi lhaihuthiwek lewomek lhip

⁷ Jesús yikch'oye täja, lhäy'e lechufwenkay, ihoye lewomek lhip. Wet wujpe wichi tä yikche tä tälhe Galilea,

⁸ häte iyhäj tä tälhe Judea, lhäy'e Jerusalén, lhäy'e honhat tä Idumea, lhäy'e lhipey tä Tiro lhäy'e Sidón, lhäy'e Jordán tumejlä lhip tä ifwala tälhche. Tsi lhamel ihanch'oye m'ayhay tä Jesús yenlhi, häp tä tamenej tä ihoye.

⁹ Tä mälhyejtso, lham tahuyejen lechufwenkay wet yok: –Waklhat n'oho chalanafwaj tä i'pe inät häpkhilek wichi nip'ajtitan'o.

¹⁰ Tsi tä ichesthen wujpe wichi, häp tä tamenej tä nilhokej t'inhayaj länhay lhaiteläfwite tä t'upejläk takhospe häp lham wet tachumpe.

¹¹ Wet tä ahät lhayis hiw'enpej Jesús, lhamel takhoschufwi wet t'änhen tä yok: –¡Ahäpe Dios Lhäs!

¹² Mat Jesús yämpej äytaj lhämet tä n'äyejo lhamel yämthilek nifwelaho wichi.

Jesús itshupyene doce apóstoles

¹³ Tajyäme täja wet Jesús iho'pe chenaj wet t'äne iyhäj tä lham tatshupiye. Wet tä lhamel ihoye,

^14-15 nech'e t'ähi doce lhamel wet itshupyeneje yämthilek iyej wet yikchufwi Dios lhämtes, wet äp len'ohyaj ihi yämthilek inuhatchephä ahät lhayis. Wet iwo lheya lhameltso apóstoles, wok oyok, lakachenhay tä lhamenya.

¹⁶ Lhamel häpehen Simón tä äp Jesús yen lheya Pedro,

¹⁷ Santiago lhäy'e lech'inij Juan, häp Zebedeo leles, tä Jesús iwuntej Boanerges, wok õyok, Fwitsek Les,

¹⁸ Andrés, Felipe, Bartolomé, Mateo, Tomás, Santiago tä Alfeo lhäs, häte Tadeo, Simón tä häpe p'ante elh hin'ol tä tatayhlä Romano lhayis tä lhayen niyateyayej Judío lhayis,

¹⁹ lhäy'e Judas Iscariote, häp lham tä yachajila Jesús.

Õyäme tä Satanás lakhajyhayaj tä iyej Jesús

²⁰ Tä tajyäme täjtso, Jesús yäple lew'et, wet yachajo tä wujpe wichi tä lhaihute, wet lham lhäy'e lechufwenkay letamsek ihiyejit'a yämlek tuj lhäk.

²¹ Tä Jesús lepuhfwas ihanej, ihoye, t'uhläk ichäj, tsi lhamel yok, –Oyenek t'inhayaj tä iwoyneje.

²² Häte iche elhpej hin'ol tä lhayen lewosayej Ley p'ante tälhe Moisés tä pajche nämhen tälhe Jerusalén. Lhamel yok: –Häp hin'otsi, Beelzebú tä ahät lhayis kaniyat tä iyej, häp tä hiw'enho lakhajyhayaj yämthilek inuhatchephä ahät lhayis.

²³ Mat Jesús t'äne lhamel wet ifwenho m'ak tä itech'aynej tä yok: –¿Chip iwoye chik Satanás inuhatphä Satanás tä lham t'at?

²⁴ Tsi honhat chik häpe, chik lhaich'esaj n'oniyatyaj tä ihi, tatay lahilä, wet tatäy t'at.

²⁵ Wet chik wichi tä lhalew'et lheley lhahiw'enhathen, nofwila.

²⁶ Wet häp tä mälhyej'attso, chik Satanás lhahiw'enhat wet tatayhlä ahät lhayis, tatäy t'at Satanás, nofwila.

²⁷ “Nehit katsik ihanej iwoyneje chik tiyäjchufwi hin'o tä takhajay lewukwe yämlek isoyej m'ak tä iyej, chik nichunkata tä inayhit hin'o. Mat chik ichunkat tä inayhit, nech'e häpkhilek ihanej tä isolhi.

²⁸ “Matche tä ofwel amhohen tä oyok, Dios itäyhthiyeja letes häp wichi nilhokej lech'isukyajay lhäy'e lhämtes chik häpe tä ni'isachehen tä isitäynej lham.

²⁹ Mat tek itäyhthiyeja letes elh at chik häpe chik isitäynej lhämtes tä ni'isachehen häp Espíritu tä Dios T'amajchet, mat letes ihiyeja yämlek tiyäj'attsiy.”

³⁰ Jesús iwoyeje täjtso tsi lhamel yäme tä ahät tä iyej.

Häp Jesús lech'inhis lhäy'e lako

³¹ Tä paj wet nämhen Jesús lech'inhis lhäy'e lako María, lhamel takasit alhoye wet iwo lechenekaye tä t'äne Jesús.

³² Wet wichi tä tatachephä tä iwhäye Jesús, ifwenho tä yok: –Ako lhäy'e hach'inhis lhäy'e hach'inhälis, lhamel i'alhoye tä t'u amche.

³³ Mat Jesús yok: –¿Atsi tä häpehen oko lhäy'e opuhfwas?

³⁴ Wet iyahin lhamel tä iwhäye wet yok: –Lhamelni häp tä oko wet opuhfwas.

³⁵ Tsi elh at che häpe che iwoye Dios lenech'ethayaj, häp tä och'inij, wet och'inhä, wet oko.