Levítico 24 - Biblia Wichi

Lhawuk t'uhläk nilhokej honatsipej tä y'ohomche n'ochäkwis

¹ Lhawuk äp tahuyej Moisés wet yok:

² –Fwenho Israel lhayis, Is chik ihänpej ame aceite tä olivo lhits'i tä lhäy'e lhip tä is, häpkhilek nilhokej honatsipej tä y'ohomche n'ochäkwis

³ tä ihi carpa tä owukwe lhip tä tumejlä lech'o tä sak'al hip'o'pe tä Arca tä Ot'amajchet tä olhämtes lehi ihi. Wet is chik Aarón yenpejwethä n'ochäkwis, häpkhilek tälhe tä honaj pajla'tha ifwala y'ohomche t'at tä ihi tä ottache. Häp täja olhämet, wet is chik Israel lhayis iti lhamejen pajla'tha nichäte leles tä lepes lheley.

⁴ Aarón yenhilhila n'ochäkwis tä ihi lehi tä oro tä ts'ilak, häpkhilek y'ohomche t'at tä ihi tä ottache.

Pan tä Lhawuk t'awayhtes

⁵ “Is chik õtchuma harina tä matche tä is wet õyenejwethä pan tä ihi doce, tä cuatro kilos y medio elh tefwajpeji.

⁶ Wet is chik õ'tihi täkwfwas tä õ'piyen, wet õ'ti'pe mesa tä oro tä ts'ilak tä ihi tä ottache.

⁷ Tefwajpejni häp pan tä õ'piyen õ'tsäyhlawhäye incienso tä ts'ilak, wet õ'wunhihola häpkhilek olham ontichunche.

⁸ Chik nichätepej ifwala tä n'ot'elakw'et, iwohiyet'ak Aarón nitiyahi tä ottache häp panna. Wet sacerdotes iyhäj tä ihichela, is chik nileyache, tsi häp tä oyen Israel lhayis keya.

⁹ Wet panna häp tä õhw'enhihola Aarón lhäy'e sacerdotes tä leles, häpkhilek lhamel tufw tä ihi honhat lhip tä n'ot'amajchet. Tsi otw'ayhtesna matche tä ot'amajchet, inu'pe otw'ayhtes iyhäj tä õ'wunhomche tä õ'wujyen n'oyej.”

Lhawuk ne'tek õ'län elh chik häpe chik itiyej lhämtes tä ni'isa

^10-11 Iche hin'o tä iyej Israel lhayis tä lako häp Israel lhayis ka'tsinha wet lajcha häpe Egipto lhele. Atsinha tä lhäs häp hin'otso lhey Selomit, Dibri tä lhäse, tälhe wichi tä tälhe letes p'ante Dan. Wet hin'otso, lhäy'e häp Israel lhayis elh, lhamel ihi t'at wichi lew'et wet tachumej lhämtes. Hin'o tä lako Israel lhayis ka'tsinha itiyej lhämtes tä ni'isa häp Lhawuk lhey. Wet tä mälhyejtso lhämtes, wet õ'häne Moisés.

¹² Wet lhamel t'uye, iniwhihlä Lhawuk lhämet chik ifwenho lhamel.

¹³ Wet Lhawuk nech'e tahuyej Moisés wet yok:

¹⁴ –Is chik õ'hän alhoye, õ'tonphä tä ihi wichi lew'et häp hin'o tä iti n'oyej lhämet tä ni'isa. Wet is chik wichi tä iläte lhämettso lhamel iti'pe takweyey häp lhetek. Wet is chik nilhokej wichi tä ihi lew'etna lhamel ilän, ithatejlhi tuntey.

¹⁵ Wet is chik lefwenho Israel lhayis tä chik iche hin'o tä iti n'oyej lhämtes tä ni'isa tä ohäpe laka Dios, tamenla lhamej chik lewit'äyhyaj ihi

¹⁶ wet õ'länla. Nilhokhiyeja wichi tä ihi lew'et tä ithathiyejlhila tuntey. Elh chik isitäyen olhey, tej chik Israel lhayis elh wok hin'o tä kahäpeya, tet iwoye, is chik õ'län t'at.

Hin'o tä iwoyeje m'ak tä ni'isa elh, is chik õ'tech'aynej m'ak tä lham iwoyeje elh

¹⁷ “Elh chik ilän elh, is chik te lham õ'län.

¹⁸ “Elh chik ilän itshäwet tä elh lelä, is chik ithat lew'etho elh itshäwet.

¹⁹ “Chik elh iwo m'akayej elh, is chik õ'tech'aynej t'at m'ak tä lham iwoyeje elh.

²⁰ Chik inäk'äs elh lhile, is chik õ'näk'äs lhile. Chik iwastho elh telho, is chik õ'wastho tatelho. Chik inäk'äs elh tsote, is chik õ'näk'äs letsote. Is chik leteläythayaj tä iyej tet iwoye elh tä iwit'äyen leteläythayaj.

²¹ “Elh chik ilän itshäwet tä elh lelä, is chik ithat lew'etho elh itshäwet. Wet elh chik ilän elh, is chik te lham õ'län.

²² “Olhämtesna y'aj amehen nilhokej amel, Israel wok kahäpeya Israel. Tsi olham ohäpe amel Awuk Dios.”

Wichi ilän hin'o tä itiyej lhämtes tä ni'isa Lhawuk

²³ Moisés yämhoplhi Israel lhayis, wet lhamel itonphä, ihän alhoye häp elh tä itiyej lhämtes tä ni'isa häp Dios. Wet lhamel ilän, ithatejlhi tuntey. M'ak tä iwoye häp Israel lhayis häpe t'at Lhawuk lhämet tä ifwenho Moisés.