Levítico 16 - Biblia Wichi

Häp ifwala tä õ'wo lahaya wichi lech'isukyaj wet Lhawuk itäyhat letes

¹ Iche p'ante Aarón leles tä y'inhen tä lhamel w'et ihoye t'at Lhawuk. Wet häp tä Lhawuk tahuyej Moisés

² wet yok: –Fwenho häp achila Aarón tä isit'a chik lewhäy at chik häpe tä ihuminche chik ihochufwi owukwech'o tä Lhamya tä Ot'amajchet tä iw'echehi sak'al tä tumejlä. Häp Arca tä Ot'amajchet tä olhämtes lehi, häp tä ihi lech'otso wet õhp'oyejpe m'ak tä oyen lheya Op'altsenyajw'et. Isit'ak Aarón lhaitott'ayne, häpkhilek n'ila. Tsi häp tä olhain'älthila tä oihi pule tä oi'pe Op'altsenyajw'ettso.

³ Chik Aarón tiyäjchufwi lhip tä Lhamya tä Ot'amajchet, is chik ichäj lhamche tolo lhäs häpkhilek ilän tä tiskanejpe n'och'isukyajay, lhäy'e häp tson'ataj tä hin'o häpkhilek iwunho tä yen n'okhayaja n'oyej.

⁴ Is chik y'uche lakay'uche tä ot'amajchet wet lakoset lhäs. Wet is chik yenlhi lakawak, hit'unthi, wet itiphä lhetekp'ot. Häp lew'uyisna häpe lakhäy tä ot'amajchetes wet häpe wesaj tä lino. Wet chik Aarón ayte taw'uyhihiche lakhäyna, is chik inay ayej.

⁵ “Israel lhayis hiw'enhihola täkwfwas kayla lhayis tä hin'ol häp Aarón, häpkhilek õtiskanejpe n'och'isukyaj. Wet äp hiw'enhihola tson'ataj tä hin'o, häpkhilek õ'wunho tä õyen n'okhayaja n'oyej.

⁶ Wet Aarón yachajila n'oye tolo lhäs tä ilän tä tiskanejpe lham lech'isukyaj, wet lhäy'e häp lew'et lheley lech'isukyajay, häpkhilek otäyhtej nilhokej lhamel letes tä ihihlä häp lech'isukyajay tä iwoyepej.

⁷ Chik tajyäme täja, wet tachumhiyela täkwfwas kayla lhayis tä hin'ol, wet itihihila tä olham ottache tä ihi carpa tä owukwe lepe.

⁸ Wet yenhilhila suertes häpkhilek ihanej kayla elh tä hiw'en n'oho, wet elh kayla yokosiyela ts'anis.

⁹ Wet õ'länla kayla tä ichun wet Aarón hiw'enla n'oho tä tiskanejpe n'och'isukyajay.

¹⁰ Wet elh kayla häp tä omälhthilat iläyej tä õyachaj n'oye, wet õyokosiyela honhat tä ts'anis, wet häp tä otäyhtej t'at wichi letes tä ihihlä lech'isukyaj tä iwoyepej.

¹¹ “Mälhyej tä oyämetso, is chik Aarón yachaj n'oye tolo lhäs tä ilän tä tiskanejpe lham lech'isukyaj, wet lhäy'e häp lew'et lheley lech'isukyajay, häpkhilek otäyhtej nilhokej lhamel letes tä ihihlä häp lech'isukyajay tä iwoyepej.

¹² Chik tajyäme täja, wet tachumhiyela häp lehi tä fwiyhol tapoyej tä i'pe altar tä ihi tä ottache. Wet täkwfwas tä tach'awhihola häp incienso mokw tä lenij akäjche. Wet ihänla w'echehi häp sak'al tä tumejlä owukwech'o tä Lhamya tä Ot'amajchet.

¹³ Itsäyhihola incienso itäj wet itihihila tä ottache. Wet letutsaj hip'ohla'pe Op'altsenyajw'et tä i'pe Arca tä Ot'amajchet tä olhämtes lehi. Wet häp tä Aarón y'inhit'ala.

¹⁴ Wet tachumhiyela lhip tolo lhäs lew'oyis, wet y'uythihola lefwuj wet itsäyhla'pe häp Op'altsenyajw'et lhip tä tumej tä ifwala tälhche. Wet nech'e siete tä y'uythihola lefwuj tä itsäype w'oyis häp Op'altsenyajw'et lhip tä tatache.

¹⁵ “Chik tajyäme täja, wet ilänla häp kayla tä tiskanejpe wichi lech'isukyaj. Wet tachumhiyela lew'oyis wet ihänla w'echehi sak'al tä tumejlä häp owukwech'o tä Lhamya tä Ot'amajchet. Wet itsäyhla'pe häp Op'altsenyajw'et, lhäy'e tä ihi tä tatache, tet iwoye m'ak tä iwoyeje häp tolo lew'oyis.

¹⁶ Wet häp tä nech'e nofwila häp lakokhayaj tä ihi lech'o tä Lhamya tä Ot'amajchet tä tälhe Israel lhayis lech'isukyajay tä iwoyepej lhäy'e tä tatay n'ohlä. Wet carpa tä owukwe lhipey iyhäj äpte is chik Aarón ilejlhi, tsi häp tä ihi lechowej wichi tä kok'aye.

¹⁷ Chik Aarón kamaj ichufwi lech'o tä Lhamya tä Ot'amajchet tä t'ukwe chik otäyhtej letes häp wichi, iwohiyet'ak iche elh chik häpe chik ichufwi häp carpa tä owukwe pajla'tha Aarón inuphä. Wet otäyhthiyeja lham letes, lhäy'e lew'et lheley letes tä ihi, wet lhäy'e nilhokej häp Israel lhayis lech'isukyajay tä iwoyepej.

¹⁸ Inuhiphäla wet ilejilhila häp altar tä ihi tä ottache. Wet tachumhiyela lhip häp tolo lew'oyis lhäy'e kayla lew'oyis, wet ilänhiyeja nilhokej häp altar lech'ul.

¹⁹ Y'uythihola lefwuj wet itsäyhla'pe siete veces häp altar, häpkhilek nofw lakokhayaj tä Israel lhayis ikänchiyej wet nech'e häpe ot'amajchet.

²⁰ “Chik Aarón ihämit lechumet tä ilejejlhi lakokhayaj tä iyej häp owukwech'o tä Lhamya tä Ot'amajchet, lhäy'e häp carpa tä owukwe lhipey iyhäj, wet lhäy'e häp altar, wet yachajila n'oye häp kayla tä iläy.

²¹ Wet itihla'pe takwech'ol häp kayla lhetek, wet yämhiyela nilhokej m'ak tä ni'isa tä Israel lhayis iwoye, lhäy'e häp lhamel lakeyis tä tatayej n'ohlä, wet lhäy'e lhamel lech'isukyajay tä iwoyepej. Wet itihla'pe nilhokej häp kayla lhetek. Wet hin'o tä õ'chenlachufwi häp kayla tä ihäne honhat tä ts'anis, chik nichäte wet ilanhihila wet yokositshila.

²² Wet kayla wetahilhila t'at tä ihi ts'anis, tilhäje nilhokej m'ak tä Israel lhayis iwoye tä ni'isa häp honhat tä wichi newahi.

²³ “Chik tajyäme täja, wet Aarón tiyäjlachufwi häp carpa tä owukwe, wet ilanhihila lew'uy tä wesaj tä lino tä taw'uyhi tä ihochufwi lech'o tä Lhamya tä Ot'amajchet, wet hin'äyhlachufwi.

²⁴ Wet lhailejilhila tä ihi honhat lhip tä ot'amajchet, wet chik wak'alh tä iwo lakhäy iyhäja, wet inuhiphäla. Wet nech'e yachajila n'oye itshäwet tä õ'län, wet äp iwunhihola häpkhilek otäyhtej lham letes. Wet äp yachajila n'oye elh itshäwet tä õ'län, wet äp iwunhihola häpkhilek otäyhtej wichi letes.

²⁵ Wet itshäwet tä õ'län tä õtiskanejpe n'och'isukyajay, is chik iwunho t'alhä tä iti'pe altar.

²⁶ Wet hin'o tä yikchufwi häp kayla tä ihäne ts'anis wet ilanhi wet yokostshi, chik tapil iwohiyet'ak nilejahen lew'uyis lhäy'e t'isan. Wet nech'e häpkhila chik is tä tapile häp wichi lew'et.

²⁷ “Häp tolo lhäs lhäy'e kayla tä õ'län tä õtiskanejpe n'och'isukyajay, lew'oyis pajichela õ'hänchufwi owukwech'o tä Lhamya tä Ot'amajchet häpkhilek otäyhtej wichi letes tä ihihlä lech'isukyajay tä iwoyepej. Wet is chik õ'hän alhoye häp t'äj wet t'isan, lhäy'e lheley, lhäy'e lakäs, häpkhilek newahi wichi lew'et tä õ'wunho.

²⁸ Wet hin'o tä iwunho iwohiyet'ak nilejahen lew'uyis lhäy'e t'isan. Wet nech'e häpkhila chik is tä tapile häp wichi lew'et.

²⁹ “Enay akeya täja nekchämpej pajla'tha tiyäj'attsiy: Häp iwel'a tä siete wet ifwala tä diez, häp tä is chik amel alechuyhathen, wet is chik leleyej nilhokej häp achumtes, chik Israel, lhäy'e nilhokej wichi iyhäj tä i'amejen tä kahäpeya Israel lhayis.

³⁰ Tsi häp ifwalatso Sacerdote tä Lhamya t'uhikwela chik otäyhat amejen ates tä ihihlä hach'isukyajay tä lewoyayepej. Wet nech'e ahäpkhihena wichi tä nofw lakokhayaj.

³¹ Häpe ifwala tä ot'amajchet häpkhilek amel lewo elakw'eta wet alechuyhathen. Enay akeya täjtso nekchämpej pajla'tha tiyäj'attsiy.

³² Wet häp Sacerdote tä otshupyeneje len'ohyaj tä matche, wet icheyäjo häp lajcha lew'et tä häpe Sacerdote, is chik lham tä iwoye lechumet tä lakey tä häpkhilek otäyhtej letes häp wichi. Wet taw'uyhihila häp lew'uyis tä ot'amajchetes tä häpe wesas tä lino.

³³ Wet iwohiyela lechumet tä lakey häpkhilek nofw lakokhayaj tä iyej häp owukwech'o tä Lhamya tä Ot'amajchet, lhäy'e tä iyej carpa tä owukwe lhipey iyhäj, lhäy'e häp altar lakokhayaj. Wet häp tä nech'e otäyhthiyeja letes häp sacerdotes wet lhäy'e nilhokej wichi.

³⁴ “Enay akeya täja pajla'tha tiyäj'attsiy: Nekchämpej ihichela tefwaji ifwala tä Sacerdote yenlhi lechumet tä lakey tä häpkhilek otäyhtej nilhokej häp Israel lhayis letes tä ihihlä lech'isukyajay tä iwoyepej.” Wet Sacerdote yenlhi häp lechumet, iwoye m'ak tä Lhawuk ifwenho p'ante Moisés.