Juan 1 - Biblia Wichi

Dios Lhämet lhayen hin'oya

¹ Tä nech'enyaya, pajche p'ante iche Dios Lhämet, wet Dios Lhämettso iyej Dios wet häpe t'at Dios.

² Häp tä nech'enyaya lham iyej t'at Dios.

³ Wet häp tä isej lham, Dios yenlhi nilhokej m'ayhay tä iche, wet niwohit elh m'ayhay tä iche chik nitälhayejo häp lham.

⁴ Lham häpe t'at tä n'ow'atshancheyaj tälhe, wet häp n'ow'atshancheyajtso häpe wichi laka isi.

⁵ Wet isina ihutunpe honataj, wet honataj ihanhiyejt'a chik y'omat.

⁶ Iche p'ante hin'o tä lhey Juan tä Dios ichen

⁷ wet yen laka silätwoya, ne'tek yen lhämetayej isitso häp wichi yämthilek nilhokej t'ekhaye häp tä isej m'ak tä lham Juan yäme.

⁸ Lham häpkhit'a isi, mat näm p'ante yämthilek yen lhämeta isi.

⁹ Häp isi tä matche eyte nämhi p'ante honhatena yämthilek ihutunpe nilhokej wichi.

¹⁰ Häp lham tä häpe Dios Lhämet ihte honhatena, wet tej tä isej lham tä Dios yenlhi p'ante honhat, mat wichi tä i'pe honhat tek nitäfwelej.

¹¹ Lham näme m'ak tä Lewuk, mat laka wichi tek tachumlä.

¹² Mat iche iyhäj tä tachumlä wet t'ekhaye, wet lham hiw'enhomche lewahnhayaj yämthilek nech'e häpehen t'at Dios leles.

¹³ Wet Dios leles t'at, tsi tälhihot'a n'ot'isan wok hin'ol lenech'ethayajay, mat tälho t'at häp Dios.

¹⁴ Häp lham tä häpe Dios Lhämet lhayen hin'oya wet in'amejen, wet m'ak tä matche lhäy'e lehumnhayaj tapoyejej lham. Wet olhamel ow'en t'at lewujyaj tä Lajcha hiw'enho, tsi tajlhamat lham tä häpe Lhäs.

¹⁵ Juan yäm äytaji lhämet tä yen lhämeta wet yok: –Häp täjtsi hin'o tä oyäme naji tä oyok, “Oelh tä nekche on'äyij, len'ohyaj inu'pe olham on'ohyaj, tsi lham pajche iche p'ante tä olham n'am newche.”

¹⁶ Wet wuj tä n'aisej lehumnhayaj tä tapoyej tä takäpfwayeje nilhokej n'amel.

¹⁷ Häp tä isej Moisés iche p'ante Dios lhämtes tä häpe Ley. Mat häp n'ohumnhayaj lhäy'e m'ak tä matche it n'amejen häp tä n'aisej Jesucristo.

¹⁸ Nehit katsik hiw'enpe Dios. Matkat häp Lhäs tä weihalha, wet äp häpe t'at Dios, wet iyej t'at Lajcha, häp tä itäfwnhat n'amejen.

Juan Bautista yen lhämeta Jesucristo

¹⁹ Häp Judío lhayis tä ihi Jerusalén ichen p'ante sacerdotes lhäy'e lech'otfwas tä häpe iyhäj tä tälhe letes p'ante Leví, ne'tek ihoye Juan wet tay'ätshane tä yok: –¿Atsi tä ahäpe?

²⁰ Juan tek lhaifwonlä mat lhaikalelhtho lhamel wet yok: –Ohäpkhit'a N'ofwayhthi tä Dios Chenek.

²¹ Wet häp hin'oltso äp tay'ätshane wet yok: –Tä mälhyejtso, ¿atsi tä ahäpe? ¿Hät ahäpe profeta Elías p'iya? Juan yok: –Ohäpkhit'a. Lhamel tujlhache tä yok: –¿Wok ahäpe Profeta tä toyhlä tä nämla p'iya? Juan yok: –Kha.

²² Wet lhamel äp yok: –¿Atsi tä ahäpe tä mälhyejtso? Lhek fwel n'ohohen, häpkhilek ofwenho lhamel tä lechenek n'ohen häp elh tä lhäme tä ahäpe.

²³ Juan nichulho wet yok: –Olham ohäpe n'opak tä t'än tä tumho ts'anis tä yok, “Enlhi Lhawuk len'äyij, isyen alhoho”, mälhyej profeta Isaías lhämet p'ante.

²⁴ Wet häp iyhäjtso tä äp häpe Fariseo lhayis kachenhay

²⁵ tay'ätshane Juan wet yok: –Tä mälhyejtso tä akahäpeya N'ofwayhthi tä Dios Chenek, wok Elías, wok Profeta tä oyämetso, ¿chipte tä lebautisaynhen wichi?

²⁶ Juan nichulho wet yok: –Olham ts'ilak inät tä obautisaynejen wichi. Mat i'amejen elh tä amel katäfwelayej,

²⁷ lham nekche on'äyij, häpe t'at elh tä olham matche tä n'am t'uhawetej chik olanhi lenisäj t'ak.

²⁸ Häp m'ayhay tä mälhyejentso ihi p'ante honhat lhip tä lhey Betania, häp honhat tä tumej tewok tä lhey Jordán lhip tä tumej hichä, tä Juan ibautisaynhen p'ante wichi.

Jesús häpe elh tä isoyej lech'isukyajay wichi

²⁹ Tä ifwala elh p'ante Juan hiw'enlä Jesús tä ihoye lham, wet yok: –Lhek yahinya, häp täjtsi Tson'ataj Lhäs tä Dios ichen honhatena yämlek isoyej lech'isukyajay wichi.

³⁰ Häpenaj lhamtsi tä oyäme tä oyok, “Iche elh tä nekche on'äyij tä len'ohyaj inu'pe olham on'ohyaj, tsi lham pajche iche p'ante tä olham n'am newche.”

³¹ Häte olham ohanhiyejt'a elh tä häpe häp lham. Mat häp tä oneke, wet obautisaynejen inät Israel lhayis häpkhilek nitäfwelej lham.

³² Wet häte Juan äp yäme tä yok: –Ow'en naji Espíritu tä Dios T'amajchet tä inuhchä tä tälh puleye mälhyet hokwinaj, wet takasit tä nichätpe häp lham.

³³ Mälhyej tä oyäme, olham ohanhiyejt'a elh tä häpe häp lham, mat Dios tä ne'tek obautisaynejen inät wichi, häp tä pajche tahuy n'oyej wet yok, “Häp hin'o chik lew'enche Espíritu tä inuyejchä wet i'pe häp lham, häpkhila elh tä ibautisaynhiyeja wichi häp Espíritu tä Ot'amajchet.”

³⁴ “Eh wet olham ow'en naji, wet ofwel amhohen tä matche tä häpe t'at Dios Lhäs.”

Jesús lechufwenkay tä ichun p'ante

³⁵ Tä ifwala elh p'ante Juan äp yachajo tä ihi häp lhiptso, lhäy'e täkwfwas lechufwenkay.

³⁶ Wet tä hiw'enche Jesús tä yik, wet yok: –Lhek yahinya, häp täjtso Tson'ataj Lhäs tä Dios ichen honhatena.

³⁷ Tä lhamel iläte tä iwoyetso, wet lhamel ihän Jesús.

³⁸ Wet Jesús nitilhakche len'äyij, wet tä hiw'enlä lhamel, tay'ätshane tä yok: –¿Atsi m'ak tä let'uyaykwe? Lhamel nichulho wet yok: –Maestro, ¿chi tä lhehi?

³⁹ Jesús yok: –Lhuyay, yahinpe ow'et. Wet lhamel yikche wet nech'e hiw'enpe lhip tä ihi, wet iyej t'at honajtso.

⁴⁰ Elh lhamel lhey Andrés tä Simón Pedro lechila.

⁴¹ Lham chunkat tä t'ukwe lech'inij, tä hiw'en ifwenho tä yok: –Olhamel ow'enne häp N'ofwayhthi tä Dios Chenek.

⁴² Wet nech'e Andrés ihäne lech'inij häp Jesús. Tä Jesús iyahin, tahuyej tä yok: –Ahäpe Juan lhäs tä lhey Simón, mat athana nech'e eyla Cefas.

Jesús t'äne Felipe lhäy'e Natanael

^43-44 Tä ifwala elh p'ante Jesús yik tä ihoye Galilea, wet hiw'en hin'o tä lhey Felipe tä lew'et Betsaida, häp hupuy tä äp Andrés lhäy'e Pedro häte lew'et. Wet Jesús tahuyej tä yok: –Nek n'okwe.

⁴⁵ Wet Felipe t'ukwe elh tä lhey Natanael, wet ifwenho tä yok: –Olhamel ow'en hin'o tä Moisés lhäy'e profetas lesaynhay p'ante yäme. Häpe t'at Jesús tä tälhe Nazaret, José lhäs.

⁴⁶ Natanael yok: –¿Chip iwoye tä m'ak tä is tälho Nazaret? Felipe nichulho wet yok: –Lhuu, wet lew'enla.

⁴⁷ Tä Jesús hiw'enlä Natanael, wet yok: –Häp täjtsi tä lhamya Israel lhayis elh, häp hin'o tä naj lakanyaja.

⁴⁸ Tä Natanael iläte, tay'ätshane tä yok: –¿Chipte? ¿Matlhat letäfwel at n'oyej? Jesús nichulho wet yok: –Tä kamaj Felipe nit'äna ame, oahiw'en t'at tä lhechufwi higo lhile.

⁴⁹ Tä Natanael iläte täjtso, wet yok: –Maestro, ¡ahäpe t'at Dios Lhäs wet Israel lhayis laka Niyat!

⁵⁰ Jesús nichulho wet yok: –¿Häpe t'at olhämet tä ofwel amho tä oyok, “Oahiw'en tä lhechufwi higo lhile”, wet häp tä tamenej tä let'ekha n'oye? Mat ofwel amho tä ihichela m'ayhay tä inu'pe täjtso chik lew'enla.

⁵¹ Wet Jesús äp yok: –Matche, matche tä ofwel amhohen, Lew'enla pule tä lhaich'enhi, wet äp Dios laka ángeles tä inupejchä wet äp yäpilphäpej tä hätet iwoyek yen n'äyija Hin'o Lhäs.