Jonás 4 - Biblia Wichi

Jonás lewäkw ihi tä hiw'en tä Dios hip'altsene Nínive lheley

¹ Mat Jonás wuj tä nikäjayejlhi täjtso wet lewäkw ihi p'ante.

² Wet iwo let'alhyajaye Lhawuk wet yok: –Iwuk, häp tä mälhyejnajtso olhämet tä kamaj oihi naji oka honhat. Häp tä tumenej okeltshi tä ohoye naji Tarso, tsi ohanej tä ahäpe Dios tä is wet p'altsentsaj wet letäyhthen wichi letes. Tek lekelej awäkw, wuj ahumnhayaj, wet leleyej atasnhayaj tä lewoye.

³ Athana olhaip'altsen ame, Iwuk, so n'oyej ow'atshancheyaj. Häm is chik oleyej honhat, tsi ni'isache chik kamaj oläy.

⁴ Lhawuk ichulho wet yok: –¿Hät is m'ak tä lewoye tä lewäkwäy?

⁵ Wet Jonás yikch'oya hupuy wet itayphä tumejlä lhip tä ifwala tälhche. Wet ihi t'at p'ante, yenlhi lhamho lehupel wet itayphächufwi, itaye t'at p'ante yämlek hiw'en m'ak tä mälhnhiyeja häp Nínive.

⁶ Wet Lhawuk nech'e iwaklhat p'ante amyotaj lhile yämlek lhaichihelit, wet lehupel hip'o'pe Jonás lhetek yäk nahayoj niläna. Wet Jonás wuj tä käjejlhi p'ante häp amyotaj lhiletso.

⁷ Mat tä fwala elh tä nech'e nämtajfwaj, Dios ichene hal'äwo tä tuj häp amyotaj lhile, wet tamchäy.

⁸ Wet tä fwala inuphä Dios ichene ihwokw tä chayohi tälhe tä fwala tälhche, wet fwala ilän Jonás lhetek wet ilät lhame tä y'ilej nahayoj. Wet iwatläk ileyej honhat, wet yok: –Häm is chik oleyej honhat, tsi ni'isache chik kamaj oläy.

⁹ Mat Dios tahuyej wet yok: –¿Hät is m'ak tä lewoye tä lewäkwäyej häp amyotaj lhile tä tamchäy? Jonás ichulho wet yok: –¡Häm is tä otawäkwäy! ¡Oy'ilej owäkw!

¹⁰ Wet Lhawuk yok: –Lhek tetshan olhämet. Häp amyotaj lhiletso, tek häpe am tä letutchey wok lechihelit, mat tälh wet äp fwala elh yofwajkwet tä tamchäy. Mat ow'en tä lep'altsene t'at.

¹¹ Tä mälhyejtso, ¿hät nit'uhawetayej tä olham op'altsene Nínive, häp hupuy tä wujna? Tsi wujpey häp wichi tä ihi tä wetayej len'äyij, lhamel inu'pe ciento veinte mil (120.000), lhäy'e wujpey leläy.