Joel 3 - Biblia Wichi

Lhawuk itihiyeja letasnhayaj häp wichi tä Israel letayhfwas

¹ Lhawuk yok, “Chik nichäte ifwalastso, owohla elha len'äyij Judá lhäy'e Jerusalén.

² Ohutlawek nilhokej wichi, otälhthiyela laka honhatil wet ochäjiyela honhat tä w'awulhchä tä oyen okalelhthayajw'eta. Chik nichäte, oyenla letesa m'ak tä ni'isa tä iwoyeje oka wichi Israel. Tsi ifwtsatkatpehen honhatil häp Israel lhayis, wet hiw'en lhamhomche oka honhat.

³ Wet lhamel ikoyej suerte tä letetnek tä hiw'en lhamhomche oka wichi, wet lhamel iwom n'atfwas tä hin'ol lhäy'e tä atsinhay, wet iwompe chinaj t'äj hat'es lhäy'e atsinhay tä kain'oyaj länhay.

⁴ “Amel tä lheyayhi haw'etes Tiro, Sidón lhäy'e Filistea, ¿atsi m'ak tä tamenej tä letatay n'ohlä? ¿Hä amel lewo haya n'ohlä tä ichen'aj m'ak tä owoyej amehen? ¡Olham yohlakwet ow'en amhohen otasnhayaj tä t'uhawetej!

⁵ Tsi amel let'etanehte oka oro lhäy'e oka plata, wet lechäjaye aka n'ohusew'etes häp m'ayhay tä laha ihi tä Olewuk.

⁶ Wet letachuma wichi tä lew'et Judá lhäy'e Jerusalén, wet lehäne honhat tä atofwe tä kalew'eta, wet lhen häpeya Griego lhayis lakwenkay.

⁷ Tä mälhyej'attso, olham otonhiphäla lhamel tä ihi lhiptso täjte lewom lhamel, wet owohla ateläythayaja tet iwoye tä lhamel iteläytej.

⁸ Wet owomla ales tä ow'enho Judío lhayis, häpkhilek lhamel äp iwom wet hiw'enho Sabá lheley, wichi tä atofwe laka honhat. Häp tä owoyetso tä ohäpe Dios tä matche.”

⁹ ¡Fwelpe honhatil wet kalelhtho häp n'oka'tshayaj! ¡Is chik lhamel tä takhajayhen n'omejiche laka'tshayaj tä iwoye! ¡Amel tä ahin'ol tä takhajayhen, a'ämetaye aka'tshayaj tä lewoye!

¹⁰ Achumetchal tä lesajeji akäsw'et, en afwajnhatesa, wet achumetchal tä lhistejen hup, en ahunisa. Elh tä laj lakhajyhayaja nech'e yohlak, “Otkhajay athana.”

¹¹ ¡Lhuyay tä letälhehen aka honhatil, kelay alhoho wet ahuthiwek honhat tä w'awulhchä tä okalelhthayajw'et! ¡Iwuk Dios, chen alhoho am aka'tshayajwos!

¹² “Wichi is chik lhaiwaklhathen wet tiyäjo honhat tä okalelhthayajw'et. Tsi ottayhihiphäla lhiptso yämthilek owo okalelhthayajayej nilhokej wichi tä ihiche honhates tä iwhäye Israel.

¹³ Tä lhamel matche tä iwo lakeyisa, tech'aynej yachuyaj tä taj lewhäy tä õ'lanhi, wet tech'aynej uvas tä õt'äsiche tä õyen hat'esa, pajla'tha tapokwe lehis.”

¹⁴ Wujtaj'atpey wichi tä ihi honhat tä n'okalelhthayajw'ettso, tsi atott'a alhoho Lhawuk laka ifwala.

¹⁵ Ifwala lhäy'e iwel'a nem isiche, wet katetsel tatäy tä isiche.

¹⁶ Lhawuk iwo lepaka tä tälhe chenaj Sión, tet iwoye t'owalhaj tä y'ip. Wet ifwitsenej lepak tä tälhe Jerusalén, tet iwoye pelhay tä t'ajanlhi, wet pule lhäy'e honhat lhamel w'ahuyehen. Mat Lhawuk häpe laka wichi Israel leletnhawet, wet äp t'uhiyela lhamel.

Lhawuk laka wichi lakäjyaj tä tatay alhoho

¹⁷ “Amel letäfwenhiyeja tä ohäpe Awuk Dios tä oyen w'eta Sión, häp chenaj tä ot'amajchet. Jerusalén häpkhila hupuy tä ot'amajchet, wet wichi tä w'enha lhamej nemla lhayen lewuhuya.

¹⁸ Chik nichäte ifwalatso, amel lew'enla häp äk, tehlat iwoye pelhay tä wuj tä t'ulhpe chenhas, wet tewok n'äyhäy tä ihi Judá inät tapohikwela. Wet ts'ifwik tälhiyela Ow'et wet nitsäyhla'pe honhat tä Sitim.

¹⁹ Mat Egipto wasihila wet Edom ts'anisla, tsi häp tä inuye wichi tä lew'et Judá wet ilänhen lhamel tä laj letesa.

^20-21 Olham owohla hayahlä lhamel wet tek otäyhthiyeja letes. Mat Judá lhäy'e Jerusalén, wichi yenlat lew'etesa yämthilek tiyäj'attsiy, wet olham tä ohäpe Lewuk Dios oyenla w'eta chenaj tä Sión tä oiwhäye lhamel.”