Joel 2 - Biblia Wichi

Chol tet iwoye nifwotas

¹ Afwutache tson'ataj ch'u tä ihi Sión, häp chenaj tä Lhawuk t'amajchet, häpkhilek wichi ihanlä lewit'äyhyaj. Is chik nilhokej amel tä lheyayhi honhat tä Judá lechettiyejchehen anowayhyaj, tsi atott'a alhoho Lhawuk laka ifwala.

² Tehlat iwoyek honatsi i'pe honhat, wet pule lhayis nämla, ichalajilahchä. Häp nifwotaj tä lakhajyhayaj ihi lhäy'e tä äp nitäkw, lhamel lhailhahatpe chenhas, tet iwoye ifwala hutunhay tä nech'e fwamlafwaj. Õ'hanhiyejt'ak õhw'en, wet nipajiyahit chik õhw'enla.

³ Lhamel tet iwoye itäj tä ihämit nilhokej m'ak tä inukwe. Honhat tä kamaj ninuyakwe letamsek t'at, tet iwoye yachuyajw'et tä Edén p'ante. Mat lhip tä pajche tälhche nech'e ts'anis t'at, niwohit m'ak chik imälhehi.

⁴ Tet häp yel'atas wet iläfwenhen, tet iwoye yel'atas tä tiyäjo n'oka'tshayaj.

⁵ Tä lhamel tiyäjche'pe chenhas, lepakas te iwoye kaletas tä n'oka'tshayajchal, wet äp te iwoye hal'äy tä tamchäy lepak tä õ'wunho. Lhamel te iwoye nifwotaj tä wuj tä wak'alh tä iwo laka'tshayaja.

⁶ Wichi tä hiw'en täjtso wet y'ilejen, lhäy'e tä tate'pelis w'enha lhamej.

⁷ Tsi lhamel tet iwoye n'oka'tshayajwos tä inukwe alhoho tä inuyehen letayhfwas wet taw'ulhche'pe n'olafwey tä tuntey tä hupuy lep'otes. Tatshupiche lhip tä inukwe, ihichet'a elh chik tatsay.

⁸ Tafwomhit'awethä lhamejen, elh tefwajni inukwe lhip tä inukwe. Tej tä õhp'ohlä len'äyij, mat tafway lhip elhe tä hap'akwekhen.

⁹ Tä inuye hupuy, inukwe alhoho tä tiyäjpe n'olafwey tä tuntey. Wet taw'ulhche'pe hupuy, tiyäjchehen ventanas, tet iwoye etantses.

¹⁰ Wet honhat w'ahuhi tä ihi tä lhamel tatache, wet pule äp w'ahuye, wet ifwala lhäy'e iwel'a nem isiche, wet katetsel tatäy tä isiche.

¹¹ Wet Lhawuk tä t'än tä ichunlä laka sip'äl, mälhyej iwoye pelhay tä t'ajan. Wet nemhit õ'hanej chik õ'wo t'ufwahtesa sip'ältso, tsi wujtaj'atpey lhamel tä iwoye Lewuk lhämtes. Tsi m'ak wit'äyhyaj tä wuj tä äytaji, häp tä ihi Lhawuk laka ifwala, wet newache elh chik ikalhi.

Joel yachajo tä inityenej wichi chik iwo lehusek elha

¹² Lhawuk yok: “Mat athana tapilay n'oye, mälhetwek achowhal. Yej t'ekhen, änhen wet afwchehchä.”

¹³ Nayahit'a tä lech'esajche haw'uyis tä lefwetaj lhen atetnekayej tä wuj tä alhakli ihi. ¡Woyay ahusey iyhäja wet tapilaye Awuk Dios! Tsi häpe Dios tä is wet äp hap'altsentsaj. Wuj tä lehumnhayaj ihi, wet äp nakenhiyejt'a lewäk, iteläytej t'at. Ihumin tä itäyhtejen wichi letes, ihuminhit'a tä itiyej letasnhayaj.

¹⁴ Elat iwo elha letichunhayaj wet aitasnhihent'a, wet itihla amejen lakäpfwayaj tä häpe yachuyaj lhoy lhäy'e hat'es, häpkhilek lhen Awuk Dios t'awayhata.

¹⁵ Afwutache tson'ataj ch'u tä ihi chenaj tä Sión. Änehen wichi yämthilek lhaihute Lhawuk wet lhaichuyhathen.

¹⁶ Hutwek Dios kawichi wet en t'amajchetesa. Hutwek hin'ol tä thänhäy, n'atfwas, lhäy'e iyhäj tä kamaj tiphen, lhäy'e wichi tä nech'e tewhayeyhen. Is chik lhamelna inukwephä tä tälhchufwi lew'et wet ihoye iyhäj tä lhaihutwek.

¹⁷ Häp sacerdotes tä tachumhilhi Lhawuk Lew'et lhip tä lepe tumej lhip elh wet altar tumej lhip elh, is chik lhamel tafwchehchä wet yok: “Iwuk, täyhtej letes aka wichi. Yej wahnej chik wichi iyhäj iläkwlhi olhamel tä oalewuk. Yej wahnej iyhäj honhatil chik ifwihat. Isit'ak iti n'oyejen lhämet tä leläkwyhanyaj tä yok, ¿Chip ihitso aka Dios?”

Lhawuk hin'ältej lep'altsenyaj häp laka wichi

¹⁸ Lhawuk nech'e hin'älit tä wuj tä ihumin laka honhat wet hip'altsene laka wichi.

¹⁹ Wet nichulho lhamel wet yok: “Lhek yahinya, ochenla amehen yachuyaj lhay, lhäy'e hat'es, lhäy'e aceite, häpkhilek amel lew'en m'ak tä naya wet atamsekis ihi. Nemla oyachajo chik owahnej wichi iyhäj chik ailäkwethä.

²⁰ Te otonthiyela ahilähen häp chol tä tälh tafwojhiye, wet ochenhiyela honhat tä ts'anis. Iyhäj tä ichun nathihola lewomekitaj tä tumej tä ifwala tälhche wet hich'ahen. Wet iyhäj tä imälhechehen len'äyij nathihola lewomekitaj tä tumej tä ifwala y'uy wet hich'ahen, wet najutla lep'itseyhay. ¡Oyämla wus m'ak tä owoye!”

²¹ Honhat, wo akäjyaja wet yej noway, tsi Lhawuk yämla wus m'ak tä iwoye.

²² Amel, itshätäy tä lheyayhi tayhi, yej noway. Tsi häp tä huphas tä i'pe honhat nech'e w'atshanhihena, wet hal'äy iwohla lhaya, wet higos lhäy'e uvas wujlatpe.

²³ Jerusalén lheley, is chik amel akäswethä wet akäjejlhi Awuk Dios. Tsi ichen amehen pelhay chik lewatlä tä ihi fwiy'etil lhäy'e yachup, tet iwoye ifwalas tä pajche ichepej.

²⁴ Nech'e ihichela yachuyaj lhay tä wuj, lhäy'e uvas, lhäy'e häp aceite.

²⁵ “Wet oyachajila amehen achumtesnaj tatäy häp nekchämisnajtso tä chol ikänchi yachuyaj. Olham t'at tä otayhtej ahilähen häp choltso tä tet iwoye nifwotas.

²⁶ Mat tälhe ifwalasna let'ekhenla, tsi häp tä ihichela äk tä naya, häpkhilek lewunitayn'o tä ohäpe Awuk Dios. Tsi olham oyenlhi amhohen m'ayhay tä wuj tä isis, wet nemla oka wichi len'äfwlhi ihi.

²⁷ Amel, Israel lhayis, letäfwenla n'oyej tä olham tä ohäpe Awuk Dios tä oi'amejen, wet ihichet'a elh. Wet nemla oka wichi len'äfwlhi ihi.

Dios ichenla laka Espíritu

²⁸ “Chik tafwaytshi häp m'ayhayna, otsäyhla'pe oka Espíritu nilhokej wichi. Häp ales tä hin'ol lhäy'e tä atsinhay yenla silätyaja m'ak tä häpe oka Espíritu lhämet, wet hin'ol tä thänhäy tafwilhanhihena, wet mamses hiw'enla lew'enhay.

²⁹ Wet okawos tä hin'ol lhäy'e tä atsinhay otsäyhla'pe oka Espíritu chik nichäte ifwalastso.

³⁰ Wet opäynhiyela m'ayhay tä wus lhäy'e tä isis tä ipuleye lhäy'e tä ihonhate tä iselkathihena wichi: häp w'oyis, itäj, lhäy'e tutsaj tä wuj.

³¹ Wet ifwala nech'e honatsi ihihila, wet iwel'a mälhhiyejat w'oyis, tä kamaj ninäma Lhawuk laka ifwala tä wuj lhäy'e tä iche m'ak tä äytaj.”

³² Mat elh chik häpe chik t'änch'oye Lhawuk, tafwayhla. Wet iyhäj wichi tä ihi Jerusalén lhayämthihena, mälhyej tä pajche Lhawuk ifwenho. Lhamel tä Lhawuk pajche t'ähiche y'inhihent'ala.