Génesis 9 - Biblia Wichi

Dios itiyej lakäpfwayaj tä is häp Noé

¹ Dios takäpfwayeje lhämtesna häp Noé lhäy'e leles wet yok: –Woyay alesa, a'ämay wujpey häpkhilek tapoyej honhat.

² Nilhokej itshätäy tä ihi honhat nowayhla amehen, lhäy'e afwenchey, lhäy'e w'ahat, lhäy'e m'ayhay tä lhaitonchehen honhat. Nilhokej tähestso ihlachufwi han'ohyaj.

³ Ow'en amhohen yämthilek häpe äk, lhäy'e hal'ä lhay mälhyej tä ow'enhohte atetsel.

⁴ Mat iche m'ak weihalha tä on'äyej amhohen. Oyok, yej tuj t'isan tä lew'oyis ihi. Tsi n'ow'atshancheyaj häp tä ihi w'oyis.

⁵ Olham oyenla letesayej elh at chik häpe, hin'o wok itshäwet, chik itsäyhchä lew'oyis elh chik häpe amel. Elh weihalhapej hin'ol oyenla letesayej chik itäyhat elh lew'atshancheyaj.

⁶ Elh chik ilän elh, häte lham õ'länla, tsi olham oyenlhi hin'o wet otech'ayen lhamej.

⁷ Amel woyay alesa, a'ämay wujpey häpkhilek tapoyej honhat.

Dios hit'unhatche lhämet tä iwoyeje Noé

⁸ Wet Dios tahuyej Noé lhäy'e leles wet yok:

⁹ –Tetshan. Olham tek otäyhthila olhämetna tä ot'unhatche amejen, lhäy'e ales pajtha nichäte iyhäj tä lepes lheley,

¹⁰ lhäy'e nilhokej itshätäy tä i'amejen tä lenukwephä tä letälho ahi, lhäy'e afwenchey.

¹¹ Oyachajo tä oyok, Tek owohla elha olhämetna tä ot'unhatche amejen. Nemla otäyhtejen pelhay häp wichi lhäy'e itshätäy. Ihichet'ala elh pelhay tä itäyhat honhat.

¹² Häp täja letetnek olhämet tä ot'unhatche amejen, lhäy'e itshätäy, yämlek tiyäj'attsiy:

¹³ Otihi pule häp lewo tä oyen tetnekayej olhämet tä ot'untejche honhat.

¹⁴ Chik olham ochenpe honhat pules, wet n'änhiyepeja lewo tä ihi.

¹⁵ Wet chik oyahnhipeja, oyenhipeja otichunhayaja olhämet tä ot'unhatche amejen, lhäy'e itshätäy, wet nemla iche pelhay tä itäyhthen olhenhay.

¹⁶ Chik lewo n'älehi pule, olham oyahnhila wet oyenla otichunhayaja olhämet tä ot'unhatche yämlek tiyäj'attsiy, tä owoyeje wichi lhäy'e itshätäy tä ihi honhat.

¹⁷ Häp täjtso tä oyen tetnekayej olhämet tä ot'unhatche tä owoyeje nilhokej amel. Mälhyejtso lhämet Dios tä tahuyej Noé.

Noé lhäy'e leles

¹⁸ Häp Noé leles tä tälho p'ante lehi häpe Sem, Cam tä häpe Canaán lajcha, lhäy'e elh tä lhey Jafet.

¹⁹ Häp tähestso Noé leles, wet nilhokej wichi tä i'pe honhat tälhe t'at lhamel.

²⁰ Noé iwo tesa tä yenlhi yachuyaj, itihchä uvas.

²¹ Fwala elh p'ante iyäyej hat'es wet w'oknajej, wet nichät katsi tä ts'ilakche tä ichufwi lewukwe tä tsänt'äj.

²² Wet lhäs tä lhey Cam, wok oyok, Canaán lajcha, hiw'en lajcha Noé tä ts'ilakche, wet yik tä iwo silätaye lepuhfwas.

²³ Tä mälhyejtso, Sem lhäy'e Jafet lhamel tachuma lew'uy wet iti'pe lhamel lechäyi, wet tatache len'äyij tä yikhen tsi tek t'uhläk iyahin lajcha tä ts'ilakche. Tä nichäte lajcha, wet ithatpe lew'uy.

²⁴ Tä Noé n'om tä nojphä tä w'oknaj, wet ihanej m'ak tä lhäs tä nithaläkwa iwoye. Wet yok:

²⁵ –¡Lewit'äy ihi Canaán! Häpkhila n'okwenek tä lhäy'e lhip tä p'elitsaj, lepuhfwas yenla lakawoya.

²⁶ Wet äp yok: –Is chik Lhawuk Dios takäpfwaye Sem, wet is chik lakwenek t'at häp Canaán.

²⁷ Is chik Dios iwahnej chik lhäy'e lhip Jafet leles, wet äp ihi t'at Sem lew'etes, wet is chik lakwenek t'at Canaán.

²⁸ Tälhe täjp'ante pelhay itäyhat wichi, Noé hiw'en trescientos cincuenta (350) nekchämis iyhäj.

²⁹ Tä mälhyejtso, nekchämis tä Noé hiw'en p'ante tä nilhokej novecientos cincuenta (950), wet häp p'ante tä y'il.