Génesis 8 - Biblia Wichi

Ileyej tä iwomchä

^1-2 Wet Dios yen tichunhayaja Noé lhäy'e nilhokej itshätäy tä iyej tä ihi lehi. Wet hip'ohiche lewomekitas tä wasomche, wet äp hip'ohiche lepelis tä ipuleye, wet ileyej tä iwomchä. Wet Dios ne'tek iche yafwthi tä yafwutpe inät,

³ wet tä nichäte ciento cincuenta ifwalas iwo tesa tä yiklhahchä tä y'im.

⁴ Wet iwel'a siete p'ante, häp ifwala tä diecisiete, lehi nichätpe p'ante chenhas tä lhey Ararat.

⁵ Wet inät yik t'at tä t'aylhahchä, wet häp iwel'a diez, häp ifwala tä ichun, nech'e n'änhiche chenhas tä atoschephä.

⁶ Tä tajyäme p'ante cuarenta ifwalas, Noé ifwoyenche ventana tä ihi lehi

⁷ wet iwahintshi tsetwo. Wet yik t'at tä w'eyälhi pajtha y'im inät tä i'pe honhat.

⁸ Tä paj Noé ichen hokwinaj, t'uhläk ihanej chik tamchäy p'iya honhat.

⁹ Mat tä hokwinaj niw'ena lhip chik tamchäy yämthilek t'äspe, wet yäple häp lehi tsi kamaj inät hip'o'pe honhat. Wet Noé itihlä takwey hokwinaj wet iti lech'oye.

¹⁰ Wet Noé tataye siete ifwalas wet äp yachajo tä ichen hokwinaj.

¹¹ Wet tapil tä honaj, wet hal'ä tä olivo lew'ole tä ihi lepäset. Tä mälhyejtso, Noé ihanej tä yik t'at tä y'im inät.

¹² Wet äp tataye siete ifwalas iyhäj, wet äp yachajo tä ichen hokwinaj, wet nemhit tapil.

¹³ Wet nech'e Noé hiw'en p'ante seiscientos uno nekchämis tä y'im t'at inät. Wet iwel'a tä ichun, häp ifwala tä ichun, Noé ilanhi lehi lep'ot wet hiw'en tä iwo tesa tä tamchäy honhat.

¹⁴ Wet iwel'a dos, häp ifwala veintisiete, honhat nech'e matche tä tamchäy.

Noé lhäy'e iyhäj tä iyej yikch'oye lehi

¹⁵ Wet Dios tahuyej Noé wet yok:

¹⁶ –Mäch'oye ahi, am lhäy'e hach'efwa, ales lhäy'e ales lech'efwas.

¹⁷ Wet nuhatchephä nilhokej itshätäy tä i'amej, lhäy'e afwenchey, lhäy'e m'ayhay tä lhaitonchehen honhat. Wet is chik yikhen wet yen w'eta honhat, wet is chik iwo lelesa yämthilek tapoyej honhat.

¹⁸ Tä mälhyejtso, Noé lhäy'e lech'efwa, lhäy'e leles, lhäy'e leles lech'efwas, lhamel yikch'oye lehi.

¹⁹ Häte inukwephä nilhokej itshätäy, afwenchey lhäy'e m'ayhay tä lhaitonchehen honhat.

²⁰ Wet nech'e Noé yenlhi altar yämthilek iwujyen häp Lhawuk. Wet tachuma itshätäy lhäy'e afwenchey tä lakokhayaj newache, wet iwunhomche wet iti'pe altar, wet yen t'awayhata häp Lhawuk.

²¹ Tä Lhawuk ilätche lenij tä akäjche häp m'ayhay tä õ'wunho, wet yok: –Nemla oyachajok omenyenej honhat häp m'ak tä ni'isa tä hin'o iwoye wet owit'äyen honhat. Tsi tälhe tä mamse, hin'o yen at tichunhayaja m'ak tä ni'isa. Häte nemla otäyhat m'ayhay tä leyalh ihi, mälhyej tä owoyena.

²² Mat tä honhat iche, wichi tutcheyhihena wet ihichela yachuyaj lhay, ihichela nahayoj lhäy'e fwiy'et, wet ifwalas lhäy'e honatsis.