Génesis 7 - Biblia Wichi

Noé tiyäjo p'ante lehi

¹ Lhawuk tahuyej Noé wet yok: –Nilhokej wichi tä i'pe honhat niwohit elh chik iwoye onech'ethayaj, tajlhama am. Tä mälhyejtso, am lhäy'e haw'et lheley tiyäjo häp ahi.

² Itshätäy tä lakokhayaj newache, chuma siete lhamel tä asnakis lhäy'e siete iyhäj tä atsinhay. Wet häp itshätäy tä lakokhayaj ihi, chuma tefwajpejni tä asnak lhäy'e elh tä atsinha.

³ Häte afwencheypej tä w'enha lhamej chumapej siete, lhäy'e siete tä atsinhay, häpkhilek nittäya itshätäy lhäy'e afwenchey tä i'pe honhat.

⁴ Tsi chik nichäte siete ifwalas, ochenla pelhay tä wuj, wet iwomlahchä cuarenta ifwalas wet cuarenta honatsis. Wet otäyhthila nilhokej olhenhay tä leyalh ihi tä i'pe honhat.

⁵ Wet Noé iwoye nilhokej m'ak tä Lhawuk ne'tek iwoye.

⁶ Tä inät hip'op'ante'pe honhat, Noé hiw'en seiscientos nekchämis.

⁷ Wet lham lhäy'e lech'efwa, lhäy'e leles, lhäy'e leles lech'efwas, lhamel tiyäjo lehi yämthilek pelhay nilänahen.

⁸ Wet häp itshätäy tä lakokhayaj newache, lhäy'e iyhäj tä lakokhayaj ihi, lhäy'e afwenchey, lhäy'e m'ayhay tä lhaitonchehen honhat,

⁹ yikche Noé tä tiyäjo lehi, täkwfwaspej, elh tä asnak lhäy'e elh tä atsinha, mälhyej tä Dios ne'tek Noé iwoye.

Pelhay tä wuj

¹⁰ Tä nichäte p'ante siete ifwalas, iwo tesa pelhay tä wuj, wet inät hip'o'pe honhat.

¹¹ Häpe p'ante iwel'a dos, häp ifwala tä diecisiete, wet Noé hiw'en seiscientos nekchämis. Wet häpe p'ante ifwalatso tä wasomche lewomekitas tä tumchä, wet äp tafwochehen lepelis tä ipuleye,

¹² wet iwomchä cuarenta ifwalas, cuarenta honatsis.

¹³ Häp ifwalatso Noé tiyäjo lehi, lhäy'e lech'efwa, lhäy'e leles Sem, Cam lhäy'e Jafet, lhäy'e lhamel lech'efwas.

¹⁴ Wet ichäj lhamche nilhokej itshätäy tä w'enhahiche, lhäy'e n'oläy, lhäy'e m'ayhay tä lhaitonchehen honhat, lhäy'e afwenchey.

^15-16 Elh tä asnak lhäy'e elh tä atsinha, häp tä tiyäjo Noé lehi, täkwfwaspej täkwfwaspej, mälhyej tä Dios ne'tek õ'woye. Wet nech'e Dios hip'ohi lehi lepe.

^17-18 Iwomchä cuarenta ifwalas, wet tä yiklhaphä inät, lehi i'pe t'at.

¹⁹ Wet tä lhäy'epej lhip lhäy'epej lhip tä t'ayphä inät, pajtha hip'o'pe nilhokej chenhas tä atoschephä.

²⁰ Mat kamaj yiklhaphä t'at, pajtha siete metros tä tafwayejen chenhas.

²¹ Wet y'inhen nilhokej wichi tä i'pe honhat, lhäy'e itshätäy tä n'oläy, lhäy'e itshätäy tä fwitses, lhäy'e m'ayhay tä lhaitonchehen honhat, lhäy'e afwenchey.

²² Nilhokej m'ayhay tä leyalh ihi y'inhen t'at.

²³ Tajlhama Noé lhäy'e nilhokej m'ayhay tä ihi lehi tä n'ilahen. Mat iyhäj m'ayhay noj t'at, wichi, itshätäy, afwenchey, lhäy'e m'ayhay tä lhaitonchehen honhat.

²⁴ Wet inät i'pe honhat pajtha ciento cincuenta ifwalas.