Génesis 6 - Biblia Wichi

Wichi iwoye p'ante m'ak tä ni'isa

¹ Tä iwo tesa tä lhayäm wujpe wichi tä ihi honhat, iche leles tsinhay.

² Wet Dios lakawos tä ipuleye hiw'en tä wuj tä isis, wet lhamel tachuma atsinhay tä ihumnhen wet yen ch'efwasa.

³ Mat Lhawuk yok: –Oyämhit’ala pitaj lew’atshancheyaj hin’o, tsi niwohit m'ak chik häpe, hin'o t'at. Tä mälhyejtso, iläyhla ciento veinte nekchämis, tajlhama.

⁴ Wet häp ifwalastso tä Dios lakawos tä ipuleye yen ch'efwasa häp wichi les tsinhay, iwo lelesa wet n'äl p'ante gigantes tä iche, häp hin'ol tä wustas. Häte leles tä lepes lheley iche p'ante gigantes tä iyej. Wet wichi iwujyen tsi takhajayhen.

⁵ Lhawuk hiw'en tä wuj tä ni'isa m'ak tä iwoye wichi tä ihi honhat, wet tajlhama t'at m'ak tä ni'isa tä lhamel yen tichunhayaja.

⁶ Wet Lhawuk wuj tä lelhakli ihi wet yok: –¿Chipte tä oyenlhihte hin'o?

⁷ Athana otäyhthila wichi tä i'pe honhat, lhäy'e itshätäy, lhäy'e m'ayhay tä lhaitonchehen honhat, lhäy'e afwenchey. Tsi tä oyenlhihte lhamel, athana wuj tä ilän otichunhayaj.

⁸ Mat Lhawuk akäjejlhi Noé.

Noé yenlhi lehi

⁹ Oyäme Noé. Lham häpe hin'o tä is wet iwoye t'at Dios lhämet. Ihichet'a elh hin'o p'ante tä mälhyej iwoye lham, tsi iwoye t'at Dios lenech'ethayaj.

¹⁰ Noé hiw'en p'ante tres leles, häpe Sem, Cam lhäy'e Jafet.

^11-12 Wet Dios y'ulhan häp honhat, tä m'ak tä ni'isa tä wichi iwoye tapoyej.

¹³ Tä mälhyejtso, Dios tahuyej Noé wet yok: –Otäyhthila nilhokej wichi tä i'pe honhat, tsi lhamel tä tamenej tä lhäy'e lhip m'ak tä ni'isa tä ihi honhat. Tä mälhyejtso, otäyhthila t'at, lhäy'e honhat.

¹⁴ Enlhi ahi tä hal'ä yämthilek i'pe inät. Enlhi lech'ol tä ihi, wet ilenejlhi alquitrán, häp honhat lhits'i tä ichalaj, tä tumphä lhäy'e tä lech'oye, häpkhilek inät nityäjaho.

¹⁵ Woyneje m'ak tä ofwel amho: ciento treinta y cinco (135) metros tä pitaj, wet veintidós metros y medio tä tsajo, wet trece metros y medio tä atojphä,

¹⁶ wet enlhi tres lech'ol tä iche letape. Enlhi ventana tä tumphä, medio metro tä tumejlä lhetekch'o, wet tihi lepe tä ihi lhip.

¹⁷ Ochenla pelhay tä wuj wet hich'ahla honhat, wet tatäyhla nilhokej m'ayhay tä ihi honhat, y'inhihena nilhokej.

¹⁸ Mat am, ot'unthichela amej olhämet, owohit'ala elha. Tiyäjola ahi, lhäy'e hach'efwa, ales, lhäy'e lech'efwas.

¹⁹ Häte is chik lethatho ahi nilhokej itshätäy tä w'enhahiche tä i'pe honhat, elh tä asnak lhäy'e elh tä atsinha, häpkhilek i'amej wet nittäya.

²⁰ Is chik täkwfwaspej itshätäy tä w'enhache lhamej yik amche chik letiyäjo ahi, lhäy'e afwenchey, lhäy'e m'ayhay tä lhaitonchehen honhat, täkwfwaspej täkwfwaspej häpkhilek nittäya.

²¹ Häte chäj amche nilhokej m'ak tä itshätäy lhäk tä w'enhache lhamej, lhäy'e amel äk, wet amajej tä ihi ahi, häpkhilek amel lhäy'e itshätäy iche m'ak chik letufway.

²² Wet Noé iwoye nilhokej m'ak tä Dios ne'tek iwoye.