Génesis 5 - Biblia Wichi

Adán leles

^1-2 Tä Dios yenlhi p'ante hin'o, itech'ayen lhamej. Yenlhi hin'o lhäy'e atsinha wet takäpfwayeje m'ak tä is. Häp ifwala tä Dios yenlhi lhamel, Dios yok: –Lheyla wichi. Häp täja lheyis häp Adán leles.

³ Tä Adán hiw'en p'ante ciento treinta (130) nekchämis, wet nech'e iche p'ante lhäs tä lhey Set, wet wuj tä nichätche häp lajcha.

⁴ Tä tajyäme täjtso, Adán hiw'en ochocientos (800) nekchämis iyhäj, wet iwo leles iyhäja tä hin'ol lhäy'e tä atsinhay.

⁵ Tä mälhyejtso, Adán hiw'en novecientos treinta (930) nekchämis, wet häp p'ante tä y'il.

⁶ Tä Set hiw'en p'ante ciento cinco (105) nekchämis, wet nech'e iche p'ante lhäs tä lhey Enós.

⁷ Tä tajyäme täjtso, Set hiw'en ochocientos siete (807) nekchämis iyhäj, wet iwo leles iyhäja tä hin'ol lhäy'e tä atsinhay.

⁸ Tä mälhyejtso, Set hiw'en novecientos doce (912) nekchämis, wet häp p'ante tä y'il.

⁹ Tä Enós hiw'en p'ante noventa nekchämis, wet nech'e iche p'ante lhäs tä lhey Cainán.

¹⁰ Tä tajyäme täjtso, Enós hiw'en ochocientos quince (815) nekchämis iyhäj, wet iwo leles iyhäja tä hin'ol lhäy'e tä atsinhay.

¹¹ Tä mälhyejtso, Enós hiw'en novecientos cinco (905) nekchämis, wet häp p'ante tä y'il.

¹² Tä Cainán hiw'en p'ante setenta nekchämis, wet nech'e iche p'ante lhäs tä lhey Mahalalel.

¹³ Tä tajyäme täjtso, Cainán hiw'en ochocientos cuarenta (840) nekchämis iyhäj, wet iwo leles iyhäja tä hin'ol lhäy'e tä atsinhay.

¹⁴ Tä mälhyejtso, Cainán hiw'en novecientos diez (910) nekchämis, wet häp p'ante tä y'il.

¹⁵ Tä Mahalalel hiw'en p'ante sesenta y cinco nekchämis, wet nech'e iche p'ante lhäs tä lhey Jared.

¹⁶ Tä tajyäme täjtso, Mahalalel hiw'en ochocientos treinta (830) nekchämis iyhäj, wet iwo leles iyhäja tä hin'ol lhäy'e tä atsinhay.

¹⁷ Tä mälhyejtso, Mahalalel hiw'en ochocientos noventa y cinco (895) nekchämis, wet häp p'ante tä y'il.

¹⁸ Tä Jared hiw'en p'ante ciento sesenta y dos (162) nekchämis, wet nech'e iche p'ante lhäs tä lhey Enoc.

¹⁹ Tä tajyäme täjtso, Jared hiw'en ochocientos (800) nekchämis iyhäj, wet iwo leles iyhäja tä hin'ol lhäy'e tä atsinhay.

²⁰ Tä mälhyejtso, Jared hiw'en novecientos sesenta y dos (962) nekchämis, wet häp p'ante tä y'il.

²¹ Tä Enoc hiw'en p'ante sesenta y cinco nekchämis, wet nech'e iche p'ante lhäs tä lhey Matusalén.

²² Enoc iwoye p'ante Dios lenech'ethayaj. Wet tälhe tä nech'e iche lhäs Matusalén, hiw'en trescientos (300) nekchämis iyhäj, wet iwo leles iyhäja tä hin'ol lhäy'e tä atsinhay.

²³ Tä mälhyejtso, Enoc hiw'en p'ante trescientos sesenta y cinco (365) nekchämis.

²⁴ Wet tä Enoc iwoye t'at Dios lenech'ethayaj, Dios p'ante ichäj iläyej, wet wichi nemhit hiw'en.

²⁵ Tä Matusalén hiw'en p'ante ciento ochenta y siete (187) nekchämis, wet nech'e iche p'ante lhäs tä lhey Lamec.

²⁶ Tajyäme täjtso, Matusalén hiw'en setecientos ochenta y dos (782) nekchämis iyhäj, wet iwo leles iyhäja tä hin'ol lhäy'e tä atsinhay.

²⁷ Tä mälhyejtso, Matusalén hiw'en novecientos sesenta y nueve (969) nekchämis, wet häp p'ante tä y'il.

^28-29 Tä Lamec hiw'en p'ante ciento ochenta y dos (182) nekchämis, wet nech'e iche p'ante lhäs tä yen lheya Noé. Tsi yok: –Lhawuk takäpfwayeje p'ante lewit'äyhyaj häp honhat, mat häp han'äfwajna tamenhiyeja chik nemla wuj tä äytaj lhachumet.

³⁰ Tälhe tä Noé iche, Lamec hiw'en quinientos noventa y cinco (595) nekchämis iyhäj, wet iwo leles iyhäja tä hin'ol lhäy'e tä atsinhay.

³¹ Tä mälhyejtso, Lamec hiw'en setecientos setenta y siete (777) nekchämis, wet häp p'ante tä y'il.

³² Tä iche p'ante Noé leles tä lheyis Sem, Cam lhäy'e Jafet, lham hiw'en quinientos (500) nekchämis.