Génesis 49 - Biblia Wichi

Jacob lhämtes tä lepes

¹ Jacob t'äne leles wet yok: –Ahutay n'oyej, ofwenla amhohen m'ak tä ihla amejen häp ifwalas tä tatay alhoho.

² “Ahutay n'oyej, Jacob leles, wet leläthiyela olhämtes. Ch'ahuyaye ajcha Israel.

³ “Am, Rubén, olhäs tä thaläkw wet okhajyhayaj, ahäpe elh tä ichun tä tälho m'ak tä ohäpe, wet lhäy'e lhip han'ohyaj lhäy'e akhajyhayaj.

⁴ Mat nemla ahäpe elh tä ichun, tsi ahätet iwoye inät tä iläfwelche, tek ihi tä ihi mat yik t'at, tsi lefwunhit'a n'oye mat lemäyej atsinha tä omäfwa.

⁵ “Simeón lhäy'e Leví häpe hin'ol tä lhalepuhfwas. Takwelheley häpehen n'olänyajchal.

⁶ Ohusek atofwehlä lhämtes tä iwoye, wet tek olhay'aje lhamel tä lhaihutejwek m'ak tä iwoye. Tsi tä lefwitseyaj ihi lhamel, ilänhen hin'ol, wet tä iwoye m'ak tä ihuminche, inäk'äsen w'asetas käläy.

⁷ Oyok isit'a, matche tä ni'isa lewäk tä äytaj wet äp fwitsaj. Olhahthila'pe Israel kahonhat häpkhilek nem kalelhäj lew'etes.

⁸ “Wet am, Judá, apuhfwas aiwujyenla. Letsokhihomchela atayhfwas lepänhilis, wet apuhfwas tä ajcha leles n'okwihla amej.

⁹ Judá, olhäs, ahätet iwoye t'owalhaj lhäs. Tä ileyej tä tufw lelänek, t'upeyhen wet imä katsi, mälhyej chik häpe t'owalhaj tä wuj. Nehit katsik iyatchenla.

¹⁰ Nehit katsik isohiyeja lakhajyhayaj häp Judá, wok leniyatyaj tä iyej, pajla'tha näm hin'o tä lewuk häp n'oniyatyaj, häp hin'o tä wichi tä i'pe honhat yenla lewuka.

¹¹ Isilataj laka honhat, wuj uvaw'etes tä ihihila, wet wichi yäythiyeja lew'utey asnolis häp lhiley. Tsi tejlak asnolis tuj lew'oley thayej, kamaj wujlak imälhehi. Wet tä lhäy'ehila lhip hat'es chik tälho, inuhla'pe m'ak tä wichi iyäyej, wet lhamel talejkanhiyejena lhip tä imälhehi.

¹² Tatelhoy ichätejiche hat'es tä ichäthi, wet letsotey ipelajejchehen itshäwet kat'os.

¹³ “Zabulón yenla lew'eta lewomekitaj lhip, häp lhip tä barcos yenla lakasthaweta, wet laka honhat lepesla Sidón.

¹⁴ “Isacar hätet iwoye itshäwet tä n'olhuhyenek, wet imä katsi tä ihi lehi.

¹⁵ Tä hiw'en tä is honhat tä iwo t'elakw'etahi, wet ihumin, lhäy'e m'ayhay tä isis tä ihi, wet lhayachaje wet tachumhoplhi, wet lhayen lakweneka.

¹⁶ “Dan lhayenla niyatayej laka wichi, hätehlat iwoye iyhäj Israel lhayis tä wusche'pe.

¹⁷ Dan hätehlat iwoye amlhäj tä iwhäye n'äyij. Yokwajen yel'atas sätäy wet nichätchehchä hin'ol tä iche'pe.

¹⁸ “Iwuk, onihich'oyek lefwayhatn'o.

¹⁹ “Gad, nifwotaj inuhiyela, mat lhamlak takähännhej.

²⁰ “Aser, wujla lhäk tä hiw'enla, wet ichunnhihena niyatey.

²¹ “Neftalí hätet iwoye ch'iwase tä lajit lewuka, iwohla lelesa wet isis.

²² “José hätet iwoye hal'ä tä iwhäye inät. Wuj lhay tä iwoye, wet lhachal tatsufwelpe n'olafwek.

²³ Wichi n'äyiho wet tiyäjej lech'ähal, inuyepej wet letamsek ihihit'a.

²⁴ Mat José itihiyejt'a kanhi lelutsej hal'ä, takhajayhen takweyey häp tä isej Jacob laka Dios tä takhajay, häp Tson'ataswo tä t'uye häp Israel.

²⁵ Häp ajcha laka Dios tach'otlat ame. Häp Dios tä laj letumfwaya takäpfwayhiyeja ame lakäpfwayajay tä tälh puleye, lhäy'e häp inät tä tälh honhatch'oye, lhäy'e lakäpfwayajay tä häpe ales tä wujpey.

²⁶ Yäs, wuj okäpfwayaj tä ow'en amho, pajtha nichäte lepesey häp chenhas tä tiyäj'attsiy. Inu'pe tä ojcha lhäy'e tä ochäti p'ante hiw'en n'oho. Lakäpfwayajayna ihla'pe José lhetek, häp lham tä Dios tatshupiye tä lhayej lepuhfwas.

²⁷ “Benjamín häpe m'awotaj tä fwitsaj tä nech'e fwala tufw lelänek, wet tä honaj hiw'enhomche iyhäj lhipey tä imälhehi.” Lepes Jacob lhämet.

²⁸ Häp tähestso doce wichi tä Israel lhayis letetsel p'ante, wet äp häp täjtso lhämtes häp lajcha Jacob tä tahuyej p'ante lhamel wet takäpfwaye elh weihalhapej.

Jacob ileyej honhat

²⁹ Wet Jacob ne'tek leles iwoye lhämetna wet yok: –Athana tatäy lhimphaj wet oy'inhila. Ohohiyela otetsel. Mat chik letajän n'ohlä, tila n'oyej ochätilis p'ante ihi chowej tä ihi Het lhayis elh tä lhey Efrón kahonhat

³⁰ tä ihi Canaán. Wok oyok, häp chowej tä ihi Makpela tä tumej hupuy tä Mamre lhip tä hichä, häp chowej tä ochäti Abraham hip'ajtej p'ante Efrón kahonhat tä ichäj yämthilek häpe lew'et lheley p'itseyhayw'et.

³¹ Wet häpe t'at tä Abraham lhäy'e lech'efwa Sara p'itseyhay ihi, lhäy'e ojcha Isaac lhäy'e oko Rebeca p'itseyhay. Häte häpehte tä otihi och'efwa Lea p'itsek.

³² Häp honhat lhiptso häp p'ante tä Abraham ichäj tä tälhe Het lhayis.

³³ Tä Jacob ileyej lhämettso tä ifwenhomche leles, wet lhaithatpe lemäwet wet y'il, ihoye lechätilis.