Génesis 46 - Biblia Wichi

Jacob ihoye Egipto, lhäy'e lew'et lheley

¹ Israel, wok oyok, Jacob, yik, ichäj nilhokej lakäywet. Tä nichätho honhat lhip tä lhey Beerseba, wet ilän itshäwet wet iwunho tä yen n'okhayajayej lajcha Isaac laka Dios.

² Wet honatsitso lew'enek ihi. Dios t'änch'oye tä yok: –¡Jacob! ¡Jacob! Lham nichulho wet yok: –Oikana.

³ Dios yok: –Ohäpe Dios tä ajcha laka Dios. Yej noway tä lehoye Egipto, tsi oyämla wujpey ales chik lhamel ihi.

⁴ Oyikhila amche tä lehoye, wet äp olhamlak otonphä lhamel chik tälho. Häte chik leleyej honhat, José ihla awhäye.

⁵ Jacob yikch'oye Beerseba wet leles ithatho kaletas tä Egipto kaniyat ichene, lhäy'e lhamel lech'efwas lhäy'e leles.

⁶ Wet Jacob lhäy'e nilhokej lew'et lheley lhamel ihoye Egipto. Ichäj leläy lhäy'e nilhokej lakäywet tä lhamel ikalhi tä ihi Canaán.

⁷ Wet nilhokej leles lhäy'e lechetsos tä yikche.

Jacob leles lhäy'e lechetsos

⁸ Häp tähesna lheyis häp Israel leles tä ihoye Egipto, wok oyok, Jacob lhäy'e leles, lhäy'e lechetsos: Jacob lhäs tä lechunkatsek tä lhey Rubén,

⁹ lhäy'e leles tä lheyis Hanoc, Falú, Hesrón, lhäy'e Carmi.

¹⁰ Wet häte Rubén lech'inij Simeón leles tä lheyis Jemuel, Jamín, Ohad, Jaquín, Sóhar, lhäy'e Saúl tä lako häpe Canaán lheley ka'tsinha.

¹¹ Wet häte Simeón lech'inij Leví leles tä lheyis Gersón, Coat, lhäy'e Merari.

¹² Wet häte Leví lech'inij Judá leles tä lheyis Sela, Fares, lhäy'e Zera. Häp Judá leles iyhäj tä lheyis Er lhäy'e Onán, lhamel pajche y'inhen p'ante tä ihi Canaán. Wet häte Fares leles tä lheyis Hesrón lhäy'e Hamul.

¹³ Wet häte Judá lech'inij Isacar leles tä lheyis Tola, Puva, Job, lhäy'e Simrón.

¹⁴ Wet häte Isacar lech'inij Zabulón leles tä lheyis Sered, Elón, lhäy'e Jahleel.

¹⁵ Häp tähestso Jacob leles tä ihihlä lech'efwa Lea tä lhamel ihi p'ante Padán-aram. Häte iche lhäse tä lhey Dina. Tä nilhok leles lhäy'e lechetsos, iche treinta y tres hin'ol lhäy'e tä atsinhay.

¹⁶ Häte Gad leles tä lheyis Sefón, Hagui, Esbón, Suni, Eri, Arodi, lhäy'e Areli.

¹⁷ Wet häte Gad lech'inij Aser leles tä lheyis Imna, Isúa, Isuy, Bería, lhäy'e lhamel lech'inhä tä lhey Sera. Wet häte Bería leles tä lheyis Heber lhäy'e Malquiel.

¹⁸ Häp tähestso Jacob leles tä ihihlä Zilpa, häp Labán kawo'tsinha tä hiw'enho p'ante lhäse Lea, lhäy'e lechetsos. Wet iche dieciséis tä nilhokej.

¹⁹ Häte Jacob lech'efwa tä lhey Raquel leles tä lheyis José lhäy'e Benjamín.

²⁰ Wet José leles tä ihihlä lech'efwa Asenat häpehen Manasés lhäy'e Efraín. Lhamel nichäthihchä Egipto. Asenat häpe sacerdote tä lhey Potifera tä lew'et On, häp tä lhäse.

²¹ Wet häte José lech'inij Benjamín leles tä lheyis Bela, Bequer, Asbel, Gera, Naamán, Ehi, Ros, Mupim, Hupim, lhäy'e Ard.

²² Häp tähestso Raquel lhäy'e Jacob leles lhäy'e lechetsos. Iche catorce tä nilhokej.

²³ Häte Dan lhäs tä lhey Husim.

²⁴ Wet häte Dan lech'inij Neftalí leles tä lheyis Jahzeel, Guni, Jezer, lhäy'e Silem.

²⁵ Häp tähestso Jacob leles tä ihihlä Bilja, häp Labán kawo'tsinha tä hiw'enho p'ante lhäse Raquel, lhäy'e lechetsos. Wet iche siete tä nilhokej.

²⁶ Häp tähestso Jacob leles lhäy'e lechetsos tä yikche tä ihoye Egipto. Tä ts'ilak lhamel iche sesenta y seis, mat tek õhp'ajtej atsinhay tä letichelis tä õ'kalelhät.

²⁷ Wet iche täkwfwas José leles tä lhamel nichäthihchä Egipto. Tä mälhyejtso, iche p'ante setenta Jacob lew'et lheley tä ihi p'ante Egipto.

Jacob lhäy'e José lhaiw'enhen

²⁸ Wet Jacob ichen p'ante lhäs Judá wet yok: –Mäh hoye José. Is chik iho n'oye tä oihi Gosén. Tä José ihanej tä lajcha nämho Gosén,

²⁹ ne'tek õ'waklhat lehi kaletaj yämthilek ihoye lajcha. Wet tä yik, tä nichäte tatsufwelej wet pitaj tä tafwlhi.

³⁰ Wet Israel tahuyej lhäs wet yok: –¡Athana chik oy'il, mat okäjyaj ihi t'at, tsi oaiw'en tä kamaj leläy t'at!

³¹ Wet José tahuyej lechilalis lhäy'e nilhokej lajcha w'et lheley wet yok: –Oyäple niyat, ofwenhihola tä amel lhäy'e ojcha lhäy'e lew'et lheley lenämhen tä letälhe honhat tä Canaán yämthilek lheyay n'oyej,

³² wet lechäj aläy lhäy'e nilhokej m'ak tä alewuhuy. Ofwenhihola tä amel achumet t'at tä lechihelit tson'atas, kayla lhayis lhäy'e w'asetas.

³³ Wet chik niyat t'än amehen wet tay'ätshanej amehen m'ak tä amel achumet,

³⁴ fwenhola tä häpe t'at tson'atas tä lhen achumeta tä lechihelit, lhäy'e kayla lhayis, lhäy'e w'asetas, mälhyej tä achätilis iwoye. Häpkhilek lham yen amel haw'eta Gosén, tsi Egipto lheley ihuminhit'a chik yen w'etfwaya wichi tä tson'atas lewos.