Génesis 42 - Biblia Wichi

José lechilalis ihoye Egipto

¹ Tä Jacob ihanch'oye tä n'olhäk ihi Egipto, tahuyej leles wet yok: –¿Chipte tä letatay at amehen?

² Ohanch'oye tä n'olhäk ihi Egipto. ¡Mäyay hoyaye wet chäj n'amhohen, häpkhilek nehläs n'aknilänahen!

³ Tä mälhyejtso, diez José lepuhfwas lhamel yikhen tä ihoye Egipto yämthilek ichäj lhäk.

⁴ Mat Jacob tek iwahinche lechilalis häp lhäs elh tä José lepuhfwa tä lhey Benjamín tä lako lhäs, tsi nowayek lewit'äy ihi.

⁵ Tä mälhyejtso, yikhen Israel leles, yikche iyhäj wichi tä lhamel t'ukwe lhäk, tsi imälhewek honhat tä Canaán tä nehläs iche.

José lechilalis nichäte mat tek lhaitäfwnhatej lhamel

⁶ José häpe gobernador tä ihi Egipto, wet lham tä nilhokej wichi tä tälhomche laka honhates ihoye tä t'ukwe lhäk yämthilek ichäj. Wet tä lechilalis ihoye, tä nichäte lhamel t'upechehchä pajtha letachol taje honhat.

⁷ Tä José hiw'en, nitäfwelej lechilalis. Mat m'ak tä lham iwoye, tet iwoyek nitäfwelayej, wet yäm äytaj lhämet tä tay'ätshane wet yok: –¿Atsi honhat tä amel letälhe? Lhamel yok: –Olhamel otälhe Canaán. Tä onämhen kana owatläk ochäj olhäk.

⁸ Lhamel nitäfwenhiyejt'a tä häpe t'at lech'inij José, mat lham nitäfwelej t'at lechilalis.

⁹ Wet José nitichunch'oye lefwilhey p'ante ihlä lhamel. Wet nech'e tahuyej lhamel wet yok: –¡Ahäpehen chowalhnhas tä iho kana Egipto yämthilek iyahinlhi honhat lhipey tä niwuja sip'äl chik ihi!

¹⁰ Lhamel nichulho wet yok: –¡Kha, iwuk! Ohäpehen akawos t'at, olhamel oneke olhäk yämthilek ochäj.

¹¹ Olhamel olhalepuhfwas t'at, ihichet'a elh olhamel chik w'enha lhamej lajcha. Ohäpehen iyhäj tä akantsesit'a. Ohäpkhihent'a hin'ol tä iyahinlhi honhat yämthilek inuye.

¹² José yok: –¡Mathichet'a! ¡Amel lenämhen kana Egipto yämthilek lew'en lhipey tä niwuja sip'äl chik ihi!

¹³ Lhamel nichulho wet yok: –Iwuk, olhamel tä akawos n'ohen iche doce tä nilhokej. Ihichet'a elh olhamel chik w'enha lhamej lajcha, wet ow'et t'at Canaán. Wet elh olhamel tä nithaläkwa imälheyej ojcha, wet elh opuhfwa tatäy.

¹⁴ Mat José yachajo tä yok: –¡Häp tä oyäme! ¡Ahäpe chowalhnhas tä iyahinlhi t'at Egipto!

¹⁵ Mat otetshanhila, n'änhila m'ak chik matche. Oyok, matche olhämet tä ofwel amhohen häp tä isej honhatna laka niyat lakhajyhayaj, oyok, lhekhihent'ala pajla'tha näm amel hach'inij.

¹⁶ Is chik yik elh amel wet ichäj kana, mat nilhokej amel lhehi t'at n'op'onthi, kalelhäjilak matche ämet. Wet chik kamatache, ohanla amejen tä ahäpehen t'at hin'ol tä akantses tä iyahinlhi t'at honhatna yämthilek inuye. Matche olhämet, häp tä isej Egipto kaniyat lakhajyhayaj.

¹⁷ Wet José ne'tek õ'thatho n'op'onthi lhamel pajtha tres ifwalas.

¹⁸ Tä tajyäme täjtso, wet tahuyej lhamel wet yok: –Olham tek otiyej okachuhanyaj Dios. Amel chik lewoye olhämet, tek oailänhihena.

¹⁹ Chik matche tä akahäpeya akantses, tejtsi apuhfwa, ihi t'at n'op'onthi. Mat amel is chik lhekhen t'at, wet chäj äk tä leneke häpkhilek lhäk ihi haw'et lheley.

²⁰ Wet chäja n'oye hach'inij tä lepes. Chik lewoye täjtso, n'änhila tä matche ämet. Mat chik kamatache, let'inhihena. Lhamel yok: –Is t'at.

²¹ Mat yämwethä lhamhomche wet yok: –Matche tä ni'isa m'ak tä y'awoyejehte lhach'inij José. Tsi tek y'awoyehte tä lhaip'altsen n'amehen, tej tä y'aw'ente tä wuj tä lelhakli ihi. Wet häp tä athana nech'e n'amel t'at tä lhalhakli in'amejen.

²² Wet Rubén yok: –Ofwelte amhohen tä oyok, “Yej woyay m'akayej hin'o mamse.” Mat amel tek lewoyayehte olhämet. Athana y'awot lahaya t'ilek.

²³ José iläte t'at lhamel lhämtes, mat lhamel fwetaj lham nilätaye. Tsi tä yämhoplhi lhamel, iwoye Egipto lhele lhämet, wet iche hin'o tä iwoye Hebreo lhayhi, wet häp tä ifwenho lhamel José lhämet.

²⁴ José yikch'oye lhamel wet tafwlhi. Tä ileyej tä tafwlhi, tapile lhamel wet nech'e yämhoplhi. Wet ne'tek õtchuma Simeón wet õyäyit tä ihi tä lhamel tatache.

José lechilalis yäple Canaán

²⁵ Wet José ifwenho lakawos wet yok: –Tsächehen lakhäyhis trigo wet thathomchela lelhunthis. Wet thatchehena lakhäyhis häp laka chinaj t'äj tä lhamel ichäjej trigo, wet w'enhola lhäk chik tufw chik ihi len'äyij. Häp täjtso tä õ'woyeje lhamel,

²⁶ wet nech'e lhamel ithatche'pe lelhuy häp asnolis wet yikhen.

²⁷ Tä honaj lhamel iwo lakasthaweta, wet elh ifwoyenpe lakhäyhi yämthilek hiw'enho lhäk asno. Mat tä ifwoyenpe lakhäyhi, hiw'en laka chinaj t'äj tä ihi lhip tä tumphä.

²⁸ Wet tahuyej lepuhfwas wet yok: –¡Yahin, õ'nachaj n'oye oka chinaj t'äj, ihi t'at okhäyhi! Wet nilhokej lhamel wuj tä lenowayhyaj ihi, wet wuj tä nilhak'alwethä wet yok: –¿Atsi m'ak tä Dios iwoyej n'amehen?

²⁹ Tä lhamel nichäte laka honhat Canaán, ifwenho lajcha Jacob nilhokej m'ak tä õ'woyeje lhamel. Wet yok:

³⁰ –Häp hin'o tä niyatej Egipto wuj tä äytaj lhämet tä iwoyej n'oyehen. Wet yäme tä olhamel ohäpehen chowalhnhas wet ohoye laka honhat wet otetshan yämthilek onuye.

³¹ Mat olhamel ofwenho tä ohäpehen wichi tä akantsesit'a. Oyok, “Ohäpkhihent'a hin'ol tä iyahinlhi honhat yämthilek inuye.”

³² Wet äp oyok, “Iche doce olhamel tä olhalepuhfwas, ihichet'a elh olhamel chik lajcha w'enha lhamej.” Wet ofwenho tä elh olhamel tatäy, wet elh och'inij i'amej kana Canaán.

³³ “Wet niyattso yok, Tä mälhyejtso, ot'uhläk ow'en chik matche amel ämet tä ahäpehen iyhäj tä ka'akantsesa. N'äy kana elh apuhfwa yämthilek in'oyej. Mat amel is chik lhekhen wet chäj äk tä leneke yämthilek haw'et lheley lhäk ihi.

³⁴ Mat chäja n'oye hach'inij tä lepes. Chik lewoye olhämet, ow'enla tä matche t'at amel ämet tä ahäpehen wichi tä ka'akantsesa, wet ahäpkhihent'a iyhäj tä iyahinlhi honhat chik häpe yämthilek inuye. Wet häte onuhthiphäla apuhfwa tä ihi n'op'onthi, wet nehit katsik n'äyhiyeja amhohen chik lelunche häp Egipto.”

³⁵ Tä lhamel ileyej tä ifwenho lajcha häp täjtso, wet ilanhi m'ayhay tä ihiche lakhäyhis. Tä iwoye, elh weihalhapej hiw'en laka chinaj t'äj tä pajche ichäjej lhäk. Wet wuj tä inuhat lhamhohen, lhäy'e lajcha Jacob.

³⁶ Wet nech'e Jacob tahuyej lhamel wet yok: –¡Amel lesoyay n'oyej oles! ¡José ohanhiyejt'a lewit'äyhyaj tä häpe, wet Simeón nemhit in'oyej, wet athana äp let'uhläk lesoyay n'oyej Benjamín! ¡Olham t'at tä owit'äyhyaj ipej n'oyej!

³⁷ Rubén tahuyej lajcha wet yok: –W'en n'oho Benjamín, olhamlak ot'uye, onachajilat ame. Mat chik nitpila ame äs, is chik lelänhen oles.

³⁸ Mat Jacob nichulho wet yok: –Kha, tek owahin amejen olhäs chik lechäj. Tsi lechila José pajche y'il, wet tajlhamat lham Benjamín tä imälhe n'oyej. ¿Chihla iwoyek lewit'äyhyaj ihi chik ihi n'äyij? Amenlak letamenay n'oyej chik oy'uyejot honhat olhaklis tä och'ut.