Génesis 40 - Biblia Wichi

José hin'älit m'ak tä häpe n'ofwilhey

¹ Tä tajyäme täjtso, wet hin'o tä ihänepej hat'es häp Egipto kaniyat, lhäy'e lakawo elh tä panwo, lhamel iwoye m'ak tä iwäkyhayen häp lewuktso.

² Wet lham wuj tä fwitsaje lakawosna,

³ wet ne'tek õhp'ohiche lhamel wet õ'thatho n'op'onthi tä iyej sip'äl tä t'uye niyat häp lhamel laka niyat lew'et. Häpe t'at n'op'onthi tä José ihi,

⁴ wet sip'äl kaniyat ne'tek José t'uyehen lhamel. Wet wujpe ifwalas tä lhamel ihi n'op'onthi.

⁵ Wet iche honatsi tä hat'eswo lhäy'e panwo tafwilhanhen, elh lefwilhek iche t'at m'ak tä häpe, wet elh w'enha lhamej m'ak tä häpe tä tafwilhanej.

⁶ Tä nech'e fwala tä José ihoye lhamel, hiw'en tä wuj tä lelhakli ihi.

⁷ Wet tay'ätshane tä yok: –¿Chipte tä wuj afwitajayaj tä i'amejen ifwalana?

⁸ Lhamel nichulho José wet yok: –Olhamel otfwilhanhen honatsimattso, mat ihichet'a hin'ok ifwel n'ohohen m'ak tä häpe. José yok: –Ihichet'a hin'o chik ihanej m'ak tä häpe n'ofwilhek, ts'ilak Dios. Lhek fwel n'oho afwilhey.

⁹ Wet hat'eswo ifwenho lefwilhek wet yok: –Otfwilhanej uva lhile

¹⁰ tä lhachal tres, wet iwo lhawoya. Tä paj ow'en tä lhawotso y'ohen lhay.

¹¹ Wet ochäjlhi niyat lhäthi, wet otchuma uvas tä y'ohen wet ots'ifwnhi wet otsäyho n'olhäthi, wet ow'enho niyat.

¹² José nichulho wet yok: –Häp m'ak tä häpe afwilhektso häp täja: Tres lhachal häpkhila tres ifwalas,

¹³ wet chik tajyäme tres ifwalas, niyat itetshanhila m'ak tä ates, wet yachajila ame achumet tä lew'enhopej lhäthi, mälhyej ifwalas tä pajche.

¹⁴ Wet chik mälhhiyejatso, woye tä owoye, achowej nuhata n'ohlä. Ahuyeja aka niyat, is chik inuhatphän'o tä oihi n'op'onthina. ¡P'altsenn'o,

¹⁵ tsi ohäpe Hebreo mat wichi t'etan n'oye, wet tä oihi Egiptona niwohit m'ak chik ni'isak owoye. T'uhawethiyejt'a tä oihi n'op'onthina!

¹⁶ Wet hin'o elh tä panwos kaniyat hiw'en tä is häp elh lefwilhek tä José ifwenho m'ak tä häpe. Wet yok: –Häte olham ofwilhek ihi mathi. Otfwilhanej tres lehis tuskalis tä õyenlhi tä pan ihiche, wet i'pe olhetek.

¹⁷ Elh tä tumphä w'enhahiche pan tä ihi tä niyat lhäk, mat afwenchey nämhen wet tufw.

¹⁸ José nichulho wet yok: –Häp m'ak tä häpe afwilhektso häp täja: Tres lehis tuskalis tä õyenlhi häpkhila tres ifwalas.

¹⁹ Wet chik tajyäme tres ifwalas, niyat itetshanhila m'ak tä ates, wet ne'tehlak õ'aifwuhatlhi, wet tsetwos tufwila hap'itsek.

²⁰ Wet tä nichäte p'ante tres ifwalas, häpe Egipto kaniyat laka cumpleaños. Wet yenlhi lakäjyaj tä wuj wet t'äne nilhokej leniyatfwas. Wet ne'tek õ'tonphä hat'eswos kaniyat lhäy'e panwos kaniyat tä ihi n'op'onthi.

²¹ Wet yachajo lechumet häp hat'eswos kaniyat, mälhyej ifwalas tä pajche.

²² Mat häp panwos kaniyat, ne'tek õ'fwuhatlhi, mälhyej tä José yäme.

²³ Matkat hat'eswos kaniyat tek yen tichunhayaja häp José.