Génesis 4 - Biblia Wichi

Caín lhäy'e Abel

¹ Adán imäyej lech'efwa Eva wet hich'otshan. Tä iwo lhäsa, yen lheya Caín. Wet Eva yok: –Lhawuk hiw'en n'oho olhäs tä hin'o.

² Tä paj wet äp nichätchä elh, wet iwo lheya Abel, Caín lech'inij. Abel häpe p'ante tson'ataswo wet Caín häpe n'utchenaj.

³ Tä tajyäme p'ante wujpe ifwalas, Caín ihäne Lhawuk häp lechumet lhay tä yen t'awayhata.

⁴ Wet Abel ihäne Lhawuk tson'ataj leles tä lechunkatshay tä wuj tä isis, wet yen t'awayhata. Wet Lhawuk wuj tä akäjejlhi Abel lhäy'e m'ak tä yen t'awayhata,

⁵ mat tek akäjejlhi Caín lhäy'e m'ak tä ichäj. Tä mälhyejtso, Caín yen fwitajayaja täjtso, wet ifwuhtejchä lhetek wet wuj tä lewäk ihi.

⁶ Wet Lhawuk tahuyej wet yok: –¿Chipte tä lefwuhtejchä etek awäk?

⁷ Chik lewohiye m'ak tä is alhoho, olham oaiwujyen t'at. Mat chik kawoyaye m'ak tä is alhoho, neklhat ame hach'isukyaj yämthilek ayäyit. Mat chik kawahina amej, lekalhi t'at.

⁸ Fwala elh p'ante Caín tahuyej lech'inij Abel wet yok: –N'aho tayhiye. Tä yäm kanhi, Caín inuye lech'inij wet ilän.

⁹ Wet Lhawuk tay'ätshane Caín wet yok: –¿Chi tä ihi hach'inij Abel? Caín nichulho wet yok: –Thayej, ohanhiyejt'a ihi. Olham ochumethit'a yämthilek ot'uye.

¹⁰ Lhawuk yok: –¿Chipte tä lewoye m'ak tä ni'isa? Hach'inij lew'oyis tä letsäyhchä, lepak tälh honhate tä t'än och'oye.

¹¹ Tä mälhyejtso, awit'äyhyaj i'amej. ¡Mäch'oye honhat tä lhehi tä leyäynej hach'inij w'oyis tä lelän!

¹² Tejlak lefwetaj letutchey, mat nemla iwo lhaya akäs yachuyaj. Lelunlatpe honhat, mat tek elakw'et ihichela.

¹³ Tä Caín iläte Lhawuk lhämet, wet yok: –Matche tä äytajche atasnhayaj tä leti n'oyej. Tek otumhilahlä.

¹⁴ Fwalana lechenn'o tä oihi honhatna, wet olunhichela honhat tä otofwe ahilä wet lajit ot'elakw'eta. Wet hin'o chik häpe chik hiw'enn'o, ilänlan'o.

¹⁵ Mat Lhawuk nichulho wet yok: –Hin'o chik ailän otihiyeja otasnhayaj siete veces. Tä mälhyejtso, Lhawuk itiyej letetnek Caín, häpkhilek elh chik hiw'en ilänhit'a.

¹⁶ Wet Caín yikch'oye Lhawuk wet yen w'eta honhat lhip tä lhey Nod tä tumej Edén lhip tä hichä.

Caín leles

¹⁷ Caín imäyej lech'efwa wet hich'otshan. Tä iwo lhäsa, yen lheya Enoc. Tä paj Caín yenlhi hupuy wet yen lheya Enoc, häpe t'at lhäs lhey.

¹⁸ Enoc iwo p'ante lhäsa Irad, wet Irad iwo lhäsa Mehujael, wet Mehujael iwo lhäsa Metusael, wet Metusael iwo lhäsa Lamec.

¹⁹ Lamec lech'efwas täkwfwas p'ante, elh lhey Ada wet elh lhey Zila.

²⁰ Wet Ada iwo lhäsa Jabal, wet häp tä wichi tä yen wukweya tsänt'ähes wet iti lhamejen itshätäy, häp p'ante tä tälhe hin'otso.

²¹ Wet Jabal lepuhfwa iche, lhey Jubal, wet häp p'ante tä wichi tä yafwutchehen lefwolis tälhe p'ante, häp lhamel tä tachuma arpa lhäy'e flauta.

²² Wet Zila häte iwo lhäsa, lhey Tubal-caín, lham häpe chinajwo wet yenwethä m'ayhay tä bronce lhäy'e chinaj. Wet lech'inhä lhey Naama.

²³ Tä paj p'ante, Lamec tahuyej lech'efwas täkwfwas wet yok: –Ada lhäy'e Zila, ch'ahuye olhämet tä ofwel amhohen. Olän hin'o mamse tä ipäjlhin'o wet itshänn'o.

²⁴ Chik õ'tiyej siete veces n'otasnhayaj elh chik ilän Caín, olham elh chik ilänn'o is chik õ'tiyej setenta y siete veces n'otasnhayaj.

Adán lhäy'e Eva lhäs elh tä lhey Set

²⁵ Adán yachajo tä imäyej lech'efwa. Tä iwo lhäsa, yen lheya Set, tsi yok: –Dios hiw'en n'oho olhäs tä icheyäjo Abel lew'et, häp elh tä Caín ilän.

²⁶ Häte Set iwo lhäsa, lhey Enós. Wet tälhe p'ante fwalastso nech'e wichi t'änch'oye Lhawuk wet n'okwiyej.