Génesis 39 - Biblia Wichi

José häpe Potifar lakawo tä lhamya

¹ Häp wichi tä Ismael lhayis ihäne p'ante José häp honhat tä Egipto, wet hin'o tä lhey Potifar tä lew'et honhattso ichäj. Potifar häpe Egipto kaniyat lech'otfwa wet sip'äl tä t'uye niyat lhamel laka niyat.

² Mat Dios iyej t'at p'ante José wet wuj tä tach'otepej m'ak tä iwoye. Wet ihi t'at lewuk lew'et,

³ wet lewuk hiw'en tä Dios iyej t'at José wet häp tä tamenej tä lham José wuj tä is m'ak at chik häpek iwoye.

⁴ Tä mälhyejtso, lewuk wuj tä ihumin lechumet, wet yen häpeya lakawo tä lhamya wet ichutthaynej nilhokej m'ak tä ihi lew'et.

⁵ Wet tälhe fwalatso Lhawuk itiyej lakäpfwayaj tä is häp Potifar lew'et, lhäy'e leläy, lhäy'e yachuyaj.

⁶ Wet tä Potifar yachaje nilhok lakäywet José yämthilek t'uye, wet lham nemhit yen lhakliya m'ak chik häpe. Mat letamsek ihi t'at, tajlhama chik nichäte lewhäy chik t'ek, t'ek t'at. José häpe mamse tä wuj tä isilataj,

Potifar lech'efwa t'isufwkane José

⁷ wet tä paj p'ante lewuk Potifar lech'efwa ihumin, wet tahuyej wet yok: –¡Mäh, n'aho'pe omäwet!

⁸ Mat José iwohiyet'a, nichulho atsinha wet yok: –Tetshan, owuk hiw'en n'oho nilhok m'ak tä iyej wet olham t'at tä otetshan wet ot'uye. Tä mälhyejtso, lham nemhit wo m'ak chik yen lhakliya tä ihi lew'et.

⁹ Ihichet'a elh chik itetshan owuk lew'etna, ts'ilak olham. Wet niwohit m'ak chik owuk n'äyej n'oho, tajlhama am tä otetshanhit'a tsi ahäpe lech'efwa. Tä mälhyejtso, ¿chip iwoyek owoye m'ak tä lhäy'e lhip tä ni'isa wet ottayhlä Dios?

¹⁰ Wet tej tä atsinha tujlhache nilhokej fwalas tä inimatyenlhi tä t'uhläk José iwoyeje m'ayek, iwohiyet'a, wet tek t'uhläk lhaitott'ayne.

¹¹ Mat fwala elh p'ante José tiyäjchufwi lewuk wukwe yämthilek yenlhi lechumet. Wet tä newache elh chik iyej tä ichufwi hup,

¹² Potifar lech'efwa itsoklhi wet yok: –¡Lhuu, n'aho'pe omäwet! Mat José inu alhoho wet inuphä tä ichufwi hup, wet lew'uy imälhehi atsinha kweyey.

¹³ Wet tä atsinha hiw'enche tä inu alhoho José wet lew'uy imälhehi takweyey,

¹⁴ t'äne lakawos. Tä lhamel nämhen, wet atsinha yok: –¡Lhek yahinya, och'efwa ichäj n'amehen lakawo tä Hebreo, athana iti n'oyej leläkwyhanyaj! Lham iho n'oye wet t'uhläk iwoyej n'oye m'ayek. Mat ofwitsenej tä ot'än,

¹⁵ wet tä ilät n'oye iwom lew'uy wet inuphä wet inu alhoho.

¹⁶ Wet nech'e t'amajej José lew'uy pajtha näm lewuk Potifar.

¹⁷ Wet tä näm, ifwenho wet yok: –Häp Hebreo tä lechäj kana tä lhen akawoya, lham ihomat n'oye wet t'uhläk iwoyej n'oye leläkwyhanyaj.

¹⁸ Mat ofwitsenej tä ot'än, wet iwom lew'uy, inu alhoho wet inuphä.

¹⁹ ¡Häp täjtso m'ak tä iwoyej n'oye akawo! Wet Potifar wuj tä fwitsaje José tä iläte m'ak tä lech'efwa ifwenho.

²⁰ Wet ne'tek õ'tsoklhi wet õ'thatho n'op'onthi tä hin'ol tä niyat hip'ohiche ihi. Matkat tä José ihi n'op'onthi,

²¹ Lhawuk ilehiyejt'a tä iyej t'at, wet itiyej lep'altsenyaj wet takäpfwaye. Wet n'op'onthiwo tä lhamya wuj tä ihumin José,

²² wet ne'tek lham t'at tä t'uye hin'ol iyhäj tä õhp'ohiche, wet itetshan n'ochumtes tä ihi tä õyenlhi.

²³ Wet n'op'onthiwo nemhit yen lhakliya m'ak chik häpe tä José itetshan, tsi Lhawuk iyej t'at wet isyen alhoho nilhokej m'ak tä iwoye.