Génesis 13 - Biblia Wichi

Lot yikch'oye lewithok Abram

¹ Abram yikch'oye Egipto, lhäy'e lech'efwa Sarai, lhäy'e nilhokej m'ak tä iyej, wet yäple ts'anis tä Négueb. Wet lewakla Lot yikche t'at.

² Abram häpe hin'o tä wuj lakäywet tä hiw'en, oro, plata, lhäy'e wujpey leläy.

³ Tä paj, äp yikch'oye Négueb wet yikhen, yiwalh t'at lew'ekyaj, wet tiyäje Betel, pajtha nichäte honhat tä pajche lew'et tä Betel tumej lhip elh wet N'owastsek tumej lhip elh,

⁴ häp honhat tä ihi p'ante tä Abram yenlhi altar. Wet tä nichäte, lham nech'e t'änch'oye Lhawuk wet n'okwiyej.

⁵ Lot häte lham häpe hin'o tä wuj lakäywet, hätet iwoye lewithok Abram. Wuj tson'atas tä hiw'en, lhäy'e kayla lhayis, w'asetas, lhäy'e wichi tä iyej.

⁶ Mat häp honhat tä lhamel ihi w'awulhiyejt'a leläy tä wujpey, lew'et ihihit'a. Wet häp tä nemhit is tä iwek lhamel, Abram lhäy'e Lot,

⁷ tsi lakawos tä t'uyehen leläy tataypejwek. Häte fwalastso Canaán lhayis lhäy'e Ferez lhayis kamaj ihi t'at honhat.

⁸ Tä mälhyejtso, Abram tahuyej lewakla Lot wet yok: –N'ahäpehen hin'ol tä lhalepuhfwas t'at. Isit'ak iche n'olhäkleyhyaj chik in'amejen wok lhakawos chik tachumpej.

⁹ Tä mälhyejtso, yahinpe honhat wet tshupyene lhip tä lehumin. Olhaip'altsen ame, is chik alew'enhat. Chik letumej tafwojhiye, olham otumhiyeja tä tapinhiye. Wok am chik letumej tapinhiye, wet olham otumhiyeja tä tafwojhiye.

¹⁰ Tä mälhyejtso, Lot iyahinpe honhat wet hiw'enche lhip tä ifwache tewok tä Jordán, lhäy'e lhip tä is wet wuj inät tä ihi, pajtha nichäte hupuy tä Zoar. Matche tä isilataj honhattso, hätet iwoye yachuyajw'et tä Edén p'ante wok honhat tä Egipto. (Häp tä mälhyej p'antetso tä kamaj Lhawuk nitäyhata hupuy tä Sodoma lhäy'e Gomorra.)

¹¹ Tä mälhyejtso, Lot itshupyenej lhame nilhokej honhattso tä ifwache tewok Jordán yämthilek yen lew'eta, wet yikch'oye honhat tä lhamel ihi wet tumej hichä. Wet häp tä tettso, Lot nemhit iyej lewithok Abram.

¹² Abram imälhehi Canaán wet Lot ihoye hupuy lhayis tä ihi honhat tä iwhäye Sodoma.

¹³ Häp Sodoma häpe t'at hupuy tä wuj tä ni'isa wichi tä ihi. Lhamel iwoye lakeyis tä lhäy'e lhip tä ni'isa tä Lhawuk y'ulhan.

¹⁴ Tä tajyäme Lot tä yik, Lhawuk tahuyej Abram wet yok: –Tä lhekana, lhek yahne lhip tä tafwojhiye, lhäy'e tä tapinhiye, lhäy'e tä tumej hichä, lhäy'e tä tumej kaphä.

¹⁵ Olham ow'enla amho nilhokej honhates tä lew'enena, pajla'tha tiyäj'attsiy tä alewuk lhäy'e ales tä lepes lheley.

¹⁶ Oyämla wujpey ales, hätehlat iwoye holo tä nehit katsik ihanej chik iwo t'ufwahtesa.

¹⁷ Mäh lunche imälhewek honhat tä pitaj lhäy'e tä tsajo, tsi olham ow'enla amho.

¹⁸ Tä mälhyejtso, Abram yik, inachuhen lewukwey tä tsänt'ähes wet ihoye honhat lhip tä hal'ätas ihi tä lewuk hin'o tä lhey Mamre, wet häp tä yen lew'eta. Häp lhiptso tott'aho hupuy tä lhey Hebrón, wet tä ihi Abram yenlhi altar yämthilek iwujyen Lhawuk.