Génesis 11 - Biblia Wichi

Hup tä wuj tä atojphä tä ihi Babel

¹ Ifwalas p'antetso nilhokej wichi tä i'pe honhat tefwajni lhämet.

² Tä lhamel yikch'oye p'ante honhat tä tumej hichä, lhamel hiw'en p'ante honhat tä w'awulhchä tä ihi Sinar, wet häp tä yen lew'eta.

³ Ifwala elh p'ante lhamel yämwethä wet yok: –Huwa, n'enlhi ladrillos wet n'ap'o. Tä mälhyejtso, lhamel yenlhi wet häp tä ichumyenlhi, wet lhamel tachuma alquitrán, häp honhat lhits'i tä ichalaj, wet häp tä hip'ajtejwek ladrillos.

⁴ Wet lhamel yok: –Huwa, n'enlhi hupuy, lhäy'e häp hup tä lhäy'e lhip tä atojphä pajla'tha nichäte pule, häpkhilek n'ahäpe wichi tä letoyaj ihi wet tek n'ahäpe iyhäj tä w'et lha'pehen honhat.

⁵ Mat Lhawuk inuhchä, wet itetshan hupuy lhäy'e häp hup tä atojphä tä wichi yenlhi.

⁶ Wet yok: –Wichina weihalhahchä wet tefwajni lhamel lhämet. Häp tä athahit'a tä lhamel yenlhi lechumetna. Tä mälhyejtso, m'ak at chik häpek lhamel t'uhläk yenlhi, athahit'ala.

⁷ Huwa, n'anuyejchä wet n'awelanthiche lhämtes, häpkhilek elh weihalhapej nemhit iläte elh lhämet.

⁸ Wet mälhyej p'antetso tä Lhawuk ifwtsatkatpehen honhat wichi, wet lhamel ileyej tä yenlhi hupuy.

⁹ Wet häp honhattso häp p'ante tä ihi tä Lhawuk iwelanthiche wichi lhämtes, wet ifwtsatkatpehen honhat lhamel. Häp tä tamenej tä hupuytso lhey Babel, tä yiwitej n'olhämet tä yok, Owelanthi.

Sem leles lhäy'e lechetsos

¹⁰ Häp tähesna Sem lechetsos. Nekchämis täkwfwas p'ante tä tajyäme tä pelhay itäyhthen wichi, Sem hiw'en p'ante cien nekchämis, wet häp tä nech'e iche p'ante lhäs tä lhey Arfaxad.

¹¹ Tä tajyäme nekchämistso, hiw'en quinientos (500) nekchämis iyhäj, wet iwo leles iyhäja tä hin'ol lhäy'e tä atsinhay.

¹² Tä Arfaxad hiw'en p'ante treinta y cinco nekchämis, wet nech'e iche lhäs tä lhey Sélah.

¹³ Tä tajyäme nekchämistso, Arfaxad hiw'en cuatrocientos tres (403) nekchämis iyhäj, wet iwo leles iyhäja tä hin'ol lhäy'e tä atsinhay.

¹⁴ Tä Sélah hiw'en p'ante treinta nekchämis, wet nech'e iche lhäs tä lhey Heber.

¹⁵ Tä tajyäme nekchämistso, Sélah hiw'en cuatrocientos tres (403) nekchämis iyhäj, wet iwo leles iyhäja tä hin'ol lhäy'e tä atsinhay.

¹⁶ Tä Heber hiw'en p'ante treinta y cuatro nekchämis, wet nech'e iche lhäs tä lhey Peleg.

¹⁷ Tä tajyäme nekchämistso, Heber hiw'en cuatrocientos treinta (430) nekchämis iyhäj, wet iwo leles iyhäja tä hin'ol lhäy'e tä atsinhay.

¹⁸ Tä Peleg hiw'en p'ante treinta nekchämis, wet nech'e iche lhäs tä lhey Reú.

¹⁹ Tä tajyäme nekchämistso, Peleg hiw'en doscientos nueve (209) nekchämis iyhäj, wet iwo leles iyhäja tä hin'ol lhäy'e tä atsinhay.

²⁰ Tä Reú hiw'en p'ante treinta y dos nekchämis, wet nech'e iche lhäs tä lhey Serug.

²¹ Tä tajyäme nekchämistso, Reú hiw'en doscientos siete (207) nekchämis iyhäj, wet iwo leles iyhäja tä hin'ol lhäy'e tä atsinhay.

²² Tä Serug hiw'en p'ante treinta nekchämis, wet nech'e iche lhäs tä lhey Nacor.

²³ Tä tajyäme nekchämistso, Serug hiw'en doscientos (200) nekchämis iyhäj, wet iwo leles iyhäja tä hin'ol lhäy'e tä atsinhay.

²⁴ Tä Nacor hiw'en p'ante veintinueve nekchämis, wet nech'e iche lhäs tä lhey Taré.

²⁵ Tä tajyäme nekchämistso, Nacor hiw'en ciento diecinueve (119) nekchämis iyhäj, wet iwo leles iyhäja tä hin'ol lhäy'e tä atsinhay.

²⁶ Tä iche p'ante Taré leles tä lheyis Abram, Nacor lhäy'e Harán, lham hiw'en setenta (70) nekchämis.

Taré leles p'ante

²⁷ Häp tähesna Taré leles: Abram, Nacor, Harán. Wet Harán häp tä Lot lajcha.

²⁸ Wet tä kamaj n'ila Taré, wet lhäs Harán y'il p'ante tä ihi lew'et tä lhey Ur tä ihi Caldeo lhayis kahonhat.

²⁹ Abram tawhayey p'ante wet iyej atsinha tä lhey Sarai. Wet lech'inij Nacor häte tawhayey wet iyej lewaklani tä lhey Milca, tä häpe Harán lhäse wet Isca lechita.

³⁰ Wet Sarai lajit lelesa tsi sufwnaj t'at.

³¹ Wet Taré yikch'oye p'ante häp Ur tä ihi Caldeo lhayis kahonhat wet ihoye honhat tä Canaán, lham lhäy'e lhäs Abram, lhäy'e letiche Sarai, lhäy'e lecheyäs Lot. Matkat tä lhamel nichäte p'ante hupuy tä Harán, lhamel ihi t'at.

³² Wet häp p'ante tä Taré ihi tä y'il tä hiw'en p'ante doscientos cinco (205) nekchämis.