Génesis 10 - Biblia Wichi

Noé lechetsos tä tälhe leles

¹ Häp tähesna Noé lechetsos tä Sem, Cam lhäy'e Jafet leles, tä tälhe fwalas tä tajyäme pelhay tä itäyhat wichi:

Jafet leles lhäy'e lechetsos

² Jafet leles häpehen Gomer, Magog, Maday, Javán, Tubal, Mesec, lhäy'e Tiras.

³ Wet Gomer leles häpehen Askenaz, Rifat, lhäy'e Togarma.

⁴ Wet Jafet lhäs elh tä lhey Javán, leles häpehen Elisa, Tarsis, Quitim, lhäy'e Rodanim.

⁵ Häp tähestso Jafet leles tä lepes lheley, wet lhamel yen lew'etesa honhates tä iwhäye lewomekitas. Wet iyhäjpej ihi honhat tä laka honhat wet lhämtes w'enha lhamej.

Cam leles lhäy'e lechetsos

⁶ Wet Noé lhäs elh tä lhey Cam, leles häpehen Cus, Misraim, Fut, lhäy'e Canaán.

⁷ Cus leles häpehen Seba, Havila, Sabta, Raama, lhäy'e Sabteca. Wet Cus lhäs elh tä lhey Raama, leles häpehen Seba lhäy'e Dedán.

⁸ Cus häpe p'ante tä lhäs Nimrod, häp hin'o tä ichun p'ante tä wichi iwujyen.

⁹ Häpe elh tä haw'ektsaj tä takhajay, häp tä isej Lhawuk lech'otyaj. Wet häp tä iche n'olhämet tä õyok, “¡Is chik Lhawuk ayen häpeya haw'ektsaj tä takhajay, hätet iwoye Nimrod p'ante!”

¹⁰ Wet hupuy tä lhamenya tä lewuk Nimrod häpe p'ante Babel, Erek, Akad, lhäy'e Kalne, tä lhamel ihi p'ante honhat tä lhey Sinar.

¹¹ Wet häp honhattso häpe p'ante tä hin'o tä lhey Asur tälhe, wet lham yenlhi p'ante hupuy lhayis tä lhey Nínive, Rehobot-ir, Kalaj,

¹² lhäy'e hupuy tä wuj tä lhey Ts'ifwik Lhetek tä Nínive tumej lhip elh wet Kalaj tumej lhip elh.

¹³ Wet Cam lhäs elh tä lhey Misraim, leles häpehen wichi tä lhey Lud lhayis, Anam lhayis, Lehab lhayis, Naftuh lhayis,

¹⁴ Patros lheley, Casluh lhayis, wet Caftor lhayis tä häpehen Filisteo lhayis letetsel.

¹⁵ Wet Cam lhäs elh tä Canaán iwo lhäsa, wet elh tä ichun lhey Sidón, wet elh lhey Het.

¹⁶ Wet wichi tä Canaán leles häpehen Jebús lhayis, Amorreo lhayis, Gerges lhayis,

¹⁷ Hiv lhayis, Arak lhayis, Sin lhayis,

¹⁸ Arvad lhayis, Semar lhayis, lhäy'e Hamat lhayis. Tä paj p'ante, Canaán leles tä lepes lheley ifwtsatpehen honhat.

¹⁹ Wet honhat tä lewuk lhamel tiyäjche t'at honhat tä tatshupiye Gerar, tälhe Sidón pajtha nichäte hupuy tä lhey Gaza, wet häp lhip tä tumej hichä nichäte hupuy tä Sodoma, Gomorra, Adma, lhäy'e Seboyim, wet lepes häpe hupuy tä lhey Lesa.

²⁰ Häp tähestso Cam lechetsos, iyhäjpej lhaiw'enhathen tä ihi laka honhat wet äp lhämtes w'enha lhamej.

Sem leles lhäy'e lechetsos

²¹ Wet häp Noé lhäs elh tä lhey Sem, häp Jafet lechila, häte leles iche. Nilhokej Heber leles tälhe t'at Sem.

²² Wet Sem leles häpehen Elam, Asur, Arfaxad, Lud, lhäy'e Aram.

²³ Wet Aram leles häpehen Us, Hul, Geter, lhäy'e Mas.

²⁴ Wet Arfaxad lhäs lhey Sélah, wet Sélah häp tä lhäs Heber.

²⁵ Wet iche p'ante täkwfwas leles häp Heber. Elh lhey Peleg tä õyen at lheyayej häp fwalas tä lham ihi p'ante tä õhw'enhomche honhat lhipey wichi häpkhilek laka honhates. Wet Peleg lech'inij lhey Joctán.

²⁶ Wet Joctán leles häpehen Almodad, Selef, Hasar-mavet, Jera,

²⁷ Hadoram, Uzal, Dicla,

²⁸ Obal, Abimael, Seba,

²⁹ Ofir, Havila, lhäy'e Jobab. Nilhokej lhameltso häpehen p'ante Joctán leles.

³⁰ Wet lhamel yen lew'etesa honhates tä tälhe Mesá pajtha nichäte honhat tä lhey Sefar tä häpe honhat tä chenhas tä tumej hichä.

³¹ Häp tähestso Sem lechetsos, iyhäjpej lhaiw'enhathen tä ihi laka honhat wet äp lhämtes w'enha lhamej.

³² Häp tähestso Noé leles tä iwo lelesa p'ante wet ihiche laka honhates. Wet tälhe lhameltso lhäy'e lhip tä wujpey wichi tä w'enhache lhamej, tä tälhe fwalas p'ante pelhay itäyhat wichi tä ihi honhat.