Gálatas 1 - Biblia Wichi

Pablo ichene len'okhayaj häp Dios leles

¹ Amtena ipuhfwas, olham Pablo tä ohäpe t'at apóstol, wok oyok, Dios lakachenhay tä lhamenya elh, ochen amehen olhämetna. Häpkhit'a hin'ol tä yen n'oye apóstol, wok wichi tä lhämet n'oyej, mat häpe t'at Jesucristo, lhäy'e Dios Lhajcha tä inuhatphä p'ante tä tälho n'op'itseyhay.

² Olham lhäy'e nilhokej lhapuhfwas tä in'oyej, ochene on'okhayaj häp amel tä Dios leles tä lheyayhiche aka honhates tä ihi Galacia.

³ Is chik Dios Lhajcha lhäy'e Lhawuk Jesucristo iti amejen lep'altsenyaj lhäy'e atamsek.

⁴ Jesucristo lhayachajeje'pe t'ilek häp n'amel lhasukyajay, yämthilek n'ailanche tä y'ehi honhatna tä lhäy'e lhip tä ni'isa. Häp täja Lhajcha Dios lenech'ethayaj,

⁵ wet is chik lewujyaj iyej lham yämthilek tiyäj'attsiy. Amén.

Dios Silätyaj tä Lhamya

⁶ Wuj tä oselthayaj ihi tä amel yofwajkwet leleyayej Dios tä t'änte amehen häp tä isej Cristo lep'altsenyaj, mat athana nech'e lehänaylhi n'osilätyaj tä w'enha lhamej.

⁷ Lhek yahinya, ihichet'a Dios silätyaj elh, tajlhama Lesilätyaj tä olhamel owohte siläta amejen. Mat häp m'ak tä tamen amejen, häp tä iche iyhäj tä nitch'anlhaya amehen wet t'uhläk ilhahtej m'ak tä lhamel letichunhayajay häp Dios Silätyaj tä yäme Cristo.

⁸ Mat ofwel amhohen tä tej chik olhamel, wok ángel chik tälh puleye, wet iwo siläta amejen n'osilätyaj tä w'enha lhamej, nihäteya iwoye Dios Silätyaj tä pajche olhamel ofwel amhohen, is chik lewit'äyhyaj nichätpe.

⁹ Pajchehte ofwel amhohen wet athana oyachajo, oyok, Elh chik häpe chik iwo siläta amejen n'osilätyaj tä nihäteya iwoye Dios Silätyaj tä pajchehte letachumayhlä, ¡is chik lewit'äyhyaj nichätpe!

¹⁰ Lew'en tä olham ot'uhikwet'a yämthilek wichi yäme tä wuj tä is m'ak tä owoye, mat ot'ukwe yämthilek Dios lham yäme tä is m'ak tä owoye. Chik ot'ukwe yämthilek wichi akäjlhi n'oyej, ohäpkhit'a Cristo lakawo.

Pablo Lesilätyaj häpkhit'a hin'o letichunhayaj

¹¹ Ipuhfwas, ot'uhläk lehanej täja: Häp N'osilätyaj tä owohte siläta amejen häpkhit'a hin'o letichunhayaj.

¹² Tälhiyet'a hin'o chik häpe tä hiw'en n'oho wok ichufwen n'oyej, mat Jesucristo lham t'at tä hin'älit n'oyej.

¹³ Amel lehanej tä ohäpe Judío, wet leläte m'ak tä owoye häp ifwalas tä ohänlhi Judío lhayis lechayaj. Lhäy'e lhip tä olhaikhajyen tä ottaypejlä Dios leles wet ot'uhläk otäyhat.

¹⁴ Wujpe ow'awlhafwas tä onu'pe tä olhay'amkatej Judío lhayis lechayaj, tsi lhäy'e lhip tä ot'amajej ochätilis lakeyes.

¹⁵ Matlhat Dios pajche tatshupi n'oye tä kamaj n'am chätchä tä oihi oko kachowej, wet oisej t'at lham lep'altsenyaj tä iti n'oyej tä t'än n'oye. Wet tä lham ihuminche,

¹⁶ hin'älit n'oyej wet itäfwnhat n'oyej häp Lhäs, yämlek oyen lhämetahi wichi tä kahäpeya Judío lhayis. Wet tälhe tä oyämetso, ohohiyet'a hin'o chik häpe yämlek oty'ätshaneje m'ak tä owoye,

¹⁷ wet n'am hoye Jerusalén yämlek otch'ahuye lhamel tä ichun n'ohlä tä ohäpehen apóstoles. Mat m'ak tä owoye, yofwajkwet ohoye honhat tä Arabia. Tä otälhe, otpile hupuy tä Damasco.

¹⁸ Tä tajyäme tres nekchämes, wet häp tä nech'e ohoye Jerusalén tä ot'uhläk ow'en Pedro, wet oiyej quince ifwalas.

¹⁹ Mat niwohit elh apóstol chik ow'en, tajlhama Santiago, Lhawuk Jesús lech'inij.

²⁰ Matche olhämetna. Tä oihi tä Dios tatache, oyok, W'et oyämhilhit'a.

²¹ Tä tajyäme täjtso, ohoyehen honhatil tä Siria lhäy'e Cilicia.

²² Häp ifwalas tä oyämetso, wichi tä ihi Judea tä ichaye Jesús, kamaj tek nitäfwelte n'oyej.

²³ Tajlhama tä lhamel itoyen n'oye tä elhpej yäm n'oye tä yok, “Häp hin'ohte tatayhlä n'amel ifwalas tä tajyämetso, athana yen at lhämeta n'ochayajte lham t'uhläk itäyhat.”

²⁴ Wet lhamel iwunit Dios tä ihanej m'ak tä owoye.