Ezeq 6 - Biblia Wichi

Ezequiel tatayhlä häp n'ocheyälis

¹ Lhawuk tahuy n'oyej wet yok:

² –Hin'o, yahne häp tachenhas tä ihi Israel lhayis kahonhat. En ämeta olhämet tä ottayhlä lhamel,

³ ok, “Ch'ahuyay n'oye, tachenhas tä lhehi Israel lhayis kahonhat, lhäy'e akawayhil, wet lhäy'e tewok lhayis tä nekchehen akawayhil. Lhawuk Dios lhämet yok, Ochenla amehen atayhfwas wet iwasthihichela häp n'on'okhayajw'etes tä iche atapehen tä wichi ihoye tä n'okwiyej lecheyälis.

⁴ Owasthihichela häp altares tä lhamel iti'pe itshätäy tä yen n'okhayajayej lecheyälis, lhäy'e tä iti'pe incienso tä iwunhen. Wet wichi y'inhihena tä ihi tä lecheyälis tatache.

⁵ Wet otihihila häp Israel lhayis lep'itseyhay tä lecheyälis tatache, wet olhahthilatpetso lhamel lhiley, wet altares ihihichelat lechowej häp nulis.

⁶ “Wet nilhokej Israel lhayis laka honhat lhipey tä ihiche, häp hupuy wasihichela t'at, wet õ'wohla lhipeya len'okhayajw'etes tä iche atapehen tä ahäpe tachenhas tä lhamel ihoye tä n'okwiyej lecheyälis. Lhamel laka altares matche tä wasihichela, wet õ'wohlat lhipeya lecheyälis, wet õ'tilhkathichelatchä altares tä lhamel yen w'eta häp incienso tä iwunhen. Nilhokej häp m'ak tä lhamel yenchelhi otäyhthila.

⁷ Wet lep'itseyhay ihla atapehen tä ahäpehen tachenhas, wet wichi tä imälhehiche nech'e ihanhiyeja tä olham tä ohäpe Awuk Dios.

⁸ “Ihichela iyhäj tä ofwayhtejen häp t'ilek, wet lhamel ifwtsatlatpetso wet yenla lew'eta wichi iyhäj laka honhates.

⁹ Wet tä ihiche honhatestso, lhamel nitichunhila n'och'oye tsi nitichunhichela häp leteläythayajay tä owoyeje, häp tä lhamel iwomn'o, nemhit t'ifwti n'oyej, wet n'okwiyej lecheyälis. Wet lhamel n'äfwtsehiyela lakeyis tä ni'isachehen tä iwoye naji, lhäy'e nilhokej häp m'ak tä hich'atej tä ni'isa tä tatayejnaj n'ohlä.

¹⁰ Wet lhamel nech'e ihanhiyeja tä olham ohäpe Lewuk Dios. Wet äp ihanhiyeja tä matche olhämetnaj owoyeje lhamel tä oyok, Ochenla amehen awit'äyhyaj.”

¹¹ Wet Lhawuk Dios äp tahuy n'oyej wet yok: –Ajomche akwech'ol wet tiyäjlhaphä. Wet wo achosayej ateläythayajay tä i'amejpe häp m'ak tä hich'atej tä ni'isahen tä Israel lhayis iwoye. Tsi lhamel y'inhihena t'at tä ihi n'oka'tshayaj, lhäy'e häp nehläs tä wuj, wet lhäy'e häp n'ot'inhayajay tä tifwiyeja t'at lhamel.

¹² Iyhäj wichi y'inhiyejena äytes, wet iyhäj õ'länhihena tä ihi n'oka'tshayaj, wet iyhäj tä imälhehiche häp tä y'inhiyejena häp nehläs. Wet chik mälhyejtso häp lewit'äyhyaj tä iyej lhamel, wet häp tä nech'e nofwila häp owäkw.

¹³ Wet wichi hiw'enla n'op'itseyhay tä iwhäye n'ocheyälis lhäy'e häp altares, lhäy'e tä i'pe tachenhas tä atoschephä, lhäy'e tä ichechufwi hal'äy tä atoschephä lhäy'e nilhokej hal'äy tä w'atshan, lhäy'e tä ihiche häp lhipey tä lhamel ihipej tä ikäntejlhi m'ayhay tä lenij akäjche häp lhamel lecheyälis. Wet chik hiw'en tä tetso, nech'e häp tä lhamel ihanhiyeja tä ohäpe häp lhamel Lewuk.

¹⁴ Olham oneyhthiphäla otkwey wet otasnhila lhamel, tälhiyela honhat tä ts'anis tä tumej tapinhiye, pajla'tha nichäte hupuy tä Ribla tä itafwojyhiye. Wet oyenla ts'anisa häp honhatna lhäy'e nilhokej Israel lhayis lew'etes, häp tä nech'e lhamel ihanhiyeja tä ohäpe häp lhamel Lewuk.