Éx 9 - Biblia Wichi

T'inhayaj tä ilänhen itshätäy

¹ Lhawuk tahuyej Moisés wet yok: –Mäh hoye Egipto kaniyat wet fwenhola, olak, “Hebreo lhayis Lewuk Dios yok, Wahintshi oka wichi yämthilek n'okwi n'oyej.

² Chik kawahnatshi wet kamaj letsoklhi,

³ ochätyenla'pe okhajyhayaj häp nilhokej aläy wet ihichela t'inhayaj tä wuj tä ni'isa. Y'inhihena yel'atas, asnolis, camellos, w'asetas, tson'atas lhäy'e kayla lhayis.

⁴ Mat tek oy'ajthiyela Israel lhayis läy, häpkhilek niwohit elh tefwajnik y'il.

⁵ Owohiyela täjtsok ifwala.”

⁶ Wet tä ifwala elh Lhawuk iwoye t'at. Wet nilhokej Egipto lheley läy y'inhen, mat häp Israel lhayis läy tek wo elh chik y'il.

⁷ Wet niyat ichen lakawos yämthilek iyahne Israel lhayis läy. Tä lhamel nichäte, hiw'en tä niwohit elh hätefwajni chik y'il. Matkat niyat hit'unhat lehusek wet tek iwahintshi Israel lhayis.

T'inhayaj tä häpe amostas

⁸ Wet Lhawuk ifwenho Moisés lhäy'e Aarón wet yok: –Ch'awho mok'otaj tä ihi n'onhonthi, wet am, Moisés, tsäyphäla chik lhehi tä Egipto kaniyat tatache.

⁹ Mok'otajtso lhaiwelanthila lemoka wet yafwthi ichäjla'pe imälhewek honhat. Wet chik nitsäype wichi lhäy'e itshätäy tä ihi Egipto, amostas ilänhihena.

¹⁰ Wet Moisés lhäy'e Aarón tachuma mok'otaj tä ihi n'onhonthi wet ichäj tä ihoye niyat. Tä nichäte, Moisés itsäyphä wet wichi lhäy'e itshätäy amostas ilänhen.

¹¹ Wet han'ältshantses ihanhiyejt'a iwoyneje chik fwetaj tatayhlä Moisés, tsi häte lhamel amostas ilänhen, tan'isej Egipto lheley iyhäj.

¹² Matkat Lhawuk yäm t'un lehusek niyat wet iwohiyet'a Moisés lhäy'e Aarón lhämet, mälhyej tä pajche Lhawuk ifwenho Moisés.

N'owit'äyhyaj tä häpe kalatu tä wuj

¹³ Wet Lhawuk ifwenho Moisés wet yok: –Nephälak nech'e fwala wet hoyela niyat. Wet fwenhola, olak, “Hebreo lhayis Lewuk Dios yok, Wahintshi oka wichi yämthilek n'okwi n'oyej.

¹⁴ Tsi athana ochenla ame nilhokej n'owit'äyhyajay wet ailänla, lhäy'e aniyatfwas, lhäy'e aka wichi, häpkhilek lehanej tä ihichet'a elh chik häte iwoye olham.

¹⁵ Chik opäynhin'aj ame okhajyhayaj wet otasnhin'aj amej n'owit'äyhyaj, lhäy'e aka wichi, chik mälhyejtso athana nemhit lheche.

¹⁶ Mat tek oailän häpkhilek lew'en t'at okhajyhayaj, yämthilek nilhokej wichi tä i'pe honhat nitäfwel n'oyej.

¹⁷ Mat tej tä lew'en tähestso, kamaj tek letach'anlhaye oka wichi wet tek lewahintshi tä yikhen.

¹⁸ Tä mälhyejtso, chik fwala, häp horana, otsäyhlahchä kalatu tä wuj, häp kalatu tä tek ihanej chik ihi Egipto, tälhe tä nech'e iche p'ante yäk nämena.

¹⁹ Tä mälhyejtso, tihi lew'et tä is häp aläy lhäy'e nilhokej m'ak tä lew'en tä i'alhoye. Tsi kalatu tä nämla ilänla nilhokej wichi lhäy'e itshätäy chik newachufwi hup.”

²⁰ Iche Egipto kaniyat leniyatfwas iyhäj, tä iläte m'ak tä Moisés yäme, wet wuj tä nowayhen, wet ne'tek lakawos lhäy'e leläy ichufwi hup.

²¹ Mat iche iyhäj tä tek yenek matche, wet lhamel t'amajiyejt'a leläy.

²² Wet nech'e Lhawuk ifwenho Moisés wet yok: –Piyen puleye atsut, wet kalatu nitsäyhla'pe wichi lhäy'e itshätäy tä ihi Egipto, lhäy'e yachuyaj tä ihiche n'olafwey.

²³ Wet Moisés ipiyen puleye letsut, wet Lhawuk ichen pelhay tä t'ajanlhi, tet iwoye itäj tä taji honhat, wet wuj kalatu tä itsäype mälhewek honhat tä Egipto.

²⁴ Wet ilehiyejt'a tä nitsäyhchä, häpe t'at kalatu tä ihanhiyejt'a chik mälhyejtso tälhe täjp'ante nech'e iche Egipto, lhäy'e lhip tä äytaji.

²⁵ Wet nilhokej m'ayhay tä ihi honhat wasiche t'at, ilänhen wichi, itshätäy, lhäy'e yachuyaj tä ihiche n'olafwey, wet ichähen lhachal häp hal'äy.

²⁶ Mat häp honhat tä Gosén tä Israel lhayis ihi, tek kalatu nichätho.

²⁷ Wet niyat ne'tek õt'äne Moisés lhäy'e Aarón. Tä lhamel nichäte, wet ifwenho tä yok: –Owoye t'at och'isukyaj, lhäy'e oka wichi, wet otes ihi. Mat amel Awuk Dios häp tä is alhoho.

²⁸ Tä mälhyejtso, alhyen n'oye Awuk häpkhilek tatäy pelhay tä t'ajanlhi wet ileyej kalatu. Wet otch'anlhahla amehen chik lhekhen, nemla on'äy amejen.

²⁹ Moisés nichulho wet yok: –Chik oyikch'oye hupuyna, oneyhthiphäla otkweyey tä ot'alhe Owuk. Wet ilehiyeja tä nitsäyhchä kalatu lhäy'e tä t'ajanlhi, häpkhilek lehanej tä honhat Lewuk t'at häp lham.

³⁰ Mat ohanej tä am lhäy'e aniyatfwas kamaj tek lenowayaye.

³¹ Tä häpe p'ante lewhäy tä cebada lhoy t'unhen wet lino iwo lhawoya, wet nilhokej lino tä ihiche n'olafwey lhäy'e cebada tatäy t'at.

³² Mat häp trigo lhäy'e centeno lewit'äy ihihit'a, tsi tälh tä tafwaytshi kalatu.

³³ Tä Moisés ileyej tä yämhoplhi niyat, wet yikch'oye hupuy wet itiphä takweyey wet t'alhe Lhawuk. Wet yofwajkwet takasit kalatu wet ileyej tä iwomchä wet nemhit t'ajanlhi.

³⁴ Matkat tä niyat hiw'en tä takasit kalatu lhäy'e tä nem t'ajanlhi, yachajo tä iwoye lech'isukyaj, hit'unhat lehusek, lham lhäy'e leniyatfwas.

³⁵ Matche tä yäm t'un lehusek wet tek iwahintshi Israel lhayis, mälhyej tä Lhawuk pajche ifwenho Moisés wet ne'tek yäme.