Éx 4 - Biblia Wichi

Dios hiw'enho lakhajyhayaj häp Moisés yämthilek yenlhi m'ayhay tä iselkathiyejena wichi

¹ Moisés nichulho Dios wet yok: –Lhamel t'ekhahit'ala n'oye wet iwohiyet'ala olhämet. Wet yohlak, “Mathichet'a tä Dios lhain'älit amej.”

² Wet Lhawuk yok: –¿Atsi m'ak tä ihi akwey? Moisés yok: –Otsut t'at.

³ Lhawuk yok: –That honhate. Moisés ithat katsi letsut wet welan amlhätaja. Tä Moisés hiw'en, inu alhoho tä yikch'oye.

⁴ Mat Lhawuk tahuyej wet yok: –Chuma lechäs. Moisés tachuma, häpet tä ikatej yachajo tä häpe t'at letsut.

⁵ Lhawuk yok: –Täjtso häpkhilek lhamel nikachuya tä matche t'at tä Lewuk Dios lhain'älit amej, häp achätilis Abraham laka Dios, Isaac laka Dios wet Jacob laka Dios.

⁶ Wet äp yok: –Athana ti'pe akwey hat'okwe. Moisés iti'pe takwey let'okwe. Tä itiyej kanhi, hiw'en tä amostas i'pe takwey. T'äj lhäy'e lhip tä ipelaj.

⁷ Dios yok: –Achajo tä leti'pe akwey hat'okwe. Moisés iwoye. Tä itiyej kanhi, hiw'en tä iches takwey, hätet iwoye t'isan imälhewek.

⁸ Wet Lhawuk yok: –Chik lhamel ikachu n'otetnek tä ichun, ikachuhit'ala elh.

⁹ Mat chik ikachu täkwfwas n'otetnhay, chumela inät tä ihi tewokitaj wet tsäyla'pe honhat. Wet chik letsäype honhat, welanla w'oyisa.

Dios yen lech'otfwaya Aarón häp Moisés

¹⁰ Mat Moisés yok: –Iwuk, isit'a olhämtes tä ofwetaj oyämlhi. Pajchey tä mälhyejtso, wet tä letahuy n'oyej athana, lew'en tä isit'a olhämtes tä owoye.

¹¹ Lhawuk nichulho wet yok: –¿Atsi tä iwo lak'aja hin'o? ¿Wet atsi tä yen opaya wet yen ch'otech'oya? ¿Wet atsi tä hiw'enyenche honhat wok yen asnama? ¿Hä kahäpeya olham Dios?

¹² Mäh, olham oihla amej chik letahuy wet ofwenla amho ämet chik lewohiyela.

¹³ Mat Moisés tujlhache tä yok: –¡Iwuk, olhaip'altsen ame, chen hin'o elh chik häpe!

¹⁴ Wet Lhawuk nech'e tawäkwäye Moisés tä iwoyetso, wet yok: –Achila iche, Aarón tä häpe Leví lhayis elh. Ow'en tä wuj tä is tä yämlhi. Athana lham nek t'at tä iho ame. Chik nämla, wujlak lakäjyaj ihi chik aiw'en.

¹⁵ Ahuyeja lham, fwenhola nilhokej ämtes tä lewohiyela wet lhamlak yäme. Wet olham oihiyeja wet oihla amej chik lhämwethä, wet ofwenla amhohen m'ayhay tä is chik lewohiyela.

¹⁶ Chik letahuyhiyeja Aarón, hätehlat iwoyek olham t'at tä otahuyej, wet ifwenhihola wichi m'ak tä lefwenho lhamel.

¹⁷ Chäj atsut, tsi häpkhilek lechumyenlhi chik lhenlhi m'ayhay chik wichi iseltejen.

Moisés yik tä yäple Egipto

¹⁸ Moisés yäple lakachäti Jetro lew'et, wet tahuyej tä yok: –¿Hä letach'anlha n'oye tä oyäple opuhfwas Hebreo lhayis tä ihi Egipto? Ot'uhläk ow'en chik kamaj iläyhen p'iya. Jetro nichulho Moisés wet yok: –Mäh t'at, atamsek ihi.

¹⁹ Wet tä kamaj Moisés neka tä ihi honhat tä Madián, Lhawuk äp yachajo tä tahuyej wet yok: –Äple t'at Egipto. Pajche y'inhen nilhokej hin'ol tä t'uhtehläk ailän.

²⁰ Tä mälhyejtso, Moisés tachuma lech'efwa lhäy'e leles wet iti'pe asno, wet yikhen tä ihoye Egipto. Wet ichäji takwey häp letsut tä Dios ne'tek ichäj.

²¹ Wet Lhawuk yachajo tä tahuyej wet yok: –Chik lechäte Egipto, päynela niyat nilhokej n'otetnhay, tsi pajche ow'en amho akhajyhayaj yämthilek lhenlhi tähestso. Mat tetshan, olham ot'unthila lehusek wet tek iwahnhitshila Israel lhayis.

²² Tä mälhyejtso fwenhola, olak, “Israel lhayis laka Dios lhämet yok, Israel häpe olhäs tä ochunkatsek.

²³ Pajche ofwel amho tä oyonaj, Ch'anlhaye olhäs chik yik yämthilek n'okwi n'oyej. Mat tä kawahnatshi, olänla äs tä achunkatsek.”

Õyiset lho t'äj lhip häp Moisés lhäs

²⁴ Wet Moisés inukwe len'äyij tä yäple Egipto, lham lhäy'e lech'efwa, lhäy'e leles. Tä honaj p'ante lhamel iwo lakasthaweta, wet honatsitso Lhawuk lhain'ältej Moisés wet t'uhläk ilän.

²⁵ Wet lech'efwa Séfora tachuma tunte lhip tä y'uy, wet yistej lhäs lho t'äj lhip wet itiyej Moisés lepach'ol. Tä yenlhi täjtso, häp tä ifwenho Moisés tä yok: –Ahäpe och'efwa tä lhäs w'oyis ifwayhat. Wet häp tä Lhawuk ileyej tä fwetaj ilän.

²⁶ Tä mälhyejtso, Lhawuk yikch'oye. Tä Séfora yok, “Ahäpe och'efwa tä lhäs w'oyis ifwayhat”, tsi lham tä yiset lhäs lho t'äj lhip.

Moisés lhäy'e Aarón lhaiw'enhen

²⁷ Wet Lhawuk pajche tahuyej Aarón wet yok: –Mäh hoye ts'anis, lew'enla Moisés. Wet Aarón yik. Tä yäm kanhi, hiw'en Moisés tä iwhäye Dios laka chenaj, wet n'okwiyej wet hits'u lech'alo.

²⁸ Wet Moisés ifwenho nilhokej m'ak tä Lhawuk ne'tek yäme, häte n'otetnhay tä wichi iselthiyejena tä Lhawuk ne'tek yenlhi.

²⁹ Tä ileyej tä ifwenho nilhokej Aarón, nech'e yikhen tä ihoye Egipto. Tä nichäte, lhaihutwek lhäy'e hin'ol tä thänhäy tä iyej Israel lhayis.

³⁰ Wet Aarón ifwenho lhamel häp m'ak tä Lhawuk ifwenho Moisés, häte ipäyne wichi häp n'otetnhay tä Lhawuk ne'tek yenlhi.

³¹ Wet Israel lhayis ikachuhit'a. Wet tä lhamel nitäfwelej tä Lhawuk hip'altsen wet hiw'en leteläythayaj tä iyej, lhamel takhosche katsi wet n'okwiyej Lhawuk.