Éx 32 - Biblia Wichi

¹ Wet tä Israel lhayis hiw'en tä pajlä Moisés chik inuhchä tä i'pe chenaj, lhamel lhaihute häp Aarón wet tahuyej wet yok: –Lhek enlhi n'amhohen dios lhayis yämthilek y'en lhahäneka. Tsi häp Moisés tä n'aitonphä tä y'atälho honhat tä Egipto, y'ahanhiyejt'a m'ak tä lewit'äyhyaj.

² Aarón nichulho lhamel wet yok: –Soyejwethä hach'efwas häp lech'ote lheley tä oro, lhäy'e ales, wet hän n'oye.

³ Tä mälhyejtso, nilhokej wichi ilanche lech'ote lheley tä oro wet lhamel ihäne Aarón.

⁴ Wet lham tachumlä wet itulelh wet wachuhiche, wet häp tä yenlhi w'asetaj. Tä wak'alh, nilhokej wichi yok: –¡Israel, häp täja aka dios tä itonphänaj amel tä lhehi honhat tä Egipto!

⁵ Wet Aarón yenhoplhi altar häp w'asetaj tä oro. Wet ifwitsenej tä yok: –¡Chik fwala n'awola lhakäjyaja tä y'awunit häp Lhawuk!

⁶ Wet tä ifwala tä nech'e fwala, lhamel nechephä wet ilänhen itshätäy tä iwunhomche, lhäy'e m'ayhay tä yen t'awayhata tä yachaje häp lecheyä häpkhilek lha'isyene. Tä lhamel ileyej, wet tatachephä wet t'ekhen, lhäy'e tä iyä, wet äp takatinwethä.

Lhawuk iwo lewäka mat Moisés lhaip'altsene yämthilek ileyej

⁷ Wet nech'e Lhawuk tahuyej Moisés wet yok: –¡Mäh nuhchä! Aka wichinaj letonphä tä ihi honhat tä Egipto, nemhit is lhamel.

⁸ Yofwajkwet lhamel ileyej m'ak tä one'tek lhamel iwoye. Lhamel itulelh oro wet yenlhi w'asetaj. Wet lhamel n'okwiyej wet iwo t'awayhtesa wet yok, “¡Israel, häp täja aka dios tä itonphänaj amel tä lhehi honhat tä Egipto!”

⁹ Ow'en tä häpe t'at wichi tä lehusey t'unhen.

¹⁰ Athana ch'anlha n'oye tä owäk ihi, oyämla nofwej lhamel. Mat am oyämla wujpey wichi chik tälh ame.

¹¹ Matkat Moisés lhaip'altsene Lewuk Dios wet yok: –Iwuk, ¿chipte tä awäk ihi wet let'uhläk letäyhat wichi tä amnaj tä letonphä tä lhamel ihi Egipto, häp tä isej akhajyhayaj tä wuj lhäy'e akwey tä takhajay?

¹² ¿Chihla iwoyek Egipto lheley yok, “Wichitso lewuk Dios itiyej t'akanyaj häp lhamel, wet itonphä tä ihi Egipto, wet tä lhamel nichäte chenhas, ilänhen, wet tatäy tä i'pe honhat häp lhamel.”? Olhaip'altsen ame, leyej awäk. Leche tä let'uhläk lewit'äyen aka wichi.

¹³ Tichunche akawos Abraham, Isaac, lhäy'e Israel, häp lhamel tä am let'unhatche amej ämet tä lewoyeje lhamel tä lhok, “Oyämla wujpey wichi tä häpe ales tä tälhila ame, tehlat iwoye katetsel tä ihi pule. Wet häp honhatna tä pajche ofwel amhohen, ow'enhihola lhamel yämthilek lewuhuy pajla'tha tiyäj'attsiy.”

¹⁴ Tä mälhyejtso, Lhawuk iwo letichunhayaj elha wet ileche tä t'uhläk ihämet laka wichi.

Moisés iwasthiche tunte lhipey tä Dios lhämtes ihiche

¹⁵ Wet Moisés nech'e inuhchä tä tälhpe chenaj, ichäjlhi t'at tunte lhipey tä Lhawuk ilesayen lhämtes tä i'pe.

¹⁶ Dios lham t'at tä yenlhi tunte lhipeyna wet iti'pe lelesaynhay.

¹⁷ Wet tä Josué iläte wichi tä t'änhen, tahuyej Moisés wet yok: –Oläte wichi t'änyajay, mälhyej chik n'oka'tshayaj tä ihi lew'etes.

¹⁸ Moisés nichulho Josué wet yok: –Oläte tä khit'a n'ot'änyaj tä wichi ikalhi letayhfwas, wok wichi tä letayhfwas ikalhi t'änyajay. Mat oläte wichi lepak tä äytaji tä ichoywethä.

¹⁹ Wet tä Moisés tott'aye wichi lew'et, hiw'ene w'asetaj tä oro tä wichi takatinejwethä. Tä Moisés hiw'ene, wuj tä lewäk ihi wet ithat honhate häp tunte lhipey tä ichäjlhi, ithatwhäye chenaj wet wasiche.

²⁰ Wet tachuma w'asetaj tä oro, ithatho itäj wet ichofwaji wet iwo lemoka. Wet itsäyho inät wet ne'tek Israel lhayis iyäyej.

²¹ Wet Moisés tahuyej Aarón wet yok: –¿Atsi m'ak tä iwoyej ame wichina wet tamenej tä letonpe lhamel häp lech'isukyaj tä wuj tä ni'isa?

²² Aarón nichulho Moisés wet yok: –Iwuk, yej afwitsaj n'oye. Lehanej t'at tä wichina iwoyepej m'ak tä ni'isa.

²³ Lhamel t'at tä yok, “Enlhi lhaka dios lhayis yämthilek y'en lhahäneka. Tsi häp Moisés tä n'aitonphä tä y'atälho honhat tä Egipto, y'ahanhiyejt'a m'ak tä lewit'äyhyaj.”

²⁴ Wet tä oläte lhamel, wet oyok, “Nilhokej amel tä oro iyejwethä, is chik ilanche.” Wet lhamel hiw'en n'oho oro tä iyej lhamel, wet häp tä othatho itäj, wet inuphä w'asetajni.

Wichi tä tälhe letes Leví lhamel ilänhen tres mil hin'ol

²⁵ Moisés hiw'en wichi tä nitumahlä lenech'ethayajay tä ni'isachehen. Tsi Aarón tach'anlhaye t'at lhamel tä iwoye m'ak tä hich'atej tä ni'isa, yämthilek häpehen iyhäj tä letayhfwas itiyej leläkwyhanyaj.

²⁶ Wet Moisés takasit tä ihi tä wichi tatache wet yok: –Häp wichi tä nileyayej Lhawuk, is chik lhaihut n'oyej. Wet nilhokej wichi tä tälhe letes p'ante Leví lhamel lhaihutej Moisés.

²⁷ Wet Moisés tahuyej lhamel wet yok: –Lhawuk tä Israel laka Dios yok, “¡Nilhokej amel chuma afwajnhates wet tiyäjo wichi lew'etes! Hoyehen wichi lewukwey wet länhen nilhokej lhamel tä n'okwiyej w'asetaj tä oro. ¡Tej chik apuhfwa wok akalay'i wok haw'etfwa, yej p'altsen!”

²⁸ Wet Leví kawichi iwoye m'ak tä Moisés ne'tek lhamel iwoye. Wet ifwalatso tres mil hin'ol tä õ'länhen.

²⁹ Wet nech'e Moisés yok: –Ifwalana tä amel alhenay Lhawuk t'amajchetesa tä katach'anlhayaye m'ak tä ni'isa tä ales wok apuhfwas iwoye. Tä mälhyejtso, ifwalana Lhawuk takäpfwayej amehen m'ak tä is.

Moisés yachajo tä y'alhyene Dios häp wichi

³⁰ Tä ifwala elh Moisés tahuyej wichi wet yok: –Wuj m'ak tä ni'isa tä amel lewoye. Athana oyachajo tä ohoye Lhawuk, elat tach'ahu n'oye p'iya wet itäyhat amejen hach'isukyajay.

³¹ Wet Moisés yik tä yäple Lhawuk, wet tahuyej wet yok: –Matche tä wichi iwoye lech'isukyaj tä wuj tä lhamel yenlhi w'asetaj tä oro wet yen häpeya laka dios.

³² Olhaip'altsen ame, is chik letäyhtejen lhamel lech'isukyajay. Mat chik katäyhtayej, lej olham olhey tä ihi libro tä lelesayen.

³³ Mat Lhawuk nichulho wet yok: –Tajlhamat elh tä iwoye m'ak tä ni'isa wet tatay n'ohlä, häpkhilek olej lhey tä olesayen tä ihi oka libro.

³⁴ Mat athana mäh, is chik lhekchufwi wichi, häne t'at honhat tä pajche ofwel amho. Oka ángel ichunla ahilä. Mat chik nichäte ifwala tä otasnhayaj, häpkhilek otasnhen häp lhamel tä iwoye lech'isukyajay.

³⁵ Wet Lhawuk ichene t'inhayaj tä wuj häp wichi tä n'okwiyej w'asetaj tä oro tä Aarón yenhoplhi.