Éx 27 - Biblia Wichi

Altar tä bronce

¹ “Enlhila altar tä hal'ä tä acacia. Tihila dos metros wet veinticinco centímetros tä pitaj, wet tä tsajo hätet iwoye, wet tihi un metro wet veinticinco centímetros tä atojphä.

² Wet wola lech'ula, tihichela letselhäs, mat is chik lhip t'at, isit'ak w'enhache lhamej. Wet imälhewek altar p'oyeja'pe bronce.

³ Nilhokej m'ayhay tä iyej altar is chik bronce t'at: häp mok'otaj lehis, lhäy'e pala lhayis, lhäy'e n'olhäthis, lhäy'e tenedores, lhäy'e fwiyhol lehis.

^4-7 Häte enlhila chinhas tä bronce häpkhilek lep'oyejlhi altar lhip tä tumchä, mat yej lhäm taje altar. Häte enlhila täkwfwas hal'äy tä acacia wet p'oyejchela'pe bronce, wet uyitchehena cuatro argollas tä bronce tä letihi altar. Wet yej lanchela, ihi t'at altar, häpkhilek õyen n'otsokeka chik õyikpejchufwi.

⁸ Wet altar is chik pitofwo wet hal'ä t'at, tech'ayneja täjnaj opäyen ame tä lhe'pe chenaj.

Dios lew'et laka alho

⁹ “Enlhila ow'et laka alho. Lhip tä tumej tapinhiye tichela cortinas tä häpe lino tä õ'pätsinchehen. Tihila cuarenta y cinco metros tä pitaj,

¹⁰ lhäy'e veinte letsutes tä bronce, lhäy'e veinte t'äsawetes tä bronce. Wet p'ajteja letsutes häp ganchos tä plata lhäy'e argollas tä plata.

¹¹ Wet häp lhip tä tafwojhiye hätet iwoye.

¹² Wet häp lhip tä tumej tä ifwala y'uy, tumteja cortina tä nipitaja tä veintidós metros y medio, lhäy'e diez letsutes, lhäy'e diez t'äsawetes.

¹³ Wet lhip tä tumej hichä tä lepe ihi, häte tihila cortina tä veintidós metros y medio tä pitaj.

¹⁴ Wet tumteja cortina tä siete metros häp lepe lhip elh, lhäy'e tres letsutes, lhäy'e tres t'äsawetes.

¹⁵ Wet lepe lhip elh hätet iwoye, cortina tä siete metros, lhäy'e tres letsutes, lhäy'e tres t'äsawetes.

¹⁶ “Wet lepe tihila cortina tä nueve metros tä tsajo. Wet is chik häpe n'oyik tä y'it lhäy'e tä ifwak'an wet äp ichät, wet äp häpe lino tä õyen niyhäya tä õ'pätsin, wet lhäy wuj tä isis. Wet enlhila cuatro letsutes lhäy'e cuatro t'äsawetes.

¹⁷ Nilhokej letsutes tä ilunejlhi häp owukwe, is chik letihiche argollas tä plata lhäy'e ganchos tä plata wet t'äsawetes tä bronce.

¹⁸ “Tä mälhyejtso, lhip tä ow'et ihihila, tihila cuarenta y cinco metros tä pitaj wet veintidós metros y medio tä tsajo. Wet n'oyhiy tä õhp'oyejlhi, tihila dos metros wet veinticinco centímetros tä atojphä. Is chik häpe lino tä õyen niyhäya tä õ'pätsin wet t'äsawetes bronce.

¹⁹ Wet nilhokej m'ayhay tä ihi ow'et is chik bronce t'at, lhäy'e chinhas tä t'akw'etes, lhäy'e n'olafwek t'akay lew'etes is chik bronce t'at.

Aceite tä õyen n'ochäkwa

²⁰ “Fwenho Israel lhayis, Is chik ihänpej kana aceite tä olivo lhits'i tä lhäy'e lhip tä is, häpkhilek n'omahen n'ochäkwis

²¹ tä ihi lhip tä tumejlä lech'o tä sak'al hip'o'pe tä Arca tä Ot'amajchet tä olhämtes lehi ihi. Wet Aarón lhäy'e leles is chik lhamel yenpejwethä n'ochäkwis, häpkhilek tälhe tä honaj yäk ifwala y'uhomche t'at tä ihi tä ottache. Häp täjtso olhämet, wet is chik Israel lhayis iti lhamejen pajla'tha nichäte leles tä lepes lheley.”