Éx 25 - Biblia Wichi

Dios ne'tek wichi iwo t'awayhtesayej lham lew'et

¹ Lhawuk tahuyej Moisés wet yok:

² –Fwenho Israel lhayis, Is chik ihutwek otw'ayhat tä tälhe hin'ol lhäy'e atsinhay tä lehusey ne'tek iwoye täjtso. Wet chumayhlä otw'ayhtestso

³ tä häpe oro, plata, bronce,

⁴ wesaj tä y'it lhäy'e tä ifwak'an wet äp ichät, lhäy'e lino tä wuj tä is, lhäy'e n'oyik tä kayla w'ole,

⁵ lhäy'e tson'ataj t'ähes tä õ'pakhen tä ichät, lhäy'e inätetas t'ähes, lhäy'e m'ak tä hal'ä tä acacia,

⁶ lhäy'e aceite tä õyen n'ochäkwa, lhäy'e m'ayhay tä lenij akäjche tä õ'kasoyej aceite tä õ'tsäype m'ak chik õyen t'amajcheta, wok õ'kasoyej incienso yämthilek lenij akäjche,

⁷ lhäy'e tuntey tä wuj laha tä lhey cornalina, hätet iwoye anek lhawo, lhäy'e iyhäj tuntey tä isis häpkhilek õ'ti'pe Sacerdote tä Lhamya lew'uy lhäy'e let'okwep'ot.

⁸ “Wet is chik Israel lhayis yenlhi n'oho ow'et häpkhilek oiyej t'at lhamel.

⁹ Wet häp ow'ettso lhäy'e m'ayhay tä lhenlawethä yämthilek letihi owukwe, tech'ayneja nilhokej m'ak chik opäynhila ame.

Arca tä N'ot'amajchet tä Dios lhämtes ihi

¹⁰ “Enlhila Arca tä häpe n'okähi tä hal'ä tä acacia. Tihila un metro wet diez centímetros tä pitaj, wet sesenta y cinco centímetros tä tsajo, wet sesenta y cinco tä atojphä.

¹¹ Wet p'oyeja'pe oro tä ts'ilak, tä tumphä lhäy'e tä lech'oye, wet tichela häp lhip tä tumphä oro tä lelunkatejlhi.

¹² Wet enlhila cuatro argollas tä oro, wet tihichela takäläy tä cuatro, täkwfwas tumhiyeja lhip elh wet täkwfwas tumhiyeja lhip elh.

¹³ Häte enlhila täkwfwas hal'äy tä acacia, wet käfwelejchehena oro häpkhilek lep'alkatchufwi,

¹⁴ wet uyitchehena häp argollas tä oyämetso, häpkhilek õyen tsokeka chik õyikchufwi häp Arca.

¹⁵ Wet is chik hal'äytso ihi t'at, yej lanchela,

¹⁶ wet olhämet chik ow'enla amho tä häpe Ley, häpkhilek letihi Arca.

¹⁷ “Enlhila Arca lep'ot tä oro, un metro wet diez centímetros tä pitaj, wet sesenta y cinco centímetros tä tsajo. Häpkhila Op'altsenyajw'et.

¹⁸ Wet enlhila täkwfwas m'ayhay tä lhafwis ihi tä oro. Hänela n'okäjnhat tä lekäji tä lhenlhi, wet tila'pe lep'ot, elh ihihila lepes wet elh ihihila lepes elh.

¹⁹ Mat is chik lep'ot lhip t'at häp m'ayhay tä leti'petso, isit'ak w'enha lhamej.

²⁰ Wet tayyenawek m'ayhaytso, mat is chik iyahin t'at häp Arca lep'ot tä i'pe. Wet is chik hich'enhiche lhafwis tä hip'oyejpe lep'ot.

²¹ “Wet chik wak'alh häp lep'ottso tä lhenlhi, wet p'oyeja'pe häp Arca. Mat chunkat thathola häp olhämtes chik ow'enla amho.

²² Wet olham oihihila lechowej häp m'ayhay tä lhafwis ihi tä oi'pe lep'ottso. Wet ofwenla amho nilhokej olhämtes yämthilek lene'tek Israel lhayis iwoye.

Mesa tä pan tä n'ot'amajchet lew'et

²³ “Chumala hal'ä tä acacia wet enlhila mesa. Tihila noventa centímetros tä pitaj, wet cuarenta y cinco centímetros tä tsajo, wet tä atojphä tihi sesenta y cinco centímetros.

²⁴ Wet p'oyeja'pe oro tä ts'ilak, wet tichela häp lhip tä tumphä oro tä lelunkatejlhi.

²⁵ Wet enlhila lhip hal'ä t'äj tä w'awulhi n'otkwech'o tä tsajche, wet tichela lhipey oro wet tila'pe.

²⁶ Häte enlhila cuatro argollas tä oro wet tihichela letselhäs tä takäläy ihiche.

²⁷ Is chik ni'tofwayehlä hal'ä tä n'otsokekw'etes, häpkhilek t'unejiche tä õ'neyhatphäpej häp mesa.

²⁸ Enlhila täkwfwas hal'äy tä acacia wet käfwelejchehena oro, häpkhilek let'uyitpejchufwi mesa chik õyikchufwi.

²⁹ Wet enlhila n'olhäthis lhäy'e n'okalnhey tä wustas häpkhilek leti'pe mesatso, lhäy'e lehis tä õ'tsäyho hat'es tä õyen otw'ayhata. Enejlhila oro tä ts'ilak nilhokej häp m'ayhayna.

³⁰ Wet fwalapej fwalapej tila'pe mesa tä ihi tä ottache häp pan tä lhen amajcheta n'oyej.

N'ochäkwhis tä oro

³¹ “Häte enlhila n'ochäkwhis tä oro tä ts'ilak. Hänelat n'okäjnhat wet enlhila t'äsawet, lhäy'e häp lhip tä nekche lechowej, lhäy'e m'ayhay tä letech'aynej lhawol lhäy'e lakotsol. Is chik weihalha t'at.

³² Wet tres lhachal tumteja lhip elh, wet tres lhachal iyhäj tumteja lhip elh.

³³ Wet seis lhachalna tä tälho elh tä nekche lechowej, elh weihalhapej lhacha is chik letihi tres m'ayhay tä letech'aynej hal'ä tä almendro lhawol lhäy'e lakotsol.

³⁴ Häte lhip tä nekche lechowej enlhila cuatro lhawol lhäy'e lakotsol, tech'ayneja almendro.

³⁵ Wet lakawayhi tä tumchä tihila m'ak tä letech'aynej almendro lhawo. Wet häp lakawayhi elh tä ihi lechowej, häte tihila elh m'ak. Wet lakawayhi elh tä tumphä äp letech'aynej t'at iyhäj.

³⁶ Is chik lhachal, lhäy'e m'ayhay tä letech'aynej lhawol, lhäy'e häp lhip tä nekche lechowej, weihalhahchä, wet äp häpe oro tä ts'ilak tä lekäjejlhi n'okäjnhat tä lhenlhi.

³⁷ Häte enlhila siete n'ochäkwisas tä letiche'pe häp lhachal, häpkhilek ihutunpe tä tatache.

³⁸ Wet häp lecha tä lhistejpej n'ochäk lhäk tä y'o, lhäy'e platofwas tä letichechufwi, is chik häpe t'at oro tä ts'ilak.

³⁹ “Chumala treinta y tres kilos häp oro tä lhenejlhi n'ochäkwhis lhäy'e nilhokej m'ayhay tä iyej.

⁴⁰ Wet is chik wuj tä let'amajej, tech'ayneja t'at täjnaj opäyen ame tä lhe'pe chenaj.