Éx 21 - Biblia Wichi

Dios lhämtes tä y'aje n'okwenkay

¹ “Häp täja olhämtes tä is chik lefwenho wichi. Oyok,

² “Chik lechäj n'okwenek tä Hebreo, is chik tachumlhi amho seis nekchämis. Chik nichäte nekchäm siete, leleyej t'at, wet yej t'alhe chik tiskan letape tä yik.

³ Chik ts'ilak p'ante lham, ts'ilak t'at tä yik hach'oye. Mat chik lech'efwa p'ante hap'akej, is chik yikche t'at hin'o tä yik.

⁴ “Chik lewuk tä iyej hiw'enho atsinha yämthilek yen ch'efwaya, wet iwo lelesa, lhamel lhäy'e lako imälheyej t'at lewuk, tajlhama lajcha tä yik.

⁵ Mat chik hin'o yok, Ohumin owuk, wet häp tä tek ot'uhläk oyikch'oye och'efwa lhäy'e oles,

⁶ tä mälhyejtso, is chik lewuk itihi tä Dios tatache, wet hip'ajtej lepe wok lepe ch'ute, wet itoynej lech'ote häp chinaj tä itselhäj tä yen tetnekayej tä lakwenekna lewuk t'at lham pajla'tha ileyej honhat.

⁷ “Chik hin'o iwom lhäse, wet iche elh tä ichäj wet yen kweneka, is chik iyej t'at lewuk. Isit'ak hätet iwoye n'okwenkay tä hin'ol tä yikch'oye lewuk.

⁸ Wet chik paj chik lewuk nemhit ihumin wet t'uhläk ileyej, is chik iwahnej chik lajcha wok lepuhfwas tiskanpe yämthilek yäple lew'et. Iwohiyet'ak hiw'enho hin'o tä w'enha lhamej, tsi tek iwoyeje m'ak tä t'uhawetej atsinha.

⁹ Mat chik ihumin chik lhäs yen ch'efwaya wet häp tä tamenej tä ichäj, is chik itech'aynej chik lhäse t'at häp letiche.

¹⁰ “Wet chik lewuktso y'isej elh lech'efwa, isit'ak nem t'uye lech'efwa tä ichun, mat hiw'enho lhäk lhäy'e lew'uy, wet isit'ak lhan'äyejo.

¹¹ “Mat chik hin'o niwoyaye m'ayhay tä oyämetso, atsinha letes ihihit'a chik yikch'oye hin'o. Wet niwohit m'ak chik tiskanej letape tä yik.

Dios lhämtes tä y'aje hin'o tä ilän elh wok itiyej laka'tshayaj

¹² “Elh chik iwo m'akayej elh wet ilän, is chik õ'län t'at.

¹³ Mat chik kahäpeyak pajche letichunhayaj yämthilek ilän elh, mat olham Dios tä otihi takweyey yämthilek ilän, chik mälhyejtso, opäynhiyela lew'et häpkhilek ilethane.

¹⁴ Mat häp elh chik itiyej lefwitseyaj häp elh wet ilän, is chik õt'ukwe. Tejlak fwetaj ilethane oka altar, mat õ'län t'at.

¹⁵ “Wet elh chik inhäpäj lajcha wok lako, is chik õ'län t'at.

¹⁶ “Wet elh chik iskat elh yämthilek iwom, wok tej chik kamaj niwoma, is chik õ'län t'at.

¹⁷ “Wet elh chik takäpfwayeje lewit'äyhyaj lajcha wok lako, is chik õ'län t'at.

¹⁸ “Wet iyhäj chik täkley lhamejen, wet hin'o ithatej tunte elh wet iwo lelätseka, wok inhäpäj, wet tamenej elh tä i'pe lemäwet mat n'ila,

¹⁹ elh tä iwo m'akayej elh tek õyen tesayej chik elh tä lewit'äy ihi nephä wet yik, tej chik iwo letsuta. Mat elh tä iwo m'akayej is chik tiskanpe kachal tä õhw'enho elh, wet iwo lahaya ifwalas tä elh imä katsi.

²⁰ “Elh chik y'ajej hal'ä lakwenek, hin'o wok atsinha, wet y'il, is chik õyen tesayej.

²¹ Mat chik nikelahchäk y'il pajtha fwala weihalha wok fwalas täkwfwas, tek õyen tesayej lewuk tsi lewuk t'at.

²² “Chik täkwfwas hin'ol täkley lhamejen wet iwo m'akayej atsinha tä hich'otshan, wet tamenej tä nichätchä lhäs tä y'il, mat lewit'äyhyaj newache atsinha, is chik hin'o tä tamenej han'äfwaj tä y'il iwo lahaya, iwoye t'at m'ak tä atsinha lech'efwa t'alheje, mälhyej n'okalelhthayajwos lhämet tä iwoye.

²³ Mat chik lewit'äyhyaj iyej atsinha, is chik hin'o tä lemenhat lhayen at lahaya.

²⁴ Wok iwastho elh telho, is chik häte õ'wastho lham tatelho. Wok inäk'äs elh tsote, is chik häte õ'näk'äs lham letsote. Wok inäk'äs elh kwey, is chik häte õ'näk'äs lham takwey. Wok inäk'äs elh pach'o, is chik häte õ'näk'äs lham lepach'o.

²⁵ Wok ilänej itäj elh, is chik häte lham õ'länej itäj. Wok iwo lelätseka elh, is chik häte õ'wo lelätseka lham. Wok y'aj elh, häte lham is chik õy'aj.

²⁶ “Chik elh y'aji lakawo telho wet waso, hin'o wok atsinha, is chik tach'anlhaye chik yik. Laha t'at tatelho tä waso.

²⁷ Wet elh chik y'aji lakawo k'aj wet letsote nämhi, is chik tach'anlhaye chik yik. Laha t'at letsote tä ichä.

Dios lhämtes tä y'aje elh chik lewit'äyhyaj ihi

²⁸ “Chik w'asetaj inuye hin'o wok atsinha wet y'il, is chik õ'länej tuntey tä õ'thatejlhi, wet isit'ak õtuj t'isan. Mat letes ihihit'a lewuk.

²⁹ Mat chik w'asetaj lakey t'at tä iwoyepej täjtso tä inuye hin'o, mat lewuk tet niw'ena, tä mälhyejtso, chik w'asetaj ilän hin'o, is chik õ'länej tuntey. Häte lewuk is chik õ'tan'istej lelä.

³⁰ Wet chik õknitan'istayej lelä, mat õt'alhe'pe yämthilek õkniläna, is chik tiskan at letape.

³¹ Häte chik w'asetaj länek häpe elh tä han'äfwaj, is chik õ'woyeje itshäwet m'ak tä olhämetna yäme, lhäy'e lewuk.

³² Wet chik w'asetaj inuye hin'o wok atsinha tä n'okwenek, wet y'il, is chik õ'länej tuntey. Wet hin'o tä lakwenek tä w'asetaj ilän, is chik w'asetaj lewuk hiw'enho treinta chinaj t'äj, laha lakwenek tä w'asetaj länek.

³³ “Chik hin'o ilanhi häp chowej lep'ot wet nachaja'pe, wok tij chowej wet nip'oya'pe, wet iche w'asetaj wok asno tä nichäte,

³⁴ is chik chowej lewuk hiw'enho laha häp itshäwet lewuk, mat itsoklhi itshäwet lep'itsek.

³⁵ “Wet elh chik lelä w'asetaj ilän elh w'asetaj tä lewuk w'enha lhamej, is chik lewuk iwom lelä tä fwitsaj wet hiw'enho lechowej laha häp elh tä lelä y'il. Häte itshäwet tä y'il elh itsok lechowej häp t'isan.

³⁶ Mat chik w'asetajtso lakey t'at tä inuyepej elh, mat lewuk tet niw'ena, is chik hiw'enho elh lelä häp elh tä lelä y'il, mat itsoklhi lep'itsek.