Éx 19 - Biblia Wichi

Israel lhayis nichäte chenaj tä Sinaí

¹ Nech'e tres iwel'as tälhe ifwala tä Israel lhayis yikch'oye Egipto, wet lhamel nech'e nichäte p'ante ts'anis tä Sinaí.

² Lhamel pajche yikch'oye p'ante lhip tä lhey Refidim. Wet tä nichäte p'ante ts'anis tä Sinaí, wet lhamel iwo kasthawetahi, ihi lhip tä tatayhlä chenaj tä Sinaí.

³ Wet Moisés yik tä ihoye Dios tä i'pe chenaj. Wet Lhawuk t'äne wet yok: –Fwenho wichi olhämtesna, häp Jacob leles Israel lhayis, oyok,

⁴ “Amel lew'enay naji m'ak tä owoyeje Egipto lheley, wet ohän amehen lhip tä oihina, tet iwoyek afwenche tä aihän kana.

⁵ Tä mälhyejtso, chik letach'ahuyay n'oye wet lewoye olhämet, ahäpkhihena oka wichi tä lhamya tä lheyayej wichi iyhäj, tsi Olewuk imälhewek honhat.

⁶ Ahäpkhihena oka sacerdotes tä iwujyenn'o, wet ahäpkhihena wichi tä lhayen t'amajcheta n'oyej.” Dios ne'tek Moisés ifwenho Israel lhayis nilhokej tähestso.

⁷ Wet Moisés ihoye lhamel wet t'äne hin'ol tä thänhäy, wet ifwenho m'ak tä Lhawuk ne'tek lhamel iwoye.

⁸ Wet nilhokej Israel lhayis tä nichulhwek wet yok: –Olhamel owohiyela nilhokej m'ak tä Lhawuk ne'tek owoye. Tä mälhyejtso, Moisés ifwenho Lhawuk häp wichi lhämtesna.

⁹ Wet Lhawuk tahuyej wet yok: –Tetshan, ohohla ame tä oihi pule tä wuj. Wet wichi ilätla n'oye chik oyämlhi amho, häpkhilek lhamel tek ikachu ame. Wet nech'e Moisés yäme wichi lhämet tä ifwenho Lhawuk.

Lhawuk ne'tek wichi lhayen t'amajchetesayej

¹⁰ Wet Lhawuk tahuyej wet yok: –Mäh waklhat wichi ifwalana lhäy'e chik fwala, häpkhilek häpe wichi tä ot'amajchet wet lhaihut n'oye yämthilek n'okwi n'oyej. Is chik ilejen lew'uyis

¹¹ wet lhaiwaklhathen. Wet chik tres ifwalas lhamel hiw'enlan'o tä onuhlahchä wet oi'pe chenajna Sinaí.

¹² Mat isit'ak wichi lhaitott'ayne chenaj. Fwenho lhamel, is chik t'amaj lhamejen wet isit'ak lhamel iho'pe wok lhayämte. Tsi elh chik lhaitott'aynhiyela, letes ihi wet õ'län.

¹³ Mat isit'ak elh chik häpek ilänej takwey, mat is chik õ'thatejlhi tuntey wok õtiyäjejlhi lothay. Hin'o wok itshäwet, is chik õ'län t'at. Chik pitsaje n'ofwol tä tson'ataj ch'u, häp tä nech'e is chik wichi iho'pe chenaj lhip tä tumchä.

¹⁴ Tä mälhyejtso, Moisés inuhchä tä tälhpe chenaj, wet iwaklhat wichi yämthilek häpe Lhawuk t'amajchetes wet lhaihute yämthilek n'okwiyej. Wet wichi ilejen lew'uyis,

¹⁵ wet Moisés ifwenho lhamel wet yok: –Awaklhathen ifwalana lhäy'e chik fwala, häpkhilek awak'alhen chik lew'echehi. Wet yej alet'ajej atsinha.

Lhawuk inuhchä tä tälh puleye wet i'pe chenaj lhip tä tumphä

¹⁶ Wet tä tres ifwalas tä nech'e fwala, iche lep wet lepak tä tum puleye äytajiy, hätet iwoye pelhay tä t'ajanlhi, wet iche pule tä wuj tä i'pe chenaj. Wet pitsaje n'ofwol trompeta lepak tä äytaji tä tumho, wet nilhokej wichi ichettiyejchehen lenowayhyaj.

¹⁷ Wet Moisés ne'tek nilhokej wichi tälhomche lew'etes wet ihoye chenaj yämthilek lhaitott'ayne Dios. Wet lhamel takasthen tä iwhäye chenaj.

¹⁸ Wet wuj tutsaj tä hip'o'pe chenaj, tsi Lhawuk tumho itäj tä inuhchä wet i'pe chenaj. Tutsaj tä tälho hätet iwoye tä tälhche n'onhonthi, wet iche honhat w'ahu tä äytaji tä ihi chenaj.

¹⁹ Wet lhäy'e lhip tä äytaji trompeta lepak, wet Lhawuk lepak hätet iwoye pelhay tä y'ip tä nichulho häp Moisés tä tahuyej.

²⁰ Tä Lhawuk inuhchä tä tälh puleye, i'pe chenaj lhip tä tumphä, wet ne'tek Moisés ihoye lhip tä lham ihitso. Moisés ihoye

²¹ wet Lhawuk tahuyej tä yok: –Nuhchä wet fwenho wichi, isit'ak lhayämte chenaj wet t'uhläk hiw'enn'o. Chik iwoye täjtso, y'inhihena.

²² Häte sacerdotes tä lhaitott'ayen n'oye, chunkat is chik lhayen t'amajchetesa n'oyej häpkhilek n'am soyej lew'atshancheyaj.

²³ Moisés nichulho Lhawuk wet yok: –Wichi tek lhaitott'aynhiyela chenajna Sinaí. Tsi pajchenaj lene'tek olhamel oyäm kalelhäj lhip tä lepes tä is chik wichi ihi wet oyen t'amajcheta.

²⁴ Lhawuk yok: –Mäh nuhchä, wet chik letapil äy'ela Aarón. Mat häp sacerdotes lhäy'e wichi, isit'ak lhamel inu w'echehi häp lhip tä lepes wet t'uhläk iho n'oye. Tsi chik iwoye täjtso, osohiyeja lew'atshancheyaj.

²⁵ Tä mälhyejtso, Moisés inuhchä tä tälhpe chenaj wet ifwenho nilhokej tähestso häp Israel lhayis.